KƐNƐ KA NSALA ETENA KATADƐ DIANGƆ ESHINGA

Kamba la falanga yayɛ la lomba tshɛ

Etena katadɛ diangɔ eshinga, sho tshɛ mongaka l’ekakatanu. Koko toshishake elongamelo. Ekɔ awui wakokayɛ nsala dia ntondoya.

OHOMBA WA DUI SƆ

Naka wɛ hakambe la falanga yayɛ la lomba, kete wɛ ayoleka monga l’ekakatanu wendana la falanga. Oyadi wɛ bu la falanga efula, ekɔ awui efula wakokayɛ nsala wakoka kokimanyiya dia nkamba la falanga yayɛ dimɛna.

KƐNƐ KAKOKAYƐ NSALA

Sɛna lo yoho yɛdimi l’ekondjelo kayɛ. Naka wɛ nsala dui sɔ, kete wɛ ayotshikala ki ndo ayoyalɔngɔsɔla di’awui wa shashimoya wakoka ntomba.

Dia kokimanyiya dia nsɛna lo yoho yɛdimi l’ekondjelo kayɛ, kongɛ woho wa nkamba la falanga yayɛ, mbuta ate mfunda lofulo la falanga lakondjayɛ la adepasɛ wayoyosala. L’ɔkɔngɔ wa nkongɛ woho wayoyokamba la falanga yayɛ, shikikɛ kɛnɛ kele la yɛ mɛtɛ ohomba. Oma laasɔ, sala la wolo diaha nsala adepasɛ weyɛ kokongɛ ndo ntshikitanya kɛnɛ kakayakongɛ naka eshinga wambodɛ kana awui wendana l’ekondjelo wambotshikitana. Naka wɛ ambotshuka, kete ekɔ ohomba sawolaka l’olonganyi ayɛ l’oseka yɛdikɔ tshɛ yahombayɛ mbɔsa.

Hemba nsala nganɛ: Lo dihole dia mbɔsa diangɔ dibasa, kimɔ falanga mbala kakɔ ɔtɔi naka kokaka. Anto amɔtshi mɛnaka dia lo nsala akambo lo yoho shɔ, vɔ kambaka la falanga yawɔ lo yoho ya dimɛna lo nsomba diangɔ diakawakongɛ ndo vɔ mbewɔka abasa. Ndo nto, naka wɛ mombaka dikuta lo bankɛ, ɔsa etena ka nsɛdingola akatshi ayɛ w’oma lo bankɛ dia menda falanga yakayadje ndo yamboyotondja. Wɛ hatoleka ndjakiyanya etena keyayɛ falanga ngana yele layɛ.

Koka monga dui dia wolo dia nsɛna lo ndjela ekondjelo kayɛ. Koko kongɛ woho wayoyokamba la falanga yayɛ koka kokimanyiya.

“Nkamba akumi.”—Luka 14:28.

Nkokɛ olimu ayɛ. Naa awui shikaa wakokayɛ nsala dia nkokɛ olimu ayɛ? Awui amɔtshi wakokayɛ nsala vwanɛ: Komaka la wonya l’olimu. Ɛna olimu ayɛ la sso di’ɔlɔlɔ. Ɛnya anto akina dia wɛ nangaka mbakimanyiya ndo nkamba wolo. Onga la dilɛmiɛlɔ. Kitanyiya ɛlɛmbɛ wa l’olimu ndo nsala la wolo dia ndowanya akoka ayɛ.

Ewɔ tshupa falanga otshupatshupa. Yambola wate: ‘Onde dimi kambaka la falanga yami dia nsomba diangɔ diele bu ohomba?’ Ɛnyɛlɔ, anto efula kambaka la falanga yawɔ dia nsomba didjoyadjoya, dia nkɛnya tɔkɛnyɔ ta falanga, dia nsomba fɔka kana dia nnɔ wanu lo tshambandeko. Awui asɔ koka monga la shɛngiya ya kɔlɔ lo yoonge yawɔ ndo mbashishɛ olimu.

“Ɔngɛnɔngɛnɔ le onto latana lomba . . . likondja ndeka nkondja mfɛsa dimɛna.”—Tokedi 3:13, 14.

Omba yema ya falanga dikambo di’awui wa wanyandja. Etena kakokayɛ nsala dui sɔ, omba yema ya falanga dikambo dia awui wahayalongamɛ kana wa wanyandja. Falanga shɔ koka kokimanyiya dia ndjaoka l’ekokelo lo yoho mɔtshi naka wɛ kana ose nkumbo kayɛ ɔmɔtshi ambondama la hemɔ ka shashimoya, amboshisha olimu kana etena katomba dui dimɔtshi diahayalongamɛ.

“Tena ndo awui wa shashimoya [tokomɛka sho] tshɛ.”—Ondaki 9:11.

Alako wendana la woho wa momba falanga

Katɛka mbo ya ndɛ efula laangelo.

Sho koka salaka adepasɛ efula naka sho ndɛka lo rɛstora mbala efula ndo naka sho sombaka mbala la mbala mbo ya ndɛ ya lokatɛ ndo sombaka diangɔ dia nnɔ. Lo mɛtɛ mbɔsaka etena ndo nɔmbamaka mbidja welo dia nkatɛ mbo ya ndɛ laangelo, koko dui sɔ kimanyiyaka dia momba falanga efula. Dui sɔ diayokokimanyiya nto dia ndjashikikɛ dia mbo ya ndɛ yakɔ yekɔ amɛna.

Onga la lomba etena kasombayɛ mbo ya ndɛ.

Nsala listɛ la diangɔ dia ndɛ diahombayɛ nsomba ndo lɛnya lɔ. Ewɔ dia nsomba diangɔ diahayakonge dia nsomba.
Somba diangɔ dia ndɛ efula etena keyɛ la falanga efula. Yashikikɛ dia diangɔ dia ndɛ diahahɔndɛ diasombayɛ diayombama dimɛna dia mbewɔ diaha diɔ ndana.
Somba diangɔ dia lo makashinyi di’oshinga wɔdu naka diekɔ amɛna.
Naka tambokongɛ dia nsomba diangɔ di’amɛna lo makashinyi lo tshimbo y’Ɛtɛrnɛtɛ, kete tewɔ diaha nsomba diangɔ diahatakonge ndo todje yimba l’adepasɛ wayotosala. Naka vɔ sombaka diangɔ lo tshimbo y’Ɛtɛrnɛtɛ lo dihole diadjasɛyɛ, onde wɛ koka mpemba dia nsala dui sɔ?
Yanga diangɔ diambowokitshakitsha oshinga. Ɛdika eshinga wa diangɔ dikina diele oko kura, diangɔ diadja djungudungu kana ashi.

Kana yimba la ntondo ka nsomba diangɔ di’eyoyo.

Wanɛ wasala wa telefɔnɛ ndo diangɔ dikina di’eyoyo mongaka l’oyango wa nyomoleka nkondja falanga. Ɔsa etena ka nkana yimba ndo yambola wate: ‘Wahɔ akɔna wayomokondja lo nsomba ɛngɔ keke katomba? Onde lekɔ l’ohomba wa ɛngɔ keke katomba wonyɔnɛ? Ndo naka dimi kisomba, onde mɛtɛ lekɔ l’ohomba atɔ kaanga mbeketɔ oma la ntomba?’

Nɔngɔsɔla ndo nyomokamba la diangɔ diakɔ.

Kokɛ diangɔ dimɛna kimanyiyaka dia diɔ ntshikala edja ndo naka diɔ nɔngɔswamaka, kete lɔngɔsɔladiɔ naka diambolana. Wɛ koka nto momba falanga efula naka wɛ nsomba diangɔ diele anto akina wambokambaka la diɔ.

Onɛ diangɔ diayɛ dia ndɛ.

Shi wɛ koka nyanga dihole dimɔtshi dia monɛ diangɔ dia ndɛ? Lo nsala ngasɔ, wɛ hatosala adepasɛ efula dia nsomba mbo ya ndɛ dikambo diayɛ ndo di’ase nkumbo kayɛ ndo wɛ koka monɛ diangɔ dimɔtshi dia nsondja kana nkahɛ anto akina.

“Asangwelo wa kanga etete konyaka mɛtɛ lo otondoyelo.”—Tokedi 21:5.

“Sho sɛdingolaka eshinga wa diangɔ dialangaso nsomba mbala la mbala ndo sho salaka la wolo diaha ndeka mbɔsa abasa.”—Miles, Angleterre.

“La ntondo ka sho ntshɔ tosomba diangɔ, dimi la nkumbo kami tasalaki listɛ la diangɔ diele la so ohomba.”—Jeremy, États-Unis.

“Sho sɛdingolaka mbala la mbala falanga yakatakongɛ lo nkumbo kaso dia nsomba diangɔ dia ndjashikikɛ dia tayonga l’akoka wa nsomba kɛnɛ kakatakongɛ ndo sho mombaka yema falanga kina lo dikambo di’awui wa shashimoya.”—Yael, Israël.

“Dimi la wadɛmi taketsha anaso dia nɔngɔsɔlaka diangɔ dialana lo dihole dia nsomba di’eyoyo. Dui sɔ mendanaka la mutuka ndo la diangɔ dia lo luudu laso. Dimi la wadɛmi salaka la wolo diaha mbesa dia nsomba diangɔ dieke katomba.”—Jeffrey, États-Unis.

“Lakakitshakitsha adepasɛ lo monɛ akatshikatshi ndo lo nonga kɔkɔ. Dimi kahanaka l’anto akina akatshikatshi wonɛmi.”—Hono, Birmanie.

Pami kɛmɔtshi aka akatshikatshi lo jardɛ