ƆKƆNDƆ 52
Ngidiyɔna l’anto ande 300
WƐ EKƆ lo mɛna dikambo diatomba lanɛ? Alembe wa ta anɛ tshɛ wekɔ Ase Isariyɛlɛ. Apami wokusami la kɛtɛ ango wekɔ lo nnɔ ashi. Shushi Ngidiyɔna ongo emadi suke lawɔ. Nde ekɔ lo menda woho wanɔwɔ ashi.
Tênde otshikitanelo wele l’asa asalayi ango lo woho wanɔwɔ ashi. Asato wekɔ lo nnɔ dungi loka l’ashi. Koko ɔtɔi ekɔ lo mbɔsa ashi l’ɔsa lo lonya, dia nde mendaka kɛnɛ keta suke lande. Ekɔ ohomba efula, nɛ dia Jehowa akatɛ Ngidiyɔna dia nde mbɔsa paka wanɛ wayɔnɔ ashi la yewo. Akina Nzambi akate dia mbakaloya lawakawɔ. Tênde lande na.
Ase Isariyɛlɛ wakayala nto l’ɔhɛnyɔhɛnyɔ. Dikambo dia vɔ kondjelaka awui wa Jehowa. Ase Midiyana wakâsoyaka ndo wakâkonyaka lo shɔkɔ y’efula lo pandjola wodja vwa. Omalɔkɔ, Ase Isariyɛlɛ wakalelɛ Jehowa dia nde mbakimanyiya, ko nde akoke alelo awɔ.
Jehowa akatɛ Ngidiyɔna dia nde tshumanya alembe, ko nde akatshumanya alembe 32 000. Koko alembe wakaye dia ndjɔlɔsha Isariyɛlɛ waki 135 000. Koko Jehowa akatɛ Ngidiyɔna ate: ‘Anto ayɛ wamboleka efula.’ Lande na akate Jehowa ɔsɔku na?
Nɛ dia naka Ase Isariyɛlɛ monga efula, vɔ mbeyaka ndjɔfɔnya ɔnɛ oma l’efula kawɔ mbodjiwɔ otshumba lo ta. Vɔ mbeyaka ndjokana ɔnɛ kana Jehowa kombakimanyiya dia nɛmbia ta. Omalɔkɔ, Jehowa akatɛ Ngidiyɔna ate: ‘Tɛ anto tshɛ wôka wɔma wakalole la wakawɔ.’ Lam’akawatɛ Ngidiyɔna ɔsɔku, alembe 22 000 wakakalola la wakawɔ. Nde akatshikala paka l’anto 10 000 ato dia ndɔshana l’asalayi 135 000.
Koko Jehowa akawotɛ nto ate: ‘Longa! Wɛ eke l’anto efula.’ Omalɔkɔ, nde akatɛ Ngidiyɔna dia nde nɔsha anto akɔ ashi ndo kaloya wanɛ tshɛ wayɔnɔ dungi loka l’ashi. Jehowa akôlake ate: ‘Dimi layokosha otshumba l’anto 300, wanɛ wanɔ ashi la yewo.’
Lushi la ndɔ ta lakakoke. Ngidiyɔna akâtola anto ande 300 l’elui esato. Nde akasha onto l’onto dimama diande ndo ohonde la fuki ya dja l’etei. L’atei a deke, vɔ tshɛ wakadinge pango k’asalayi w’atunyi. Ko lo wonya ɔmɔtshi, vɔ tshɛ, mbala kakɔ ɔtɔi, wakade amama awɔ, wakôle ehonde awɔ ndo wakade ekoko vate: ‘Yɔmbɔ yaki Jehowa la ya Ngidiyɔna!’ Andɔshi kam’akawoke ɔsɔku, wakakashimɔ ndo wakandama la wɔma efula. Vɔ tshɛ wakalawɔ ko Isariyɛlɛ akadje otshumba.