ƆKƆNDƆ 84

Ondjelo ɔmɔtshi amboya le Mariya

OMOTO la dimɛna ɔnɛ lokombo lande Mariya. Nde aki Ose Isariyɛlɛ, akadjasɛka l’osomba wa Nazarɛta. Nzambi akeyaka dia nde aki onto l’ɔlɔlɔ efula. Diɔ diakɔ diakandatome ondjelo ande Ngabiriyɛlɛ dia ndjɔtɛkɛta lande. Onde wɛ mbeyaka kɛnɛ kakaye Ngabiriyɛlɛ dia ndjotɛ Mariya? Ɛsɔ tênde dikambo diakɔ.

Ngabiriyɛlɛ akawotɛ ate: ‘Mɔyɔ, wɛ ombokami a ngandji ka mamba, Jehowa ekɔ layɛ.’ Mariya atɛnaka onto ɔsɔ. Nde akoke wɔma nɛ dia nde kombeya kɛnɛ kakalange ondjelo nembetshiya. Koko Ngabiriyɛlɛ akɔladia wɔma ande esadi eto.

Nde akate ate: ‘Mariya, tokake wɔma. Jehowa ambɔngɛnangɛna efula dikambo diayɛ. Diɔ diakɔ diayangande kosalɛ dikambo dia mamba. Kem’edja wɛ ayôta ɔna. Kowɔlɛ Yeso.’

Ngabiriyɛlɛ akalembetshiya ate: ‘Ɔna akɔ ayoyala woke ko wayowelɛ ɔnɛ: Ɔna Nzambi Nkum’Olongo. Jehowa ayowetɛ nkumekanga oko aki Davidi. Koko Yeso ayonga nkumekanga ka pondjo, ndo diolelo diande hadiokomɛki!’

Mariya akambola ate: ‘Woho akɔna ayosalema dikambo sɔ na? Dimi latatshukama. Dimi taleyana la pami, ko woho akɔna ayomôta ɔna na?’

Ngabiriyɛlɛ akôkadimola ate: ‘Wolo wa Nzambi wayoya le yɛ. Ɔnkɔnɛ ɔna ayelamɛ ɔnɛ: Ɔna Nzambi.’ Ko nde akewoya Mariya ate: ‘Ohɔ dia Elizabɛtɛ l’otɔ layɛ. Anto wakataka ɔnɛ nde aya osombe hayokoka mbota. Koko kem’edja nto, nde ayôta ɔna. Ɔnkɔnɛ oko wɛnayɛ, ndoko ɛngɔ kahakoke Nzambi sala.’

Mariya akate esadi eto ate: ‘Dimi lekɔ okambi a omoto wa Jehowa! Dikambo sɔ diasalemi le mi oko otshiyɛ.’ Ko ondjelo akôtshike.

Mariya akatshu esadi otsha la tênda Elizabɛtɛ. Etena kakoke Elizabɛtɛ dui dia Mariya, yâna yaki lo dikundju diaki Elizabɛtɛ akakunyɔkunyɔ l’ɔngɛnɔngɛnɔ. Elizabɛtɛ akalole la nyuma ka Nzambi, ko nde akatɛ Mariya ate: ‘Wɛ ambɔtshɔkɔma l’atei a amato lo yoho ya lânde.’ Mariya akadjasɛ l’Elizabɛtɛ oko ngɔndɔ shato ko nde akakalola oya la Nazarɛta.

Mariya akahombe tshukana la pami kɛmɔtshi kakawelɛka Yɔsɛfu. Koko etena kakoke Yɔsɛfu dia Mariya aya la diemi, nde akakane yimba di’aha mbotshuka. Ko ondjelo wa Nzambi akayowotɛ ate: ‘Tokake wɔma dia tshuka Mariya. Nɛ dia Nzambi mbowosha ɔna pami.’ Ɔnkɔnɛ Mariya la Yɔsɛfu wakatshukana ndo wakakongɛka eotwelo ka Yeso.

Luka 1:​26-56; Mateu 1:​18-25.