ƆKƆNDƆ 37

Luudu la dipɛma dikambo dia ɔtɛmwɛlɔ

WƐ MBEYAKA ekelo kengo? Toko luudu la lânde la tɛmɔlaka Jehowa. Vɔ wakalielɛka nto ɔnɛ tabɛrnakɛlɛ. Anto wakashidiya lika, lâsɔ ko wambotomba ɔnɔnyi w’otondo oma l’Edjibito. Wɛ mbeyaka ɔnɛ lakawasha lokanyi la lika ngango?

Toko kanyi yaki Jehowa mbakiyɔ. Lam’akadɛ Mɔsɛ lo Dikona dia Sinai, Jehowa akawotɛ woho wa lika. Nde akate dia lika woho wokokilɔ mongɔma lo tenyi tenyi. Lo woho ɔsɔ mbakakokaka tenyi diakɔ mɛmbama dia tolika dihole dikina. Ɔnkɔnɛ, lam’akatononɔka Ase Isariyɛlɛ l’oswe wa shɛnga, vɔ wakatɛmbaka ndo luudu lakɔ la dipɛma.

Naka wɛ menda l’etei k’etenyi ka tshitshɛ kele la koma ya luudu lakɔ, wɛ ayɛna ɔshɛtɛ kana sanduku. Wakawelɛka ɔnɛ ɔshɛtɛ wa sheke. Lâdiko awɔ andjelo kana akeruba ahende wa paunyi wakikɔ, ɔnɛ koma nyɛ ndo okina koma kina. Nzambi akafunde ɛlɛmbɛ dikumi lo pase dikina di’ave nto, nɛ dia Mɔsɛ akahandjola dia ntondo. Ko wakadje ave akɔ l’etei k’ɔshɛtɛ wa sheke. Ndo djɔndɔ ya mana yakadjama lɔkɔ. Wɛ ohɔkɔ ele mana?

Arɔna w’ɔnango Mɔsɛ akasɔnama oma le Jehowa dia monga ɔlɔmbɛdi wa lâdiko. Nde kakalɔmbɔlaka anto dia tɛmɔla Jehowa. Ndo anande w’apami waki vɔ lawɔ ɛlɔmbɛdi.

Enda kakianɛ mbalasa ka woke ka luudu la dipɛma. Ntɔ ndeka mbalasa ka tshitshɛ woke mbala hiende. Wɛ hɛnyi ɔshɛtɛ wa tshitshɛ watomba edinga oma lɔkɔ? Ongo kele ediakelo, lɛnɛ akatshumbaka ɛlɔmbɛdi diangɔ di’opumu w’ɔlɔlɔ dielɛwɔ: ntshɔ. Ndo ekitshelo ka tala kele la atala esambele mbele lo mbalasa kakɔ. Mɛsa mbele ɛngɔ ka sato kele lɔkɔ. Etande wa mâpa 12 waki lâdiko dia mɛsa akɔ.

Dɔnga dia woke di’ashi diaki lo sɛkɛ dia tabɛrnakɛlɛ. Ɛlɔmbɛdi wakɔsaka ashi akɔ dia vɔ mbɔkaka. Ndo ediakelo ka woke kaki lɔkɔ. Lɛkɔ kakawatshumbaka edo wa nyama yakawalambolaka Jehowa. Luudu la Jehowa la dipɛma laki katei atei wa pango, ko Ase Isariyɛlɛ lidinga djwɛ.

Etumbelu 25:​8-40; 26:​1-37; 27:​1-8; 28:1; 30:​1-10, 17-21; 34:​1, 2; Heberu 9:​1-5.