Lonyuma
Sawo dia ntondo dia lo periodikɛ kɛnɛ diakate di’anto efula mbɔsaka dia Bible kekɔ dibuku di’ekila. Vɔ mɛnaka dia etena kadiawɔ Bible ndo kayelawɔ ɛlɔmbwɛlɔ katɔ, vɔ ndekaka ndjasukanya la Nzambi ndo vɔ ndjoshihodiaka dia waya la lɔsɛnɔ lele l’oyango.
Bible kambaka la tshɛkɛta “lonyuma” dia ntɛkɛta dikambo dia lɔkɛwɔ kana dia yoho mɔtshi ya lɔsɛnɔ. (Judɛ 18, 19) Anto wahalange Nzambi mbaalɔmbɔla ndjaɛkɛka lo tokanyi tawɔ hita, koko wanɛ walanga dia Nzambi mbaalɔmbɔla mbɔsaka atɔndɔ ande la nɛmɔ.—Ɛfɛsɔ 5:1.
ELONGAMELO
TƆNDƆ DIA LO BIBLE: “Naka wɛ ambɔkɔmɔ lo lushi la paa, kete wolo ayɛ wayokitakita.”—Tokedi 24:10, nɔtɛ.
KƐNƐ KALEMBETSHIYA DUI SƆ: Ɔkɔmwɛlɔ koka toshishɛ wolo wele la so ohomba dia ndɔshana l’ekakatanu wa lo lɔsɛnɔ. Koko, elongamelo koka tosha wolo wele la so ohomba. Naka tekɔ l’elongamelo, kete tayoshihodia dia ekakatanu efula wele la so, wekɔ wa lo tshanda mɔtshi tsho.
KƐNƐ KAKOKAYƐ NSALA: Kanyiya awui w’amɛna wayosalema lo nshi yayaye. Lo dihole dia ndjakiyanya dia kɛnɛ kakoka ntomba kana kongɛɛ di’awui tshɛ salema lo yoho ya kokele, sala akambo lo yoho yɔtɔnɛ la eyango ayɛ. Kɛnɛ kele mɛtɛ ele, “awui wa shashimoya” kokaka ntomba. (Ondaki 9:11) Koko, mbala efula awui salemaka lo yoho ya dimɛna oleki woho wakokaso nongamɛ. Dia nembetshiya dui sɔ, Bible kambaka l’ɛnyɛlɔ ka okambi wa dikambɔ ndo tɔ mbutaka ɔnɛ: “Onɛ woho ayɛ la pindju ndo toshake lonya layɛ momuya polo la dikɔlɔ; nɛ dia wɛ heye kɛnɛ kayolowana, oyadi kɛnɛ kana kekina kana diɔ tshɛ diayonga amɛna.”—Ondaki 11:6.
EKADIMWELO LO AMBOLA W’OHOMBA WA LO LƆSƐNƆ
TƆNDƆ DIA LO BIBLE: “Ombisha yimba . . . Ɔtɛkɛta ayɛ wekɔ mɛtɛ.”—Osambo 119:144, 160.
KƐNƐ KALEMBETSHIYA DUI SƆ: Bible mbishaka ekadimwelo lo ambola wayaoka suke l’anto tshɛ. Ɛnyɛlɔ, tɔ mbishaka ekadimwelo lo ambola wayela anɛ
Oma lende akataye?
Lande na keso la lɔsɛnɔ?
Ngande wonga onto etena kavɔnde?
Onde lɔsɛnɔ lɔnɛ layokomɛ paka nganɛ oto?
Miliyɔ y’anto wa l’andja w’otondo wambolowanya nsɛnɔ yawɔ lo nsɛdingola ekadimwelo washa Bible lo ambola ango ndo akina.
KƐNƐ KAKOKAYƐ NSALA: Sɛdingola lo wahɔ ayɛ hita kɛnɛ ketsha Bible. Lɔmba Ɔmɛnyi wa Jehowa ɔmɔtshi dia kokimanyiya dia wɛ nshihodia Bible. Ɔtɔ lo sitɛ kaso ka jw.org, kana ɔtɔ lo losanganya laso lɔmɔtshi, lele onto tshɛ mbɔtɔka ofele.
ATƆNDƆ AKINA WA LO BIBLE
Enda vidɛo yele l’ɔtɛ a dui ɔnɛ: Lande na mbeka Bible? yele lo jw.org. Yɔ tanemaka lo ɛtɛkɛta ndekana 880
EYA EHOMBA AYƐ WA LO NYUMA.
“Ɔngɛnɔngɛnɔ le wanɛ weya ehomba awɔ wa lo nyuma.”—MATEO 5:3.
EKA AWUI EFULA WENDANA LA NZAMBI ƆNƐ LELE KIƆKƆ YA BIBLE.
‘Yanga Nzambi, ko wɛ ayowotana mɛtɛ, nɛ dia nde bu etale oma le ɔmɔmɔ la l’atei aso.’—ETSHA 17:27.
ADIA NDO KANA YIMBA LA LOSANGO LA LO BIBLE.
“Nde ngɛnangɛnaka lo ɛlɛmbɛ wa Jehowa,a ndo nde kanaka yimba lo ɛlɛmbɛ Ande la yanyi ndo l’otsho. . . . Ndo kɛnɛ tshɛ kasalande kayolowana.”—OSAMBO 1:2, 3, nɔtɛ.
a Jehowa ekɔ lokombo laki Nzambi latanema lo Bible.