ƆKƆNDƆ 74

Pami kaki kombokaka wɔma

ENDA anto ango woho wɔlawɔ ɔlɔngɔ a pami ongo. Onde wɛ mbêyaka ondo? Toko Jeremiya. Nde aki omvutshi a woke wa Nzambi.

Kondjala edja l’ɔkɔngɔ wa Nkumekanga Josiya nanya pingo yaki lo wodja, mbakatɛ Jehowa Jeremiya dia nde ndjâla omvutshi Ande. Koko, Jeremiya akɛnaka dia nde eke dikɛnda efula dia ndjâla omvutshi. Ko Jehowa akawotɛ dia nde ayowokimanyiya.

Jeremiya akatɛ Ase Isariyɛlɛ dia vɔ tshika sala akambo wa kɔlɔ. Nde akawatɛ ate: ‘Tozambizambi tatɛmɔla ase wedja tekɔ ta kashi.’ Koko Ase Isariyɛlɛ efula wakalangaka ɔtɛmwɛlɔ wa pingo lo dihole dia tɛmɔla Jehowa, Nzambi ka mɛtɛ. Etena kakawatela Jeremiya dia Nzambi ayowasha dilanya nɛ dia kɔlɔ yawɔ, vɔ wakawɔlɛ hakoke.

Ɛnɔnyi wakete. Josiya akayovɔka, ko l’ɔkɔngɔ a ngɔndɔ shato, Jehoyakima, ɔnande akokite. Jeremiya akatetemala mbutɛ anto ate: ‘Jerusalɛma ayolanyema naka nyu hanyotshikitanya lɔkɛwɔ lanyu la kɔlɔ.’ Ɛlɔmbɛdi wakoke Jeremiya kɛlɛ ko vɔ mbonda wawotɛ vate: ‘Wɛ pombaka diakema nɛ dia akambo wotshiyɛ.’ Wakatotɛka ndo ɛlɔhɛ vate: ‘Jeremiya pombaka diakema nɛ dia nde ambɔtɛkɛta akambo wa kɔlɔ lo lokombo l’osomba aso.’

Jeremiya akandahombe sala na? Nde komboka wɔma. Nde akawatɛ vɔ tshɛ ate: ‘Jehowa mbakatome dia ndjonyotɛ awui asɔ. Naka nyu hanyotshikitanyisha lɔkɛwɔ lanyu la kɔlɔ, kete Jehowa ayolanya Jerusalɛma. Koko nyeye dia: Naka nyu ndjakami, kete nyayodiaka onto laha l’onongo.’

Ɛlɔhɛ wakatshike Jeremiya la lɔsɛnɔ, koko Ase Isariyɛlɛ kotshikitanya lɔkɛwɔ lawɔ la kɔlɔ. L’ɔkɔngɔ diko, Nebukadineza, nkumekanga ka Babilɔna akaye dia ndjɔlɔsha Jerusalɛma. Nebukadineza akayetɛka Ase Isariyɛlɛ ekambi ande. Nde akatshu la nunu di’anto otsha la Babilɔna. Ohokanyiya nganɛ wayoyonga naka wambokɔtɔla la wolo lo wodja weyɛ heye!

Jeremiya 1:​1-8; 10:​1-5; 26:​1-16; 2 Khumi ya Dikanga 24:​1-17.