ƆKƆNDƆ 61

Davidi aya Nkumekanga

SAULO akayange dia munda Davidi nto. Nde akɔsɛ asalayi ande w’eshika 3 000 ko nde ntshɔ la tayanganaka lande. Lam’akôke Davidi dikambo sɔ, nde akatome atɔpi dia teya lɛnɛ akahange Saulo l’otsho. Ko Davidi akambola apami ahende a l’atei w’anto ande ate: ‘Alanga ntshɔ lami lo pango ka Saulo na?’

Ko Abishayi akakadimola ate: ‘Dimi!’ Abishayi aki ɔn’aki Zeruya, kadiyɛnde la Davidi. Davidi l’Abishayi wakɔtɔ ɔkɔkɛ ɔkɔkɛ lo pango, lâsɔ ko Saulo l’anto ande wakaladi djɔ. Vɔ wakatɔngɔna dikɔnga diaki Saulo l’ekutshu kande k’ashi kakawakitsha lasuke l’ɔtɛ ande. Ndoko onto lakôke kânga lakawaɛnyi nɛ dia vɔ tshɛ waki lo djɔ.

Hɛnyi Davidi nde la Abishayi. Vɔ wakɔ̂mɔsɔ wakalawɔ la shɔdi ya dikona dimɔtshi. Ko Davidi akawelɛ owandji w’alembe w’Isariyɛlɛ ate: ‘Abinɛrɛ, lande na kahayalame nkumɛyɛ, nkumekanga na? Ohênda! Lende ele dikɔnga diande l’ekutshu kande k’ashi na?’

Saulo akêmɔ. Nde akeye dui diaki Davidi ndo akambola ate: ‘Davidi, wɛ ɔsɔ?’ Wɛ hɛnyi Saulo l’Abinɛrɛ l’ɛse lango?

Davidi akate ate: ‘Eelo, nkumɛmi, nkumekanga.’ Ko Davidi akawombola ate: ‘Lande na katayayange dia mundami na? Kɔlɔ kakɔna kakamasale na? Nkumekanga lee, dikɔnga diayɛ diɔ nɛ. Toma onto ayɛ ɔmɔtshi ayokɔ̂sɛdiɔ.’

Saulo akasuya ate: ‘Dimi lakasale kɔlɔ. Dimi lakasale akambo w’enginya.’ Ko Davidi akatshu lo mboka kande, ndo Saulo akakalola la ngelo. Koko Davidi akate ndamɛ l’otema ate: ‘Saulo ayondjaka lushi lɔmɔtshi. Dimi pombaka ndawɔ dia tɔ̂lama lo wodja w’Ase Filistiya.’ Ko nde akasale ɔsɔku. Davidi akakese Ase Filistiya ate: laya kakianɛ lo wedi anyu.

L’ɔkɔngɔ a nshi mɔtshi, Ase Filistiya wakatshu dia tɔlɔsha Isariyɛlɛ nto. Saulo nde la Jɔnata wakavu lo ta diakɔ. Dikambo sɔ diakanyangiya Davidi efula, ko nde akafunde lembo la dimɛna efula lakandataka lɔkɔ ate: ‘Dimi lekɔ la lɔkɔnyɔ lo dikambo diayɛ, ɔnalengo Jɔnata. Ande woho wakamakolangaka lee!’

L’ɔkɔngɔ a dikambo sɔ Davidi akakalola l’Isariyɛlɛ l’osomba wa Hɛbɛrɔna. Ta diakayala l’asa anto wakasɔnɛ ɔn’aki Saulo le Ishi-Bɔshɛtɛ dia nde ndjâla nkumekanga la anto akina wakalangaka dia Davidi ndjâla nkumekanga. Koko anto wa Davidi wakadje otshumba. Davidi aki l’ɛnɔnyi 30 lam’akandayala nkumekanga. Nde akôlɛ la Hɛbɛrɔna ɛnɔnyi esambele l’etenyi. Nde akatôtshi ana amɔtshi w’apami lɛkɔ, kombo yawɔ: Amɔna, Abisalɔmɔ la Adonidja.

Etena kakakoke ko Davidi l’anto ande wakatshu dia tɔhɔtɔla osomba wa dimɛna wakawelɛka Jerusalɛma. Jɔaba ɔna okina laki kadiyɛnde la Davidi le Zeruya mbakalɔmbɔla ta. Ko Davidi akawodje owandji w’alembe ande oko difuto diande. Ɔnkɔnɛ Davidi akatatɛ la mbolɛ l’osomba wa Jerusalɛma.

1 Samuele 26:​1-25; 27:​1-7; 31:​1-6; 2 Samuele 1:26; 3:​1-21; 5:​1-10; 1 Ekondo 11:​1-9.