ƆKƆNDƆ 62
Mpokoso lo luudu la Davidi
L’ƆKƆNGƆ wa Davidi tatɛ la mbolɛ la Jerusalɛma, Jehowa akasha alembe ande etshumba efula lâdiko di’atunyi awɔ. Jehowa akalake Ase Isariyɛlɛ dia mbasha kɛtɛ ya Kanana. Ko kakianɛ oma l’ekimanyielo ka Jehowa, kɛtɛ tshɛ kakalakema kakayokoma kawɔ.
Davidi aki nkumekanga k’ɔlɔlɔ. Nde akalangaka Jehowa. Ɔnkɔnɛ ɛngɔ ka ntondo kakandasale l’ɔkɔngɔ wa pɔtɔla Jerusalɛma, aki wɛmbɛlɔ w’ɔshɛtɛ wa sheke wa Jehowa oya lɛkɔ. Ndo nde akalange mbika tɛmpɛlɔ dia nde mbidja ɔshɛtɛ akɔ lɔkɔ.
Lam’akatatshundaka Davidi osombe, nde akasale dikambo dia kɔlɔ efula. Davidi akeyaka dia ekɔ kɔlɔ mbɔsa ɛngɔ kakana. Koko la dikɔlɔ dimɔtshi, lam’akinde la diko dia luudu lande, nde akende la kɛtɛ ko akɛnyi omoto l’olangala efula. Lokombo lande aki Batɛsheba, ndo omɛnde aki osalayi ande, lokombo lande Uriya.
Davidi akakɔmiya Batɛsheba efula ko nde akawela oya lo luudu lande. Omɛnde akatshu lo ta. Davidi akalangana lande ko l’ɔkɔngɔ diko Batɛsheba akayɛnaka dia nde ambotshɔ diemi. Davidi akakiyana efula ko nde akatome dui le Jɔaba, owandji w’alembe ande, dia nde mbidja Uriya lo dihole dioleki ta wolo ɔnɛ kele adiakemi. Lam’akavu Uriya, Davidi akayotshukaka Batɛsheba.
Jehowa akoke Davidi kɛlɛ efula. Ko nde akatome okambi ande Natana dia towotɛ pɛkato kande. Wɛ ongo ɛna Natana atɛ Davidi lango. Davidi akayatshumuya efula dia kɛnɛ kakandasale, ɔnkɔnɛ Jehowa kombodiaka. Koko Jehowa akawotɛ ate: ‘Nɛ dia wɛ akasale akambo wa kɔlɔ asɔ, wɛ ayohomɔ mpokoso efula lo luudu layɛ.’ Ko mpokoso kakakomɛ Davidi!
Ntondo, ɔna pami lakôte Batɛsheba akavu. Ko Amɔna, ɔn’aki Davidi l’enondo akande kadiyɛnde le Tamara la wolo ko akeyana lande. Abisalɔmɔ ɔn’aki Davidi la pami akôke kɛlɛ efula dia dikambo sɔ, ko nde akadiake Amɔna. L’ɔkɔngɔ, Abisalɔmɔ akɔshi lemba l’anto lo wedi ande ko nde ndjaetɛ nkumekanga. L’ɔkɔngɔ diko, Davidi akayodja Abisalɔmɔ otshumba lo ta, ko nde akadiakema. Mɛtɛ Davidi akahomɔ mpokoso efula.
L’ɔkɔngɔ a nyɔi k’ɔnande, Batɛsheba akayôtaka ɔna pami lokombo lande Sɔlɔmɔna. Lam’akakome Davidi osombe ndo lam’akandanama la hemɔ, Adɔnidja, ɔnande la pami akahembe ndjaetɛ nkumekanga ndamɛ. Ko Davidi akatɛ ɔlɔmbɛdi ɔmɔtshi wakawelɛka Zadɔka dia nde mbitɛ Sɔlɔmɔna esɔ l’ɔtɛ kele asɔnami dia ndjâla nkumekanga. Kondjâla edja nto, Davidi akavu l’ɛnɔnyi 70. Nde akôlɛ ɛnɔnyi 40, ko Sɔlɔmɔna akayala nkumekanga k’Isariyɛlɛ.
2 Samuele 11:1-27; 12:1-18; 1 Khumi ya Dikanga 1:1-48.