ƆKƆNDƆ 66

Jezabɛlɛ​—⁠nkumekanga ka omoto ka kɔlɔ

L’ƆKƆNGƆ a nyɔi ka Jerɔbɔama, nkumekanga tshɛ kakôlɛ lo diolelo di’Isariyɛlɛ dia ngɛl’a nkushi dia nkumbo 10 aki kɔlɔ. Nkumekanga Ahaba kakaleke kɔlɔ tshɛ. Onde wɛ mbeyaka bonde? Ɔkɔkɔ ɔmɔtshi wa woke aki wadiɛnde, Jezabɛlɛ Nkumekanga ka omoto ka kɔlɔ.

Jezabɛlɛ kondjâla omoto l’Ose Isariyɛlɛ. Nde aki ɔn’aki nkumekanga ka Sidɔna. Nde akatɛmɔlaka Baala, jambizambi ya kashi, ndo nde akakotola Ahaba la Ase Isariyɛlɛ efula l’ɔtɛmwɛlɔ wa Baala. Jezabɛlɛ akahetshaka Jehowa ndo akadiakaka amvutshi ande efula. Akina wakalawɔka lo weoko w’ave di’aha vɔ ndjakema. Naka Jezabɛlɛ ambolanga ɛngɔ kɛmɔtshi nde ayoyanga dia ndjaka onto akɔ ko nde kiɔsa.

Lushi lɔmɔtshi, Nkumekanga Ahaba aki la lonyangu efula. Ko Jezabɛlɛ akawombola ate: ‘Dikambo kona dieyɛ la lonyangu ɛlɔ na?’

Ahaba akôkadimola ate: ‘Dikambo dia kɛnɛ kakambutɛ Nabɔtɛ. Dimi lakalange somba ekambɔ kande ka vinyɔ. Koko nde akambutɛ ɔnɛ: hakosha tɔ.’

Jezabɛlɛ akawotɛ ate: ‘Toyakiyanyake. Dimi layokɔ̂sɛ tɔ.’

Ɔnkɔnɛ Jezabɛlɛ akafunde mikanda otsha le ewandji ɛmɔtshi waki l’osomba wakadjasɛka Nabɔtɛ. Nde akawatɛ ate: ‘Nyɔsɛ anto w’anyanya, nyowate dia vɔ mbuta ɔnɛ: Nabɔtɛ ambɔtɛnga Nzambi la nkumekanga. Kanyotondja Nabɔtɛ l’andja w’osomba kele kanyowoke ave edja ndo nde ambovɔ.’

Kam’akoke Jezabɛlɛ ɔnɛ: Nabɔtɛ ambovɔ, nde akatɛ Ahaba ate: ‘Tshɔkaka tɔshi ekambɔ kande ka vinyɔ.’ Kema wɛ ngɛnangɛnaka dia Jezabɛlɛ kondja dilanya nɛ dia kɔlɔ kakandasale?

Ɔnkɔnɛ, etena kakakoke ko Jehowa akatome Jehu dia towosha dilanya. Lam’akôke Jezabɛlɛ ɔnɛ: Jehu ekɔ lo ndjaye, nde akayasange lo asho ndo akayalongɔsɔla dimɛna efula. Koko etena kakaye Jehu ndo kakandawɛnyi lo didishi, nde akatɛ anto waki lo luudu la nkumekanga ate: ‘Nyowokasha l’ɛse!’ Anto akɔ wakayele dui diande, oko wɛnayɛ l’osato. Vɔ wakawokasha, ko nde akavu. Ekomelo ka Jezabɛlɛ Nkumekanga ka omoto ka kɔlɔ tɔ kɛsɔ.

1 Khumi ya Dikanga 16:​29-33; 18:​1-4; 21:​1-16; 2 Khumi ya Dikanga 9:​30-37.