ƆKƆNDƆ 67

Jehoshafata ambɛkama le Jehowa

ONDE wɛ mbeyaka apami ango ewɔ ndo kakɔna kasalawɔ oka? Vɔ wekɔ lotatshu otsha lo ta, wanɛ wele la ntondo wekɔ lo têmbe. Koko wɛ mbeyaka mumbola w’ate: ‘Dikambo kona diele amembi bû la tɔ̂mbɔ l’akɔnga wa ta na?’ Ɛsɔ tênde dikambo diakɔ.

Jehoshafata aki nkumekanga ka lo diolelo dia nkumbo hiende y’Isariyɛlɛ. Nde akikɔ lo nshi yaki Nkumekanga Ahaba la Jezabɛlɛ lo diolelo dia ngɛl’a nkushi dia nkumbo 10. Koko Jehoshafata aki nkumekanga k’ɔlɔlɔ ndo Asa, she, aki nkumekanga k’ɔlɔlɔ efula. Omalɔkɔ, l’edja k’ɛnɔnyi efula, ase diolelo dia la diko dia nkushi, dia nkumbo hiende, waki la wɔladi ndo la lɔsɛnɔ l’ɔlɔlɔ.

Koko, lushi lɔmɔtshi dikambo dimɔtshi diakatombe diakôtsha anto wɔma efula. Akɛndji wakaye dia ndjotɛ Jehoshafata vate: ‘Olui a woke w’alembe w’oma la Mɔaba l’Amɔna la oma lo Dikona dia Seirɛ wekɔ lo ndjaye dia ndjokɔlɔsha.’ Omalɔkɔ, Ase Isariyɛlɛ efula wakatshumana la Jerusalɛma dia nyanga ekimanyielo ka Jehowa. Vɔ wakatshu lo tɛmpɛlɔ, ko Jehoshafata akatɔlɔmbaka lɛkɔ ate: ‘Jehowa Nzambi kaso lee, sho hateye kɛnɛ kasala. Sho kema la wolo la ntondo k’olui a woke w’alembe ɔsɔ. Sho tekɔ lo mendɛ ekimanyielo le yɛ.’

Jehowa akawaokɛ ko nde akewoya okambi ande ɔmɔtshi dia nde mbutɛ anto ate: ‘Ta kema diakinyu, koko dia Nzambi mbediɔ. Aha nyu mbayɔlɔ. Nyênde tsho, ko nyayɛna woho wayonyoshimbela Jehowa.’

Omalɔkɔ, la wedi a pindju, Jehoshafata akatɛ anto ate: ‘Nyɛkame le Jehowa!’ Ko nde akadje amembi w’esambu la ntondo k’asalayi ande ndo wakatêmbɛka Jehowa esambo. Wɛ mbeyaka kɛnɛ kakatombe etena kakawakome suke la dihole dia ta oka? Jehowa akadje ofukutanu l’asa atunyi, ko vɔ wakalɔshana vɔamɛmɛ. Ko etena kakakome Ase Isariyɛlɛ, vɔ wakatane asalayi w’atunyi tshɛ wakavue!

Shi Jehoshafata aki tshundju lakandɛkama le Jehowa? Tayonga totshundju naka sho mbɛkama ndo sho le nde.

1 Khumi ya Dikanga 22:​41-53; 2 Ekondo 20:​1-30.