Toho tosato ta ndjaɛkɛ le Jehowa

Davidɛ akalɛndja Ngɔliyatɛ nɛ dia nde akayaɛkɛ le Jehowa. (1Sa 17:45) Jehowa nangaka mɛnya wolo ande lo wahɔ w’ekambi ande. (2Ɛk 16:9) Ngande wakokaso ndjaɛkɛ l’ekimanyielo kasha Jehowa lo dihole dia ndjaɛkɛ l’awui wakatokomɛ kana l’akoka aso hita? Toho tosato takokaso nsala dui sɔ tɔ tɔnɛ:

• Lɔmbaka mbala la mbala. Lɔmbaka aha tsho dia nyanga edimanyielo l’ɔkɔngɔ wa wɛ nsala kɔlɔ kɛmɔtshi, koko lɔmbaka nto dia nkondja wolo etena kahomanayɛ l’ohemba ɔmɔtshi. (Mat 6:12, 13) Lɔmbaka aha tsho dia Jehowa ntshɔkɔla tɛdikɔ tamboyoshila mbɔsa, koko lɔmbaka nto dia nkondja ɛlɔmbwɛlɔ kande la ntondo ka mbɔsa tɛdikɔ.​—Jak 1:5

• Onga l’ekongelo ka mbadiaka ndo ka mbekaka Bible. Adiaka Bible lushi tshɛ. (Os 1:2) Kana yimba la bɛnyɛlɔ dia lo Bible ndo nkamba la wetshelo wamboyokondja oma lo bɛnyɛlɔ diakɔ. (Jak 1:23-25) Yalɔngɔsɔlaka dikambo di’olimu w’esambishelo lo dihole dia ndjaɛkɛ lo diewo diayɛ hita. Kondja wahɔ oma lo nsanganya ya l’etshumanelo lo ndjilɔngɔsɔlaka

• Kamba kaamɛ la okongamelo wa Jehowa. Eya ɛlɔmbwɛlɔ k’ekomelo k’okongamelo ndo yelatɔ aha la ntshimbatshimba. (Wal 9:17) Hokamɛ dikumanyi etena kashawɔ alako ndo wetshelo.​—Hɛb 13:17

NYENDE VIDƐO YELE L’ƆTƐ A DUI ƆNƐ: SHO NDOOKO L’ƆKƆKƆ WA MBOKA ƐHƐNYƆHƐNYƆ WƆMA, NDO OMA LAASƆ NYOKADIMOLE LO AMBOLA WAYELA ANƐ:

• Wɛɔma akɔna waki l’anangɛso l’akadiyɛso?

• Kakɔna kakaakimanyiya dia minya wɛɔma ɛsɔ?