Ɔlɔlɔ la kɔlɔ: Dui diendana la so sho tshɛ

Naka wɛ nangaka ntshɔ dihole dimɔtshi dieyɛ atatshɔka ndooko lushi, kakɔna kayoyosala?

1. 1. Ntshɔ lɛnɛ afɔnyayɛ dia lɛkɔ mbahombayɛ ntshɔ.

2. 2. Ndjela anto akina lo monga l’elongamelo ɔnɛ vɔ mbeyaka mboka.

3. 3. Nyanga ɛlɔmbwɛlɔ k’oshika lo nkamba la GPS, kartɛ kɛmɔtshi kana le ɔngɛnyi ayɛ ɔmɔtshi wɛkɛyɛ otema weya mboka kakɔ.

Naka sho nsɔna kanyi ya ntondo kana ya hende, kete tayokoma dihole dimɔtshi koko mbeyaka monga ko aha lɛkɔ mbakatalangi ntshɔ. Koko naka sho nsɔna kanyi ya sato, kete sho koka monga l’eshikikelo dia tayokoma lɛnɛ alangaso ntshɔ.

Lɔsɛnɔ laso lekɔ oko lɔkɛndɔ lalongamɛso dia lɔ layotokonya lo nshi yayaye y’ɔngɛnɔngɛnɔ. Dia nkoma lɛkɔ kana bu, dui sɔ nemanɛka lo yɛdikɔ y’efula la lɛnɛ ayangaso ɛlɔmbwɛlɔ etena kɔsaso tɛdikɔ.

Kaanga mbele tɛdikɔ efula tɔsaso tekɔ ta totshitshɛ, tɔmɔtshi l’atei atɔ tekɔ ohomba efula. Tɔ kɛnɛmɔlaka atɔndɔ wendana la lɔkɛwɔ wayelaso, mbuta ate woho wɔsaso kɛnɛ kele ɔlɔlɔ la kɛnɛ kele kɔlɔ. Tɛdikɔ tɔsɔ tayonga la shɛngiya ya dimɛna kana ya kɔlɔ l’etena k’otale le so ndo le wanɛ wokaso ngandji. Tɛdikɔ tɔsɔ mendanaka l’akambo wele oko wanɛ:

• Awui wa dieyanelo ndo diwala

• Losembwe, olimu ndo falanga

• Woho wa mbodia ana

• Woho wa salɛ anto akina akambo

Ngande wakokayɛ ndjashikikɛ dia kana tɛdikɔ tayɛ l’akambo asɔ tayokokimanyiya dia wɛ la nkumbo kayɛ monga l’ɔngɛnɔngɛnɔ lo nshi yayaye?

Dimbola diahomba ɔmɔmɔ l’atei aso ndjaoka diɔ nɛ: Kakɔna kakoka kimanyiyami dia mbɔsa tɛdikɔ t’amɛna lo kɛnɛ kendana l’ɔlɔlɔ la kɔlɔ?

Periodikɛ kɛnɛ kayolembetshiya lande na kakokaso mbɛkɛ otema lo kɛnɛ kata Bible lo kɛnɛ kendana l’ɔlɔlɔ la kɔlɔ ndo woho wakokatɔ kokimanyiya.