ƆKƆNDƆ 53
Daka dia Jɛfɛta
WƐ ATASALAKA daka dimɔtshi ko ndjɛna l’ɔkɔngɔ ɔnɛ ekɔ wolo dikotsha? Pami kele l’osato kɛnɛ akasale dui sɔ, diakɔ ndo diende la lonyangu. Pami kakɔ aki shushi l’Isariyɛlɛ, lokombo lande laki Jɛfɛta.
Jɛfɛta akikɔ lo nshi yakayotonaka Ase Isariyɛlɛ tɛmɔla Jehowa. Vɔ wakatatɛ sala kɔlɔ nto. Omalɔkɔ, Jehowa akâtshike dia vɔ soyama l’anya w’Ase Amɔna. Lo fɔnu kawɔ, Ase Isariyɛlɛ wakalelɛ Jehowa vate: ‘Takakosalɛ pɛkato nto. Lam’alangɛ ototsha!’
Anto wakanyange dikambo dia kɔlɔ yawɔ yakawasale. Dia vɔ mɛnya tshumu kawɔ, vɔ wakatatɛ tɛmɔla Jehowa nto. Ko Jehowa akakimanyiya nto.
Jɛfɛta akasɔnama oma le anto dia nde ndɔshana l’Ase Amɔna wa kɔlɔ. Jɛfɛta akalangaka dia Jehowa mbokimanyiya lo ta. Omalɔkɔ mbakandalake Jehowa ate: ‘Naka wɛ ayombisha otshumba le Ase Amɔna, kete dimi layokosha onto la ntondo layotomba oma lo luudu lami dia ndjohomana ami lam’ayomokalola mâtodja otshumba.’
Jehowa akôke daka dia Jɛfɛta, ko nde akokimanyiya dia nde mbidja otshumba lo ta. Wɛ mbeyaka onto la ntondo lakaye la ndjohomana la Jɛfɛta etena kakandakalola lakande? Aki ɔnande la omoto, tshɔi yakɔ y’ɔna. Jɛfɛta akade koko ate: ‘Ai ɔnami! Wɛ ambosongotola, ambokitsha balakata. Dimi lakasale daka le Jehowa ko halakoke kalola ɛkɔngɔkɔngɔ.’
Lam’akôke ɔn’aki Jɛfɛta lo dikambo diakɔna diakasale she daka, ndo nde lawɔ akanyangi ntondo. Kɛdikɛdi nde akahombe tshika she l’asekande. Nde aki la dia têtsha nshi tshɛ ya lɔsɛnɔ lande yakôtshikalɛ lo kambɛ Jehowa lo luudu lande la Shilo. Koko nde akatɛ she ate: ‘Naka wɛ akasale daka le Jehowa, kete wɛ pombaka dikotsha.’
Ɔnkɔnɛ, ɔn’aki Jɛfɛta la omoto akatshu la Shilo diatokambɛka Jehowa lo tabɛrnakɛlɛ kande nshi tshɛ ya lɔsɛnɔ lande. Ɛnɔnyi tshɛ, amato w’Isariyɛlɛ wakatshɔka dia towênda ndo wakangɛnangɛnaka kâmɛ lande nshi nyɛi y’etondo. Anto wakalangaka ɔn’aki Jɛfɛta nɛ dia nde aki okambi wa Jehowa w’ɔlɔlɔ efula.