ƆKƆNDƆ 54
Pami kakaleke anto tshɛ wolo
ONDE wɛ mbeyaka pami kakaleke anto tshɛ wolo l’andja w’otondo? Nde aki shushi, lokombo lande Samisɔna. Jehowa mbakashaka Samisɔna wolo. Ntondo ka nde mbotɔ, Jehowa akatɛ nyango ate: ‘Kem’edja wɛ ayokondja ɔna pami. Nde kayoyotsha Isariyɛlɛ oma l’anya w’Ase Filistiya.’
Ase Filistiya waki anto wa kɔlɔ wakadjasɛka la Kanana. Vɔ waki l’alembe efula ndo wakasoya Ase Isariyɛlɛ heyama. Lushi lɔmɔtshi, lam’akatatshɔka Samisɔna tshalaka Ase Filistiya, nde akahomana la kimbwe ayakungola oya le nde. Samisɔna akakidiake l’anya. Nde akadiake ndo Ase Filistiya nkama la nkama.
Ko l’ɔkɔngɔ Samisɔna akayolangaka omoto ɔmɔtshi lakawelɛka Delila. Ewandji w’Ase Filistiya wakôlake dia vɔ mbosha onto l’onto ekenga 1 100 w’akuta naka nde mbatɛ oma lɛnɛ akayaka wolo wa Samisɔna. Delila aki la mposa k’akuta asɔ tshɛ. Nde kondjala ɔngɛnyi a mɛtɛ wa Samisɔna, kânga w’anto wa Nzambi. Ɔnkɔnɛ, nshi tshɛ nde akɛnyaka Samisɔna pâ la mombola oma lɛnɛ akayaka wolo ande.
L’ɔkɔngɔ diko, Samisɔna akayotɛka Delila sheke ya wolo ande. Nde akawotɛ ate: ‘Divo diami diatanyamaka ndoko lushi. Lakasɔnama oma le Nzambi mako otema dia ndjâla okambi ande wa laande wetawɔ ɔnɛ: Okidiami. Naka vɔ minyami divo, kete Dimi shisha wolo ami tshɛ.’
Lam’akôke Delila ɔsɔku, nde akalasha Samisɔna djo lo dihɛlɔ diande. Ko nde akete pami kɛmɔtshi dia ndjowonya divo. Lam’akemɔ Samisɔna, nde kondjala la wolo nto. Ase Filistiya wakaye, wakayowonda. Vɔ wakôtondola asho akɔ ahende ndo wakôkonya fumbe kawɔ.
Lushi lɔmɔtshi, Ase Filistiya wakonge la difɛstɔ dia woke dia tɛmɔla jambizambi yawɔ yakawelɛka Dangɔna, ko vɔ wakatotondja Samisɔna oma lo lokanu dia ndjowaɔdja. Ko tete le divo dia Samisɔna diambotomba nto. Samisɔna akatɛ dikɛnda dia pami diakatawokimɛka lo lonya ate: ‘Otshike munande dikundji diokime luudu.’ Ko Samisɔna akalɔmbɛ Jehowa wolo okime dikundji diakɔ. Nde akate la wolo ate: ‘Otshike mvu l’Ase Filistiya.’ Ase Filistiya waki 3 000 lo difɛstɔ diakɔ, ko etena kakandatshindjiya dikundji diakɔ la wolo, luudu lakanyukɔnɛ ndo lakadiake anto wa kɔlɔ asɔ tshɛ.