ƆKƆNDƆ 34

Woho wa mma di’oyoyo

ONDE wɛ kokaka mbuta kakɔna katɔngɔna anto anɛ mala kɛtɛ? Ekɔ oko lɔpɔpɔ. Diangɔ diakɔ diekɔ wɛma mɔtshumɔtshu ndo mpɛ. Koko diɔ kema lɔpɔpɔ; ekɔ diangɔ dimɔtshi dialɛwɔ.

Ambeta paka ngɔndɔ ɔtɔi keto lâmbotomba Ase Isariyɛlɛ oma l’Edjibito. Vɔ waya l’oswe wa shɛnga. Lâwɔ mbo ya ndɛ hatombe efula, ɔnkɔnɛ anto woyakiyanya wata vate: ‘Jehowa otondotodiaka l’Edjibito tshike dimɛna. Lɛkɔ sho tshɛ taki la mbo ya ndɛ oko akatalangaka.’

Ɔnkɔnɛ Jehowa akate ate: ‘Dimi layanga kɔsha mbo ya ndɛ oma l’olongo.’ Ko Jehowa akasale ɔsɔku. La wedi a pindju, lam’akɛnyi Ase Isariyɛlɛ tangangɔ ta tokamatokama ta wema oko sɛlɛ dia lɔtɛta takakitshi, vɔ wakambwana vate: ‘Kakɔna kɛnɛ na?’

Mɔsɛ akawatɛ ate: ‘Mbo ya ndɛ yambonyosha Jehowa ngo.’ Anto wakayɔ̂lɛ vate: MANA. Yɔ yaki mpɛ oko ekate wɔsɔhanyemi l’osanga.

Mɔsɛ akatɛ anto ate: ‘Nyɔtɔngɔnake yɛdikɔ yokoki onto l’onto mana a ndɛ.’ Ɔsɔku mbakawasalaka pindju tshɛ. Ko etena kakawalɛka yanyi, mana yakalɛlɔka lo kɛtɛ.

Mɔsɛ akawatɛ nto ate: ‘Aha onto mbetɛ mana polo lushi lokina.’ Koko anto amɔtshi kombôkɛ. Onde wɛ mbeyaka kɛnɛ kakasalemaka? La wedi a pindju, mana yakawetɛka yakatawaka dikusu ndo yakatatɛka mbupola solo!

Lushi lɔmɔtshi la lo lomingu lakikɔ lakatɛ Jehowa anto dia vɔ tɔngɔna mana tɛdikɔ tohende. Aki lushi la samalo. Ndo Jehowa akate dia mbetɛ yema mɔtshi polo lui, dikambo dia nde hatɔkɔshaka kina lushi l’esambele. Lam’akawetɛka mana polo lushi l’esambele, yɔ kɔpɔndaka ndo kɔmbɔtɔ dikusu! Ɔsɔ aki dihindo dikina!

Edja k’ɛnɔnyi tshɛ wakadjasɛ Ase Isariyɛlɛ l’oswe wa shɛnga, Jehowa akaleshaka mana.

Etumbelu 16:​1-36; Walelu 11:​7-9; Jashua 5:​10-12.