Kɛnɛ ketawɔ anto amɔtshi

Waa Hindu

mbɔsaka di’asui wekɔ etombelo w’oma lo kɛnɛ kasala onto nshi nyɛ kana kɛnɛ kakandasale lo nshi y’edjedja. Onto koka nkoma lo moksha, mbuta ate tshungɔma oma lo tshelo ya mbototɔka, naka nde ndjakakitola la ɛngɛnɔngɛnɔ tshɛ wa lo lɔsɛnɔ.

Waa Mizilima

mbɔsaka di’asui wekɔ dilanya di’oma lo pɛkato ndo ohemba wa mbetawɔ. Dr. Sayyid Syeed lele owandji wa tshunda di’ase Mizilima dia lo Amɛrikɛ wa lo Nɔrdɛ mbutaka ɔnɛ: “Mpokoso toholaka dia sho pombaka monga la lowando le Nzambi l’ɔtɛ w’ɛtshɔkɔ tshɛ wakondjaso ndo mbeya dia sho pombaka nsukɛ wanɛ wele lo dihombo.”

Ase Juda

mbɔsaka di’asui wekɔ etombelo w’oma lo etsha w’onto ndamɛ. Ase Juda amɔtshi mbutaka dia eolwelo kayoyala, l’ɔkɔngɔ wa laasɔ, ko vɔ ndjofuta anto wakadiɛnɛ waki komonga l’onongo. Wetshelo ɔmɔtshi w’ase Juda w’ehekesa mbetshaka dia wanɛ wavɔ totɔka nto ndo dui sɔ mbishaka onto diaaso dia nde ndjaatshumoya mbala efula lo munga yande.

Waa Buda

vɔ lawɔ mbutaka di’onto mbototɔka mbala efula. Vɔ mbutaka di’asui w’onto komɛka etena katshikande etsha, nsaki ndo tokanyi ta kɔlɔ. Naka onto aya la lomba, osala kɛnɛ kele ɔlɔlɔ ndo otetemala monga l’ekanelo ka yimba ka dimɛna, kete nde ayokoma lo nirvana, lɛnɛ ele asui tshɛ wambokomɛ.

Waa confusionistes (tohotohoto)

mbutaka di’asui efula ndjaaka oma lo “munga y’onto kana oma l’awui wahandatondoyisha” lo ndjela kɛnɛ kata diksiɔnɛrɛ dimɔtshi (Dictionary of Comparative Religion). Tohotohoto mɛnyaka dia kaanga mbakoka asui kitakita naka onto monga la yoho ya lɔsɛnɔ la dimɛna, “efula k’asui ndjaaka oma le ditongami dia lo nyuma diele la wolo woleki wɔnɛ wele l’anto. Etena kɛsɔ, ndooko kakoka onto nsala ele paka mbetawɔ kɛnɛ kakakongɛ ditongami sɔ.”

Ɛtɛmwɛlɔ ɛmɔtshi wa waoho

mbutaka di’asui ndjaaka oma le wanɛ wele la diɔtɔnganelo l’ɛdiɛngɛ. Lo ndjela dietawɔ diawɔ sɔ, akanga w’alɔka koka mbela shasɛ kana mpokoso ndo anto koka tutsha nkɛlɛ kawɔ lo tshimbo ya sɛlɛmɔnyi efula. Ɔnkɔnɛ, vɔ mbetawɔka dia waa sɛlɛmɔnyi ndo ekanga w’oma le wetshi koka nsuwola wolo wele l’akanga w’alɔka etena kadiɛnɛ onto ɔmɔtshi la hemɔ.

Akristo

mbetawɔka di’asui ndja oma lo pɛkato kakasale anto ahende wa ntondo oko wɛnyamidiɔ lo Bible lo dibuku dia Etatelo. Koko, ɛtɛmwɛlɔ efula wambokotsha tokanyi tawɔ hita lo wetshelo ɔsɔ. Ɛnyɛlɔ, aseka Mupɛ amɔtshi mbutaka dia onto kokaka nambola asui ande le Nzambi dia mbɔlɔmba dia nde nkondja wahɔ w’oma lo ɔtɛmwɛlɔ kana nkamba l’asui asɔ lo dikambo dia panda k’onto ɔmɔtshi.