Diwala diekɔ dikambo dia lɔsɛnɔ l’otondo

Akristo watondoya awala awɔ mbishaka Jehowa kɛnɛmɔ ndo dui sɔ mbishaka wadi l’omi ɔngɛnɔngɛnɔ. (Mak 10:9) Dia diwala ntshikala edja ndo dia diɔ monga l’ɔngɛnɔngɛnɔ, Akristo pombaka ndjela nna lo nna atɔndɔ wa lo Bible etena kasɔnawɔ olonganyi.

Ekɔ dui dia lomba ntatɛ membwana dikambo dia diwala paka l’ɔkɔngɔ wa wɛ ‘ndekanya ɛnɔnyi wa dikɛnda,’ etena kele nsaki ya dieyanelo wolo efula nɛ dia dui sɔ koka kodjɛ wekamu diaha wɛ mbɔsa tɛdikɔ t’amɛna. (1Kɔ 7:36) Ekɔ dui dia lomba dia nkamba la nshi yayɛ y’onyemba dia nkeketsha diɔtɔnganelo diasayɛ la Nzambi ndo ndeka monga la waonga w’Okristo. Lo nsala ngasɔ, wɛ ayonga l’akoka wa mbisha lonya dia ntondoya lo diwala diayɛ.

Ntondo ka mbetawɔ dia tshukana l’onto ɔmɔtshi, ɔsa etena dia mbeya “lonto loshɛmi l’etei k’otema” l’onto akɔ. (1Pe 3:4) Naka wɛ ambotatɛ monga la taamu ta wolo l’awui amɔtshi, kete sawola awui akɔ l’onto layoyonga olonganyi ayɛ. Oko wediɔ lo diɔtɔnganelo dia lam’asa anto, lo diwala wɛ pombaka ndeka ndjasha lo kɛnɛ kakokayɛ mbisha olonganyi ayɛ, koko aha lo kɛnɛ kayoyolongola oma le nde. (Flp 2:3, 4) Naka wɛ nkamba l’atɔndɔ wa lo Bible la ntondo ka wɛ tshukana, kete ayonga dui dia wɔdu wɛ ntetemala nsala ngasɔ l’ɔkɔngɔ wa wɛ tshukana l’oyango wa nyu monga la diwala di’ɔngɛnɔngɛnɔ.

NYENDE VIDƐO YELE L’ƆTƐ A DUI ƆNƐ: WOHO WA NDJALƆNGƆSƆLA DIKAMBO DIA DIWALA​—ETENYI 3: ‘KAMBA AKUMI LA NTONDO’ NDO OMA LAASƆ, NYOKADIMOLE LO AMBOLA WAYELA ANƐ:

• Ngande wakatalekaka kadiyɛso monga la diɔtɔnganelo la Shane?

• Kakɔna kakandɛnyi etena kakandatalekaka mbeeya?

• Ngande wakookimanyiya ambutshi ande ndo yɛdikɔ yakɔna ya lomba yakandɔsɛ?