6 Ohokwelo

KƐNƐ KALEMBETSHIYA DUI SƆ

Tshɛkɛta ohokwelo koka nembetshiya nɔmbɔla kana mbetsha. Lo tena dimɔtshi, dui sɔ mendanaka ndo la nɔngɔsɔla dionga dia kɔlɔ diele la ɔna. Mbala efula, dui sɔ mendanaka nto la mbisha wetshelo wendana la lɔkɛwɔ wakoka nkimanyiya ɔna dia nde mbeya nsala ɛsɔnwɛlɔ w’amɛna wakoka mbeta lo dihole dia ntondo.

OHOMBA WA DUI SƆ

L’ɛnɔnyi akumi weke kambeta, ohokwelo wakayoshishɔ suke la tshɛ lo nkumbo mɔtshi, nɛ dia ambutshi mbokaka wɔma ɔnɛ engwelo mbeyaka ndjoshisha nɛmɔ diele l’ɔna. Koko, ambutshi wa tomba mbidjaka ɛlɛmbɛ wele la wɛdimo ndo mbetshaka anawɔ dia vɔ mbakitanyiya.

“Ana wekɔ l’ohomba wa monga l’elelo dia mbakimanyiya dia vɔ nkoma epalanga w’eshika. Ana wele bu l’ohokwelo, wekɔ oko masuwa wele bu la yenda, watokomɛka paka lo mimbɔ kana nsala aksida.”​—Pamela.

KƐNƐ KAKOKAYƐ NSALA

Kokotshake kɛnɛ kakayate aha la ntshikitanya. Naka ɔnayɛ hakitanyiya ɛlɛmbɛ ayɛ, kete shikikɛnde dia etombelo wayonga naka nde hayedi ɛlɛmbɛ akɔ. Lo wedi okina, ongaka suke dia mandola ɔnayɛ etena kakitanyiyande.

“Mbala efula dimi mandolaka anami lo woho wewɔ l’okitanyiya lo andja ɔnɛ wele okitanyiya waya wolo monga awɔ. Lowando mbetɛka dui sɔ wɔdu lewɔ dia vɔ mbetawɔ engwelo etena ketɔ ohomba.”​—Christine.

TƆNDƆ DIA LO BIBLE: “Onto l’onto ayona kɛnɛ konɛnde.”​—Ngalatiya 6:7.

Onga l’ekanelo k’ɔlɔlɔ. Etena kashayɛ ɔna ohokwelo, dja yimba lo ɛnɔnyi wele la nde, akoka ndo woke woke wa munga kosadinde. Etombelo w’etsha awɔ nemanɛka mbala efula la munga kosadiwɔ, ɛnyɛlɔ, naka vɔ wokamba la telefɔnɛ lo yoho ya kɔlɔ, kete kokaka mbashimba diaha vɔ nkamba la tɔ lo etena kɛmɔtshi. Lo etena kakɔ kaamɛ, ewɔ momala esadi lo dui dimɔtshi diele bu ohomba tsho paka l’ɔtɛ weyɛ hadilange.

“Dimi pembaka ndjashikikɛ dia mbeya kana ɔnami akahindodi l’okonda ko kana akayakesi dia nsala munga. Otshikitanu wekɔ lam’asa kalolɛka munga kakɔ kaamɛ kɛnya wɔdu ɔmɔtshi wendana la lonto lande lahomba mingola ndo munga kahomba minya.”​—Wendell.

TƆNDƆ DIA LO BIBLE: “Tanyomadiake ananyu, diaha vɔ ndjɔtɛwɔ.”​—Kɔlɔsayi 3:21; nɔtɛ.

Onga la ngandji. Ohokwelo mongaka wɔdu efula le ana dia vɔ mbetawɔ ndo nkitanyiya naka vɔ mbeyaka dia oyango wa ntondo wele l’ombutshi ele ngandji.

“Etena kasala ɔnaso dui dimɔ dia kɔlɔ, sho mboshikikɛka dia takangɛnangɛna tɛdikɔ tshɛ t’amɛna takandɔshi lo nshi yakete. Sho mbolembetshiyaka dia dui dia kɔlɔ sɔ hatolanya lokumu lande etena tshɛ kende l’ohomba wa engwelo ndo tekɔ suke dia mbokimanyiya dia nsala dui sɔ.”​—Daniel.

TƆNDƆ DIA LO BIBLE: “Ngandji ekɔ la solo dia lotutsha ndo ɔlɔlɔ.”​—1 Kɔrɛtɔ 13:4.