ƆKƆNDƆ 85
Yeso ambôtɔ lo lokoto
ONDE wɛ mbeyaka ɔna ashashi ongo? Eelo, toko Yeso. Nde mala mbotɔ kakiye lo lokoto. Lokoto ekɔ dihole dietama wa nyama. Mariya ekɔ lo mbetanya Yeso l’elelo ka nyama, lâwɔ kele dihole diakitshawɔ mbo ya ndɛ ya ponda la nyama kina. Ko lande na kele Mariya nde la Yɔsɛfu lanɛ kâmɛ la wa nyama na? Lango kema dihole diatowotaka ana, shi mɛtɛ?
Eelo, aha lango. Koko, vɔ wekɔ lâwɔ dikambo dia Kayisa Angusta, omboledi wa la Rɔmɔ, akadje ɔlɛmbɛ dia onto tshɛ pombaka kalola l’osomba wakandotɔ dia tofunda lokombo lo dibuku. Yɔsɛfu akotɔ lanɛ la Bɛtɛlɛhɛma. Koko lam’akawakome nde la Mariya, dihole kondjala nto lo wa mvudu tshɛ. Ɔnkɔnɛ vɔ wakaye lanɛ kâmɛ la wa nyama. Ko lushi lakɔ mbakote Mariya Yeso! Koko, oko wɛnayɛ, nde ekɔ la wolo.
Wɛ hɛnyi alami w’ɛkɔkɔ wayaye a ndjênda Yeso? Vɔ waki lo dikambɔ l’otsho walama ɛkɔkɔ awɔ ko osase wa mamba wakâhɛtɛ. Aki ondjelo ɔmɔtshi! Alami w’ɛkɔkɔ wakoke wɔma efula. Koko ondjelo akate ate: ‘Tanyokake wɔma! Lekɔ la losango l’ɔlɔlɔ la nyotɛ. Kristo, Nkumadiɔndjɔ, akotwe ɛlɔ la Bɛtɛlɛhɛma. Nde ayoyoshimbela anto! Nyayowotana ɔmbami l’ahɔndɔ ndo etami l’elelo ka nyama.’ Andjelo efula wakaye la shashimoya ndo wakatatɛ tombola Nzambi. Ɔnkɔnɛ alami w’ɛkɔkɔ wakakimɛ lɔkɛndɔ esadi la tênda Yeso, ndo kakianɛ wambôtana.
Onde wɛ mbeyaka bonde kele Yeso ohomba efula ngasɔ? Onde wɛ mbeyaka ênde mɛtɛ mɛtɛ? Ohɔ dia, l’ɔkɔndɔ wa ntondo wele lo dibuku nɛ, takatɛkɛta dikambo di’Ɔna Nzambi l’enondo. Ɔn’akɔ akakambaka kâmɛ la Jehowa lo sala elongo la kɛtɛ la diangɔ tshɛ. Yeso kele ɔn’akɔ!
Eelo, Jehowa akɔsɛ lɔsɛnɔ l’Ɔnande oma l’olongo ko nde lidja lo dikundju diaki Mariya. Kem’edja ɔna akatatɛ la mpama lo dikundju diande oko atohamaka ana akina l’akundju w’anyangɛwɔ. Koko ɔn’ɔsɔ aki Ɔna Nzambi. L’ɔkɔngɔ diko, Yeso akayotɔka lanɛ l’okoto la Bɛtɛlɛhɛma. Wɛ ambɛna kakianɛ lande na aki andjelo l’ɔngɛnɔngɛnɔ dia mbewoya anto ɔnɛ Yeso ambotɔ?