ƆKƆNDƆ 82

Mɔrɔdekai la Ɛsta

TOKALOLE yema l’ɛnɔnyi ɛmɔtshi la ntondo ka Ɛzɛra ntshɔ otsha la Jerusalɛma. Mɔrɔdekai la Ɛsta mbaki Ase Isariyɛlɛ wakaleke ndjâla anto wa weke lo diolelo dia Pɛrɛsiya. Ɛsta aki nkumekanga ka omoto, ndo Mɔrɔdekai ɔnango, aki onto la hende lakaleke woke oma lale nkumekanga. Ɛsɔ tênde woho wakawayokomaka ɔsɔku.

Ambutshi waki Ɛsta wakavu lâsɔ ko nde eke tshitshɛ, ko Mɔrɔdekai mbakayowôdjaka. Ahasuero, nkumekanga ka Pɛrɛsiya aki la luudu la Susa ko ndo Mɔrɔdekai kaki okambi ande ɔmɔtshi. Ko lushi lɔmɔtshi, Vasheti, wadi a nkumekanga kombɔlɛmiya, ɔnkɔnɛ nkumekanga akasɔnɛ wadi l’oyoyo dia nde ndjâla nkumekanga ka omoto. Onde wɛ mbeyaka omoto lakandasɔnɛ oka? Nde akasɔnɛ Ɛsta, osekaseka wa dimɛna efula.

Wɛ ekɔ lo mɛna pami ka lotamanya kakɔlamɛwɔ kengo oka? Toko Hamana. Nde aki onto la woke efula la Pɛrɛsiya. Hamana akalangaka dia Mɔrɔdekai, onto lɛnayɛ odjashi lanɛ, mbɔkɔlamɛ ndo nde lawɔ. Koko Mɔrɔdekai kosala ɔsɔku. Nde kombohɛ dia kema ɔlɔlɔ kɔlamɛ ndo tombola onto la kɔlɔ. Dikambo sɔ diakomadia Hamana hakoke. Ɔnkɔnɛ, enda kɛnɛ kakandasale.

Hamana akamamatanyiyɛ Ase Isariyɛlɛ le nkumekanga. Nde akate ate: ‘Vɔ wekɔ anto wa kɔlɔ wahalɛmiya ɛlɛmbɛ ayɛ. Vɔ pombaka diakema.’ Ahasuero kombeyaka ɔnɛ wadiɛnde Ɛsta aki Ose Isariyɛlɛ. Ɔnkɔnɛ nde aketawɔ awui wa Hamana ndo akadjanga ɔlɛmbɛ dia ndjaka Ase Isariyɛlɛ tshɛ lushi lɔmɔtshi lakandashikikɛ.

Lam’akoke Mɔrɔdekai ɔlɛmbɛ ɔsɔ, yimba yande yakahandjɔ vua. Nde akatome dikɛndji le Ɛsta ate: ‘Wɛ pombaka mbutɛ nkumekanga ndo mbɔsɛngasɛnga dia nde toshimbela.’ Lo ndjela ɛlɛmbɛ w’Ase Pɛrɛsiya wakasekɛka dia ntshɔ la tɛnana la nkumekanga naka hawoketshi. Koko Ɛsta akatshu aha la vɔ mbêta. Kam’akawɛnyi nkumekanga, nde akôtshumi danga diande dia paunyi, djembetelo y’ɔnɛ nde hodiakema. Ɛsta akelɛ nkumekanga nde la Hamana lo dambo dimɔtshi dia woke. Ko nkumekanga akatombolaka Ɛsta lɛkɔ kɛnɛ kalangande nde mbosha. Ɛsta akate dia nde ayowotɛ naka nde la Hamana ndja lo dambo dikina la wedi a pindju.

Lo dambo diakɔ sɔ, Ɛsta akatɛ nkumekanga ate: ‘Dimi la wodja ami tayodiakema.’ Nkumekanga akomala. Nde akambola ate: ‘Onto akɔna ele la dikimɔ dia sala dikambo sɔ na?’

Ɛsta akate ate: ‘Toko otunyi aso, Hamana kanga kɔlɔ ɔnɛ!’

Nkumekanga akoke kɛlɛ efula mɛtɛ. Nde akatome dui dia Hamana ndjakema. L’ɔkɔngɔ diko, nkumekanga akakonya Mɔrɔdekai onto la hende lakaleke woke oma lale nde. Mɔrɔdekai akadje ɔlɛmbɛ w’oyoyo wakasha Ase Isariyɛlɛ dikimɔ dia vɔ ndjatɛkɛtɛ lo lushi lakawahombe ndjakema. Nɛ dia Mɔrɔdekai akayongaka onto la woke, anto efula wakakimanyiya Ase Isariyɛlɛ, ndo vɔ wakashimbamela oma l’anya w’atunyi awɔ.

Dibuku dia Esta.