ƆKƆNDƆ 70

Jɔna la lose la woke

OHENDA pami kambotambɛ l’ashi kengo. Shi mɛtɛ nde ekɔ lo wâle? Lose longo layanga mbɔmɛna! Onde wɛ mbeyaka pami kakɔ? Lokombo lande Jɔna. Ɛsɔ tênde woho wôkome ekambokambo kengo.

Jɔna aki omvutshi wa Jehowa. Aki yema tshitshɛ l’ɔkɔngɔ a nyɔi k’omvutshi Elisha mbakawotɛ Jehowa ate: ‘Ntshɔka l’osomba a woke wa Niniva. Kɔlɔ k’anto wa lɛkɔ ambotamba olelo ko lekɔ lo nanga wɛ towatɛ dikambo sɔ.’

Koko Jɔna konanga ntshɔ. Omalɔkɔ, nde akɔshi masuwa wakatatshɔka lɛkɛ lokina, koko aha la Niniva. Jehowa kɔngɛnangɛna woho wakatalawɔka Jɔna. Ɔnkɔnɛ nde akatome lɔpɛpɛ la wolo. Aki kɔlɔ efula nɛ dia masuwa akayange dinda. Ase masuwa waki la wɔma efula ko vɔ wakatatɛ ndelɛ tozambizambi tawɔ.

L’ɔkɔngɔ diko, Jɔna akawatɛ ate: ‘Dimi tɛmɔlaka Jehowa, Nzambi kakatonge olongo la kɛtɛ. Dimi lekɔ lo talawɔ di’aha sala kɛnɛ kakambutɛ Jehowa dia sala.’ Ko ase masuwa wakawombola vate: ‘Kakɔna kahombaso kosalɛ dia lɔpɛpɛ lɔnɛ shila na?’

Jɔna akawatɛ ate: ‘Nyotambiya lo ndjale kele ndjale kalɛmbɔhale.’ Ase masuwa konanga sala ɔsɔku, koko lam’ele asuku wakatɛkɔya ndo lɔpɛpɛ la wolo, vɔ wakotambiya l’ashi. Kam’akawotambiya, lɔpɛpɛ lakashile ndo ndjale kakalɛmbɔhala.

Oko akatadindaka Jɔna l’etei k’ashi, lose la woke lakɔ̂mɛnɛ. Koko nde komvɔ. Nde akasale tanyi tosato l’etsho esato l’otema a lose. Jɔna akanyange efula woho wakinde kɔnɛmiya dui dia Jehowa ndo kotshɔ la Niniva. Omalɔkɔ, wɛ mbeyaka kɛnɛ kakandasale?

Jɔna akalɔmbɛ Jehowa dia nde mbokimanyiya. Ko Jehowa akasale dia lose towɔ Jɔna l’okongo. L’ɔkɔngɔ diko, Jɔna akatshu la Niniva. Dikambo sɔ hadiotɛnya dia ekɔ ohomba efula sala kɛnɛ tshɛ katotɛ Jehowa oka?

Dibuku dia Jona.