Onde wɛ akeyaka?
Lande na kaki apami waki komonga ase Isariyɛlɛ l’ɔnɔngɔ w’asɔlayi wa nkumekanga Davidɛ?
L’ATEI w’asɔlayi waki andɔshi wa ta wa wolo waki Davidɛ mbaki ndo apami wayela anɛ: Zɛlɛkɛ ose Amɔna, Uriya ose Hiti ndo Itima ose Mɔaba.a (1 Ɛk. 11:39, 41, 46) L’atei w’asɔlayi waki Davidɛ mbaki ndo nto “ase Kɛrɛtɛ, ase Pelɛtɛ ndo ase Ngiti.” (2 Sa. 15:18) Akɛnamaka di’ase Kɛrɛtɛ ndo ase Pelɛtɛ waki la diɔtɔnganelo dia ma ma l’ase Filistiya. (Ɛzk. 25:16) Ase Ngiti waki ondo ase osomba wa Filistiya wa Ngata.—Jas. 13:2, 3; 1 Sa. 6:17, 18.
Lande na kakɔshi Davidɛ apami waki komonga ase Isariyɛlɛ l’ɔnɔngɔ wa asɔlayi ande? Nde aki l’eshikikelo dia vɔ wayonga la kɔlamelo le nde ndo wekɔ ohomba efula le Jehowa. Ɛnyɛlɔ, lo kɛnɛ kendana la ase Kɛrɛtɛ ndo ase Pelɛtɛ, Dibuku dimɔtshi (The New Interpreter’s Dictionary of the Bible) mbutaka ɔnɛ: “Vɔ wakatshikala la kɔlamelo le Davidɛ lo tena diakaleke tshɛ wolo l’edja k’ɛlɔmbwɛlɔ kande.” Ngande wakawɛnya kɔlamelo yawɔ? “Ko apami tshɛ w’ase Isariyɛlɛ wakatshike” nkumekanga Davidɛ, “wakayele Shɛba onto ɔmɔtshi [l]akadjaka ofukutanu,” ase Kɛrɛtɛ ndo ase Pelɛtɛ wakatshikala la kɔlamelo le Davidɛ ndo wakasha lonya dia nshidiya ɔtɔmbɔkwɛlɔ wa Shɛba. (2 Sa. 20:1, 2, 7) Lo diaaso dikina, ɔnaki nkumekanga Davidɛ Adɔnidja akalange nsala dia nkoma nkumekanga lo dihole dia Sɔlɔmɔna. Koko, ase Kɛrɛtɛ la ase Pelɛtɛ wakatetemala ntshikala la kɔlamelo le Davidɛ ndo wakakimanyiya dia Sɔlɔmɔna nkoma nkumekanga nɛ dia nde mbakasɔnama oma le Jehowa.—1 Nku. 1:24-27, 38, 39.
Onto okina lakatshikala la kɔlamelo le Davidɛ aki Itayi ose Ngiti. Itayi la andɔshi ande wa ta 600 wakakimanyiya nkumekanga Davidɛ etena kakatɔmbɔkɔ ɔna Davidɛ, Abisalɔma ndo kakandatetemala mbiva etema w’ase Isariyɛlɛ dia ndɔsha nkumekanga. Davidɛ akatɛ Itayi dia lam’ele nde ekɔ ɔngɛndangɛnda, takandahombe ntshɔ kaamɛ lande. Koko Itayi akate ate: “Lo mɛtɛ oko wele Jehowa la lɔsɛnɔ ndo oko weyɛ wɛ nkumɛmi nkumekanga la lɔsɛnɔ, dihole tshɛ diayonga nkumɛmi nkumekanga, oyadi lo nyɔi kana lo lɔsɛnɔ, lɛkɔ kayonga okambi ayɛ!”—2 Sa. 15:6, 18-21.
Itayi aki la kɔlamelo le Davidɛ, nkumekanga kakakitama esɔ oma le Jehowa
Kaanga mbaki ase Kɛrɛtɛ, ase Pelɛtɛ ndo ase Ngiti angɛndangɛnda, vɔ wakashikikɛ dia Jehowa ekɔ Nzambi ka mɛtɛ ndo Davidɛ aki okitami w’esɔ wa Jehowa. Ande woho wakahombe Davidɛ monga la lowando otsha le apami wa kɔlamelo waki suke lande asɔ lee!
a Ɛlɛmbɛ wa Nzambi wofundami lo Eohwelo k’Ɛlɛmbɛ 23:3-6 wakashimbaka ose Amɔna kana ose Mɔaba dia mbɔtɔ lo etshumanelo ka l’Isariyɛ. Koko, mɛnamaka dia ɔlɛmbɛ ɔsɔ wakendanaka l’ose wodja wa lootɔ koko vɔ koshimbaka angɛndangɛnda dia monga kaamɛ l’ekambi wa Nzambi. Enda Etude perspicase Volume 1, lk. 100-101.