ƆKƆNDƆ 76

Jerusalɛma ambolanyema

AKETE ɛnɔnyi ndekana dikumi tamba lam’akatɔlɛ Nkumekanga Nebukadineza Ase Isariyɛlɛ wakaleke mbeya mukanda otsha la Babilɔna. Ko kakianɛ, ohênda kɛnɛ kambotomba! Jerusalɛma yambotshumbama. Ndo Ase Isariyɛlɛ waki kodiakema wambondama oko ase lokanu otsha la Babilɔna.

Ohɔ dikambo diakate omvutshi wa Jehowa diakahombe tomba naka anto hawotshikitanyisha lɔkɛwɔ lawɔ la kɔlɔ. Koko Ase Isariyɛlɛ kononga awui w’amvutshi. Vɔ wakatetemala la tɛmɔla tozambizambi ta kashi lo dihole dia tɛmɔla Jehowa. Ɔnkɔnɛ anto wakahombe kondja dilanya. Sho dieyaka nɛ dia Ezekiyɛlɛ, omvutshi a Nzambi, ekɔ lo tɔkɔndɔlɛ akambo tshɛ wa kɔlɔ wakasalaka Ase Isariyɛlɛ lo nshi shɔ.

Wɛ mbeyaka Ezekiyɛlɛ akinde? Nde aki l’ɔnɔngɔ w’ɛlɔngɔlɔngɔ wakɛmbɛ Nkumekanga Nebukadineza otsha la Babilɔna ambeta ɛnɔnyi ndekana 10 la ntondo k’elanyelo ka woke ka Jerusalɛma. L’etena kakɔ mbakɛmbama ndo Danyɛlɛ l’angɛnyi ande asato, Shadarakɛ, Meshakɛ la Abɛdɛ-Nengo.

Lâsɔ ko Ezekiyɛlɛ eke lɛkɔ la Babilɔna mbakawɛnya Jehowa akambo wa kɔlɔ waki lo salema la Jerusalɛma lo tɛmpɛlɔ. Jehowa akawɛnya akambo akɔ lo dihindo. Ezekiyɛlɛ aki mɛtɛ la Babilɔna koko Jehowa akawɛnya akambo tshɛ waki lo salema lo tɛmpɛlɔ. Kɛnɛ kakɛnyi Ezekiyɛlɛ kaki kɔlɔ efula!

Jehowa akatɛ Ezekiyɛlɛ ate: ‘Ohênda akambo wa wɔnɔnyi wasala anto lanɛ lo tɛmpɛlɔ. Ohênda dihele woho wambodiolola l’esato w’elui la nyama kina. Ndo, ohênda Ase Isariyɛlɛ woho watɛmɔlawɔ esato akɔ!’ Ezekiyɛlɛ akɛnyi diangɔ diakɔ ndo akafunde kɛnɛ tshɛ kaki lo salema.

Jehowa akambola Ezekiyɛlɛ ate: ‘Wɛ ekɔ lo mɛna kɛnɛ kasala ɛnɔmbɔdi w’Ase Isariyɛlɛ lo woshɛshɛ?’ Eelo nde akɛnaka tshɛ. Lɛkɔ apami 70 waki lo tɛmɔla tozambizambi ta kashi vɔ tshɛ. Vɔ waki lo mbuta vate: ‘Jehowa hatɛnyi. Nde ambônɔka oma lo wodja.’

Ko Jehowa akɛnya Ezekiyɛlɛ amato amɔtshi lo soko dia tɛmpɛlɔ dia lo ngɛl’a nkushi. Wodjashi lâwɔ watɛmɔla Tamuza, jambizambi ya kashi. Ndo ohênda apami amɔtshi lo mbɔtwɛlɔ ka tɛmpɛlɔ ka Jehowa! Vɔ waki oko yɛdikɔ ya 25. Ezekiyɛlɛ akawaɛnyi. Vɔ waki lo mbika adwe otsha l’ehotwelo watɛmɔla wonya!

Jehowa akawotɛ ate: ‘Anto ango hawɔnɛmiya. Vɔ hawosale paka akambo wa kɔlɔ ato koko wekɔ lo ndja la ndjâsala polo ndo lo tɛmpɛlɔ kami!’ Ɔnkɔnɛ Jehowa akalake ate: ‘Vɔ wayoka wotsho wa kɛlɛ kami. Ndo hatowaoka kɛtshi lam’ayowolanyema.’

Akete paka ɛnɔnyi oko esato l’ɔkɔngɔ wa Jehowa mɛnya Ezekiyɛlɛ akambo akɔ mbakatɔmbɔkwɛ Ase Isariyɛlɛ Nebukadineza. Omalɔkɔ, nde akaye dia ndjalɔsha. L’ɔkɔngɔ w’ɔnɔnyi l’etenyi, Ase Babilɔna wakatondola pele dia Jerusalɛma ndo wakatshumbe osomba. Anto efula wakadiakema kana mundama oko ase lokanu otsha la Babilɔna.

Lande na aketawɔ Jehowa dia elanyelo ka woke ka ngasɔ salema le Ase Isariyɛlɛ na? Eelo, nɛ dia vɔ kombokɛ Jehowa ndo kondjela ɛlɛmbɛ ande. Dikambo sɔ diekɔ lo tɛnya ohomba wa salaka nshi tshɛ kɛnɛ kata Nzambi.

Ntondo yema y’anto tshitshɛ tsho mbakatshikala lo wodja w’Isariyɛlɛ. Nkumekanga Nebukadineza akadje Ose Juda lakawelɛka Ngedaliya oko owandji w’anto asɔ. Koko Ase Isariyɛlɛ amɔtshi wakayodiakaka Ngedaliya. Anto wakoke wɔma ɔnɛ Ase Babilɔna watokoya ko ndjâlanya vɔ tshɛ nɛ dia dikambo dia kɔlɔ sɔ diakasalema. Ɔnkɔnɛ vɔ wakatshutshuya Jeremiya dia nde ndawɔ kâmɛ lawɔ otsha l’Edjibito.

Ko wodja w’Isariyɛlɛ akatshikala ndoko onto. Ndoko onto lakadjasɛ lɔkɔ ɛnɔnyi 70 w’etondo. Wodja akatshikala paka tɔngɔ to. Koko Jehowa akalake ɔnɛ l’ɔkɔngɔ w’ɛnɔnyi 70, nde ayokaloya anto ande lo wodja. Ko l’edja k’ɛnɔnyi ɛsɔ, kakɔna kakatotombɛ anto a Nzambi lo wodja wa Babilɔna lɛnɛ akawatɔlama na? Ɛsɔ tênde.

2 Khumi ya Dikanga 25:​1-26; Jeremiya 29:10; Ezekiyele 1:​1-3; 8:​1-18.