ƆKƆNDƆ 60
Abingayɛlɛ la Davidi
ONDE wɛ mbeyaka omoto la dimɛna layaye dia ndjohomana la Davidi ongo? Lokombo lande Abingayɛlɛ. Nde aki tshundju efula ndo akashimbe Davidi di’aha nde sala dikambo dia kɔlɔ. Koko ntondo ka sho mbeya dikambo sɔ, totokênda kɛnɛ kakakomɛ Davidi.
L’ɔkɔngɔ a Davidi ndawɔ Saulo, nde akatɔlamaka lo wôko ɔmɔtshi wa dive. Anango l’ase nkumbo kande tshɛ wakôyele lɛkɔ. Yɛdikɔ y’apami oko 400 wakaye le nde, ko Davidi akayala ɔnɔmbɔdi awɔ. Davidi akatshu le nkumekanga ka Mɔaba akatowotɛka ate: ‘Lam’alangɛ etawɔ dia papa la mama mbidjasɛ kâmɛ layɛ edja ndo lambeya kɛnɛ kayokomɛ.’ L’ɔkɔngɔ diko Davidi nde l’anto ande wakatɔlamaka l’akona.
L’ɔkɔngɔ w’akambo asɔ mbakayohomanaka Davidi l’Abingayɛlɛ. Omɛnde le Nabala aki kanga ɔngɔnyi wa mamba. Nde aki l’ɛkɔkɔ 3000 la mbudi 1000. Nabala aki pami ka kɔlɔ. Koko wadiɛnde le Abingayɛlɛ aki dimɛna hakoke. Ndo nto, nde akêyaka woho wa sala kɛnɛ kele ɔlɔlɔ. Lushi lɔmɔtshi nde akatsha nkumbo kande. Ɛsɔ tênde woho akɔna.
Davidi nde l’anto ande wakasalɛ Nabala ɔlɔlɔ efula. Vɔ wakolamɛ ɛkɔkɔ ande. Omalɔkɔ, lushi lɔmɔtshi Davidi akatome apami ande amɔtshi dia tɔlɔmba Nabala ekimanyielo. Apami akɔ wakakome le Nabala etena kakawahembolaka nde l’anto ande diɔsa di’ɛkɔkɔ. Aki lushi la difɛstɔ, ndo Nabala aki la diangɔ efula dia ndɛ. Ko anto wa Davidi wakawotɛ vate: ‘Sho takakosalɛ ɔlɔlɔ. Sho kokova ndoko ɔkɔkɔ, koko takakokimanyiya lo kolamɛkawɔ. Lam’alangɛ, otosha ndo wɛ lawɔ yema ya mbo ya ndɛ.’
Nabala akawatɛ ate: ‘Dimi hakoke kimɔ diangɔ diami dia ndɛ le anto wele oko nyu.’ Nde akatɛkɛta akambo efula lo woho wa kɔlɔ lo lokombo la Davidi. Lam’akakalola apami akɔ, vɔ wakewoya Davidi awui akɔ ko nde akomala efula. Nde akatɛ anto ande ate: ‘Nyɔsɔmɛ tɔ̂mbɔ tanyu!’ Ko vɔ wakatshu tshala todiaka Nabala l’anto ande.
Ɔmɔtshi a l’atei w’anto wa Nabala lakôke ɛtɛkɛta wa kɔlɔ wakandatɛkɛta, akatotɛka Abingayɛlɛ kɛnɛ kakatombe. Abingayɛlɛ akɔshi diangɔ dia ndɛ esadi esadi. Nde akadiahɛ lâdiko dia ponda ko nde kimɛ lɔkɛndɔ. Lam’akandahomana la Davidi, nde akaholɔ oma lo ponda kande, akake adwe ndo akate ate: ‘Lambokɔsɛngasɛnga, nkumɛmi todjake omɛmi Nabala yimba. Nde ekɔ enginya, ndo nde salaka paka akambo w’enginya. Oshasha vɔ ɔnɛ. Lam’alangɛ longolawɔ ndo otodimanyiya lo kɛnɛ kakatombe.’
Davidi akôkadimola ate: ‘Wɛ ekɔ omoto lele la lomba. Wɛ amboshimba dia dimi ndjaka Nabala dia kɔlɔ kande. Kalola la ngelo la wɔladi.’ L’ɔkɔngɔ diko, lam’akavu Nabala, Abingayɛlɛ akayokomaka wadi aki Davidi.