ƆKƆNDƆ 57

Nzambi ambɔsɔna Davidi

ONDE wɛ ekɔ lo mɛna kɛnɛ kakatumbi lanɛ? Dikɛnda dia pami ndo mala mbitsha yana y’ɔkɔkɔ oma l’onyɔ wa tambwɛ. Tambwɛ akaye ko akayonda yana y’ɔkɔkɔ dia tɔ̂lɛ. Koko, dikɛnda dia pami akayelana atɔ, ko nde akatotshaka yana y’ɔkɔkɔ oma l’onyɔ wa tambwɛ kakɔ. Ko lam’akatɔmbɔkɔ tambwɛ kakɔ, tɔ kakemala elongolongo, koko dikɛnda dia pami akakidiake! Mbala kekina nde akatsha ɔkɔkɔ ɔmɔtshi oma l’onyɔ wa kimbwe. Shi dikɛnda dia pami sɔ kombokaka wɔma? Wɛ mbeyaka lokombo lande?

Toko ɔlɔngɔlɔngɔ Davidi. Nde akadjasɛka l’osomba wa Bɛtɛlɛhɛma. Ɔbɛdɛ mbaki tshɛnde, ɔn’aki Ruta nde la Boaza. Wɛ akawaôhɔ ondo? She Davidi lokombo lande Jɛse. Davidi akalamaka ɛkɔkɔ wa she. Davidi akayotɔka ɛnɔnyi dikumi l’ɔkɔngɔ wa Jehowa sɔna Saulo dia nde ndjâla nkumekanga.

Lushi lɔmɔtshi, Jehowa akatɛ Samuɛlɛ ate: ‘Ɔsa esɔ ka woho wa lânde kele tshɔka otsha laka Jɛse la Bɛtɛlɛhɛma. Dimi lamboshila sɔna ɔnande ɔmɔtshi la pami dia nde ndjâla nkumekanga.’ Samuɛlɛ lam’akandɛnyi Eliyabɛ, ɔn’aki Jɛse l’enondo, nde akate l’otema ate: ‘Ekɔ paka nde mbakasɔnɔla Jehowa.’ Koko Jehowa akawotɛ ate: ‘Tendake elungi kande la diema diande. Dimi kombɔsɔna dia nde ndjâla nkumekanga.’

Ɔnkɔnɛ, Jɛse akelɛ Abinadaba, ɔnande la pami ndo akawɛnya Samuɛlɛ. Koko Samuɛlɛ akate ate: ‘Kema, ndo nde, Jehowa kombɔsɔna.’ Ko Jɛse akawɛnya Shama, ɔnande la pami. Samuɛlɛ akate ate: ‘Kema, Jehowa kombɔsɔna ndo nde.’ Jɛse akɛnya Samuɛlɛ anande w’apami esambele, koko Jehowa kɔsɔna ndoko ɔtɔi l’atei awɔ. Ko Samuɛlɛ akawombola ate: ‘Anayɛ w’apami tshɛ kɛnɛ?’

Jɛse akawotɛ ate: ‘Ambotshikala la kose, koko nde ekɔ lo nama ɛkɔkɔ.’ Lam’akawela Davidi, Samuɛlɛ akɛnyi dia nde aki dikɛnda dia pami di’ɔlɔlɔ lo asho. Jehowa akawotɛ ate: ‘Nde ongo, tɛ̂nde esɔ.’ Ko Samuɛlɛ akasale ɔsɔku. Etena kayokoka lam’ayokoma Davidi nkumekanga k’Isariyɛlɛ.

1 Samuele 17:​34, 35; 16:​1-13.