ƆKƆNDƆ 50
Amato ahende w’etema wolo
ETENA kakadiɛnɛka Ase Isariyɛlɛ, vɔ wakalelɛka Jehowa. Jehowa akâkadimula, ko akawasha ɛnɔmbɔdi w’ahonga dia mbakimanyiya. Lo Bible vɔ mbetaka ɛnɔmbɔdi akɔ ɔnɛ: embadi, kɛdikɛdi tushushi. Jashua mbaki shushi ya ntondo, ndo tushushi tɔmɔtshi l’ɔkɔngɔ ande takawelɛka: Ɔtɛnyɛlɛ, Ehudɛ ndo Shamengare. Koko ndo amato ahende mbaki l’atei w’anto wakakimanyiyaka Isariyɛlɛ; nkombo yawɔ Dɛbɔra la Jaɛlɛ.
Dɛbɔra aki omvutshi a omoto. Jehowa akawotɛka akambo wahataye ko nde akatɛka anto kɛnɛ kakataka Jehowa. Dɛbɔra aki ndo shushi. Nde akadjasɛka la tshina dia toko dimɔtshi la ngelo, ko anto wakayaka le nde dia ndjoyanga ekimanyielo l’ekakatanu awɔ.
L’etena kɛsɔ Jabina aki nkumekanga ka la Kanana. Nde aki la pusupusu y’ata 900. Olui ande w’alembe waki la wolo efula ko Ase Isariyɛlɛ efula wakayokomaka ekambi wa Jabina la wolo. Owandji w’alembe waki Jabina wakawelɛka Sisɛra.
Lushi lɔmɔtshi Dɛbɔra akatomɛ shushi Baraka dui ndo akawotɛ ate: ‘Jehowa kata ate: “Ɔsa apami 10 000 kele owalɔmbɔlɛ lo Dikona dia Tabɔra. Dimi layokokimwela Sisɛra lɛkɔ. Ndo Dimi layokosha otshumba lâdiko dia nde l’alembe ande.”’
Baraka akatɛ Dɛbɔra ate: ‘Dimi layotshɔ naka ndo wɛ ntshɔ lami.’ Dɛbɔra akôtshindɛ, koko nde akawotɛ ate: ‘Wɛ hatonga la lokumu l’otshumba nɛ dia Jehowa ayokimɔ Sisɛra l’anya wa omoto.’ Ko dikambo sɔ diakasalema.
Baraka akaholɔ oma lo Dikona dia Tabɔra dia tohomana l’asalayi wa Sisɛra. Jehowa akasale elola ka mamba lo shashimoya ko asalayi w’atunyi efula wakavu. Koko Sisɛra akafumbɔ oma lo pusupusu kande ko nde ndawɔ.
L’ɔkɔngɔ wa tshanda mɔtshi, Sisɛra akakome polo ndo lo luudu la dipɛma laki Jaɛlɛ. Nde akawelɛ lɔkɔ ndo akawosha abɛlɛ. Abɛlɛ akɔ akawosha djɔ ko nde akalale esadi eto. Ko Jaɛlɛ akɔsɛ otamba a sɔdi wa luudu la dipɛma ko nde kɔkɔmɛ lo lohakatui la pami kakɔ ka kɔlɔ. L’ɔkɔngɔ diko, lam’akaye Baraka, nde akawɛnya odo wa Sisɛra! Ɔnkɔnɛ wɛ ambɛna dia Dɛbɔra kombuta kashi!
L’ɔkɔngɔ diko, nkumekanga Jabina akadiakema ndo nde, ko Ase Isariyɛlɛ wakonge tshanda lo wɔladi.
Embadi 2:14-22; 4:1-24; 5:1-31.