“Nyonya tozambizambi t’ase wedja”

Jakɔbɔ akeyaka dia Jehowa nangaka dia onto mbomamema paka ndamɛ oto, kaanga mbakinde l’etena kɛsɔ ko Nde atadje ɔlɛmbɛ lo dikambo dia ɔtɛmwɛlɔ wa dikishi. (Eto 20:3-5) Koko, l’ɔkɔngɔ wa Jehowa mbotɛ dia nkalola la Bɛtɛlɛ, Jakɔbɔ akadjangɛ onto tshɛ dia mangana la ɛtɛmwɛlɔ awɔ wa dikishi. Oma laasɔ, Jakɔbɔ akanya dikishi tshɛ, mbidja ondo ndo azama wakawalɔtaka wakawafɔnyaka dia vɔ mbawaela diɛsɛ. (Eta 35:1-4) Aha la taamu, Jehowa akangɛnangɛna kɛnɛ kakasale Jakɔbɔ.

Ko lo nshi yaso nyɛ, ngande wakokaso mamema Jehowa la tshondo tshɛ? Sho tatɛka nsala dui sɔ lo mbewɔ ɛngɔ tshɛ kele la diɔtɔnganelo la ɛtɛmwɛlɔ wa dikishi kana l’awui w’ɛdiɛngɛ. Kɛsɔ mɛnyaka dia sho pombaka minya ɛngɔ tshɛ kele la losambi l’ɛdiɛngɛ ndo sɛdingolaka tɔkɛnyɔ taso la yambalo tshɛ. Ɛnyɛlɔ, yambola wate: ‘Onde dimi ngɛnangɛnaka l’abuku kana waa filmɛ yɛnya awui wele oko okishi, asombo kana edimu? Onde kɛnyɔ yami mɔtshi mɛnyaka dia awui wa maji, wa sengana kana mbidjana etshii oko awui wele bu kɔlɔ?’ Sho pombaka mangana etale la ɛngɔ tshɛ kahetsha Jehowa.​—Os 97:10.

NYENDE VIDƐO YELE L’ƆTƐ A DUI ƆNƐ: “NYƆLƆSHANE LA DIABOLO” NDO OMA LAASƆ, NYOKADIMOLE LO AMBOLA WAYELA ANƐ:

• 

  Dui diakɔna diakatombe lo lɔsɛnɔ laki Palesa laki ombeki wa Bible?

• 

  Lande na kele ekɔ ohomba nyanga ekimanyielo le dikumanyi naka wɛ kana ombeki ayɛ wa Bible ambohomana l’awui w’ɛdiɛngɛ?

• 

  Oma lo awui akɔna wahomba wanɛ walanga kokamɛ oma le Jehowa mangana la wɔ tshɛ lo tshɛ?

• Yɛdikɔ yakɔna ya wolo yakɔshi Palesa?

• Oyadi dihole diakɔna diadjasɛyɛ, naa toho tɔmɔtshi tahombayɛ mbewɔ shɛngiya yele l’ɛdiɛngɛ?