ƆKƆNDƆ 48
Yewo y’ase Ngibiyɔna
ESOMBA efula wa lo Kanana wakayalɔngɔsɔlaka dia ndɔshana l’Isariyɛlɛ. Vɔ wakafɔnyaka vate kana wayowalɛmbia. Koko anto wakadjasɛka l’osomba ɔmɔtshi waki suke wakawelɛka Ngibiyɔna kɔfɔnyaka ɔsɔku. Vɔ wakeyaka ɔnɛ Nzambi mbayalwɛ Ase Isariyɛlɛ ko vɔ konanga ndɔshana la Nzambi. Omalɔkɔ, wɛ mbeyaka kɛnɛ kakasale Ase Ngibiyɔna?
Vɔ wakɔshi yɛdikɔ dia mɛnama oko kana vɔ mbidjasɛka lo dihole dimɔtshi di’etale. Omalɔkɔ, apami amɔtshi l’atei awɔ wakalɔtɛ ahɔndɔ w’adiɛnga la sabata y’emusu. Vɔ wakahɛ esoke w’emusu lâdiko dia ponda yawɔ ndo wakɔshi mapa wa lônge hotaa. Ko vɔ wakatshu la ntondo ka Jashua atowotɛ ɔnɛ: ‘Sho tekɔ lo ndjaye oma lo ngelo kɛmɔtshi k’etale efula nɛ dia takoke akambo wa Jehowa Nzambi kanyu ka woke. Takoke akambo tshɛ wakandanyosalɛ l’Edjibito. Ɔnkɔnɛ ewandji aso wakatotɛ dia sho mbɔsa pamba yaso ya lɔkɛndɔ kele toyonyote ɔnɛ: “Sho tekɔ ekambi anyu. Nyotolake di’aha nyu tɔlɔsha.” Oko wɛnanyu ahɔndɔ aso waya emusu ndo mapa aso lônge hotaa nɛ dia lɔkɛndɔ l’otale.’
Jashua l’ewandji ekina waketawɔ Ase Ngibiyɔna. Ɔnkɔnɛ vɔ wakâlake ɔnɛ: hawotowalɔsha. Koko l’ɔkɔngɔ a nshi shato vɔ wakayeyaka ɔnɛ Ase Ngibiyɔna wekɔ lo mbidjasɛ kâ sukesuke.
Ko Jashua akawambola ate: ‘Lande na akanyatotɛ ɔnɛ: mal’etale mbayanyaye na?’
Ase Ngibiyɔna wakôkadimula vate: ‘Takasale ngasɔ nɛ dia takoke ɔnɛ Nzambi kanyu Jehowa akanyolake dia nyosha kɛtɛ ka Kanana kɛnɛ k’otondo. Ɔnkɔnɛ sho takoke wɔma nɛ dia nyatokoyotodiaka.’ Koko Ase Isariyɛlɛ wakashikikɛ daka diawɔ, ndo vɔ kondjaka Ase Ngibiyɔna. Vɔ wakawaetɛ ekambi awɔ.
Nkumekanga ka la Jerusalɛma akômala nɛ dia Ase Ngibiyɔna wakokana l’Isariyɛlɛ. Omalɔkɔ, nde akewoya nkumi ya dikanga kina nyɛi ɔnɛ: ‘Nyoye nyoyokimanyiya kele ndɔsha Ngibiyɔna.’ Ko nkumi ya dikanga tshanu shɔ yakâlɔsha. Onde Ase Ngibiyɔna wakasale dui dia tshundju lo nyanga diokanelo l’Isariyɛlɛ, ko kakianɛ nkumi ya dikanga shɔ yamboyalɔsha oka? Tayɛ̂na dui diakɔ.