ƆKƆNDƆ 65
Diolelo aiambokahanyema
ONDE wɛ mbeyaka lande na kâta pami kengo okutu ande bɛtshi bɛtshi oka? Jehowa kakawotɛ dia nde sala ngango. Pami kengo ekɔ omvutshi a Nzambi lokombo lande Ahidja. Onde wɛ mbeyaka ele omvutshi? Nde ekɔ onto ɔmɔtshi lalongola awui w’oma le Nzambi dia akambo wayosalema lo nshi yayaye.
Lanɛ Ahidja ekɔ lo tɛkɛta la Jerɔbɔama. Jerɔbɔama aki pami kɛmɔtshi kakalongola ɔkɛndɛ wa namaka elimu ɛmɔtshi wa wokelo oma le Sɔlɔmɔna. Etena kakahomana Ahidja la Jerɔbɔama lo mboka, Ahidja akasale dikambo dia mamba. Nde akakolola okutu ande w’oyoyo wakandalɔtɛ ko nde mbatshatsha lo bɛtshi 12. Ko nde akatɛ Jerɔbɔama ate: ‘Ɔsa bɛtshi 10 wɛmɛmɛ.’ Onde wɛ mbeyaka lande na akandawosha bɛtshi 10?
Ahidja akolembetshiya dia Jehowa ayanga mpɔtɔla diolelo oma l’anya wa Sɔlɔmɔna. Nde akate dia Jehowa ayosha Jerɔbɔama nkumbo 10. Dikambo sɔ nembetshiyaka dia Rɛhɔbɔama, ɔn’aki Sɔlɔmɔna ayôlɛ paka nkumbo hiende tsho.
Lam’akoke Sɔlɔmɔna kɛnɛ kakatɛ Ahidja Jerobɔama, nde akôke kɛlɛ efula. Nde akayange woho wa ndjaka Jerobɔama. Koko Jerobɔama akalawɔ l’Edjibito. Oheta yema ko Sɔlɔmɔna ambovɔ. Nde akôlɛ ɛnɔnyi 40, ko ɔnande Rɛhɔbɔama akayoyala nkumekanga. Jerɔbɔama lakandoke lengo l’Edjibito ɔnɛ: Sɔlɔmɔna ambovɔ, nde akakalola l’Isariyɛlɛ.
Rɛhɔbɔama kondjala nkumekanga k’ɔlɔlɔ. Nde akaleke pɛnyɔla anto oko akasalaka she le Sɔlɔmɔna. Jerɔbɔama l’ewandji ɛmɔtshi ekina wakatshu le Nkumekanga Rɛhɔbɔama dia towotɛ dia nde ndjâla ɔlɔlɔ le anto. Koko Rɛhɔbɔama kombaôkɛ. Nde akanyomɔtɛkɔya ndjâla kɔlɔ. Omalɔkɔ, anto wakadje Jerobɔama nkumekanga lo nkumbo dikumi, koko nkumbo hiende: ka Bɛndjamina la Juda wakalange Rɛhɔbɔama tshikala nkumekanga kawɔ.
Jerobɔama konangaka anto ande ntshɔ la Jerusalɛma dia tɔtɛmɔla lo tɛmpɛlɔ ka Jehowa. Omalɔkɔ, nde akasale ana wa ngɔmbɛ ahende wa paunyi ko nde mbutɛ diolelo dia nkumbo dikumi dia vɔ ndjitɛmɔlaka. Kem’edja kɛtɛ yakalole la diakatanelo ndo akambo w’esehe.
Ndo lo diolelo dia nkumbo-hiende mbaki ekakatanu. L’ɔkɔngɔ wa Rɛhɔbɔama mbolɛ ɛnɔnyi etanu, nkumekanga k’Edjibito akaye dia ndjɔlɔsha Jerusalɛma. Nde akahɔtɔla diangɔ efula diaki lo eombelo ka tɛmpɛlɔ ka Jehowa. Ɔnkɔnɛ tɛmpɛlɔ kotshikala edja lo woho wakitɔ ntondo lam’akawakike.
1 Khumi ya Dikanga 11:26-43; 12:1-33; 14:21-31.