ƆKƆNDƆ 72

Nzambi ambokimanyiya nkumekanga Hezekiya

ONDE wɛ mbeyaka lande na kalɔmba pami kengo le Jehowa? Dikambo kona diokitshishande mikanda engo la ntondo k’ediakelo ka Jehowa na? Pami kakɔ lokombo lande Hezekiya. Nde aki nkumekanga ka nkumbo hiende y’Isariyɛlɛ ya la diko dia nkushi. Nde aki l’otshutshumalo efula. Dikambo kona?

Dikambo dia alembe w’Ase Asuriya wakalanya, nkumbo dikumi ya lo ngɛl’a nkushi. Jehowa akatshike dia dikambo sɔ salema nɛ dia anto asɔ waki kɔlɔ efula. Ko kakianɛ alembe w’Ase Asuriya wamboya dia ndjɔlɔsha ndo diolelo dia nkumbo hiende.

Nkumekanga ka Asuriya mala toma mikanda le Nkumekanga Hezekiya. Mikanda akɔ engo wokitshishande lango la ntondo ka Nzambi. Lo mikanda akɔ nde aki lo sɔka Jehowa ndo akatɛka Hezekiya dia nde tayakimwe l’anya ande ndamɛmɛ. Diɔ diakɔ dialɔmba Hezekiya ate: ‘Jehowa lee, ototsha oma l’anya wa nkumekanga k’Asuriya. Ko anto tshɛ wayeya vate wɛmɛ oto mbele Nzambi.’ Onde Jehowa akalonge Hezekiya oka?

Hezekiya aki nkumekanga k’ɔlɔlɔ. Nde kondjala oko nkumekanga ya kɔlɔ yaki lo diolelo dia nkumbo dikumi y’Isariyɛlɛ, kânga oko she le Ahaza nkumekanga ka kɔlɔ. Hezekiya akalamaka ɛlɛmbɛ tshɛ wa Jehowa la kiɔmi. Ɔnkɔnɛ, l’ɔkɔngɔ wa Hezekiya shidiya dɔmbɛlɔ, omvutshi Isaya akotomɛ dui nɛ di’oma le Jehowa ate: ‘Nkumekanga k’Asuriya hatɔ̂tɔ lo Jerusalɛma. Ndoko osalayi ande ɔtɔi wayosukana lɛkɔ. Vɔ hawotoka kânga dikɔnga ɔtɔi l’osomba.’

Ohenda osato wele lo lɛkɛ lɔnɛ. Onde wɛ mbeyaka edo w’asalayi ango tshɛ ewɔ? Toko Ase Asuriya. Jehowa akatome ondjelo ande, ko l’otsho ɔtɔi nde akadiake asalayi w’Ase Asuriya 185 000. Ɔnkɔnɛ nkumekanga k’Asuriya akahekɔ, akakalola lakande.

Diolelo dia nkumbo hiende diakashimbamela ko, anto wakayala lo wɔladi tshanda. Ko l’ɔkɔngɔ a nyɔi ka Hezekiya, ɔnande le Manase akayala nkumekanga. Manase kâmɛ ndo ɔnande Amɔna lakokite waki vɔ tshɛ nkumi ya dikanga ya kɔlɔ. Ko kɛtɛ kakalole nto la diakatanelo ndo l’esehe. Etena kakadiakema Nkumekanga Amɔna oma le okambi ande ɔmɔtshi, ɔnande le Josiya akɔhɛnɛ oko nkumekanga lo diolelo dia nkumbo hiende.

2 Khumi ya Dikanga 18:​1-36; 19:​1-37; 21:​1-25.