ƆKƆNDƆ 86
Apami wakalɔmbwama oma le yɔ̂tɔ
WƐ EKƆ lo mɛna yɔ̂tɔ ya ngaingai yatshuma onto ongo lohita? Lam’akawamɔ oma la Jerusalɛma mbakatombe yɔ̂tɔ ndjo. Anto ango wakaye oma l’Ehotwelo ka onya, vɔ wakeke awui wa tɔ̂tɔ. Vɔ mbetawɔka dia yɔ̂tɔ y’oyoyo ndjo ekɔ lo talɔmbɔla otsha le onto ɔmɔtshi la woke.
Lam’akatshu apami akɔ otsha la Jerusalɛma, vɔ wakambola vate: ‘Lend’ele ɔna layonga nkumekanga k’Ase Juda na?’ “Juda” ekɔ lokombo lokina l’Ase Isariyɛlɛ. Apami akɔ wakate vate: ‘Sho takɛnyi ntondo yɔ̂tɔ y’ɔna lam’akiso l’Ehotwelo ka onya, mbambotoya dia ndjɔtɛmɔla.’
Lam’akoke Hɛrɔdɛ, ɔnɛ laki nkumekanga ka Jerusalɛma, ɔsɔku, nde akâyaya efula. Nde konangaka dia nkumekanga kekina mbɔsa dihole diande. Ɔnkɔnɛ, Hɛrɔdɛ akelɛ ɛlɔmbɛdi a wake ndo akawambola ate: ‘Lende akahombe mbotɔ nkumekanga kakalakema na?’ Vɔ wakôkadimola vate: ‘Bible mbutaka ɔnɛ la Bɛtɛlɛhɛma.’
Ɔnkɔnɛ, Hɛrɔdɛ akelɛ apami wakaye oma l’Ehotwelo ka onya ndo akawatɛ ate: ‘Nyutshu nyotoyange ɔna dikɛnda. Lam’ayonyowɛna, kanyoyombewoya. Dimi layotshɔ dia tɔ̂tɛmɔla ndo dimi lawɔ.’ Koko lo mɛtɛ, Hɛrɔdɛ akalangaka mbeya lɛnɛ aki ɔna dia mbodiaka!
Ko yɔ̂tɔ yakete la ntondo k’apami akɔ otsha la Bɛtɛlɛhɛma, ko yɔ yakatemalaka lo dihole diaki ɔna. Lam’akɔtɔ apami akɔ lo luudu, vɔ wakatanyi Mariya la Yeso eke dikɛnda. Vɔ wakatondja eshasha, wakasha Yeso. Koko l’ɔkɔngɔ diko, Jehowa akawaewoya lo dɔ di’aha vɔ kalola le Hɛrɔdɛ. Ɔnkɔnɛ, vɔ wakakalola otsha lo wodja awɔ lo mboka kekina.
Lam’akoke Hɛrɔdɛ ɔnɛ apami akɔ wakaye oma l’Ehotwelo ka onya wambotshɔka lakawɔ, nde akomala efula. Ɔnkɔnɛ nde akatome dui dia ndjaka ana w’apami tshɛ waki la Bɛtɛlɛhɛma, tatɛ oma l’ɛnɔnyi ehende tsha l’ɛse. Koko Jehowa akewola Yɔsɛfu lo dɔ, ko nde akatshu la nkumbo kande otsha l’Edjibito. L’ɔkɔngɔ diko, lam’akoke Yɔsɛfu ɔnɛ Hɛrɔdɛ ambovɔ, nde akɔsɛ Mariya la Yeso, ko wakakalola oya la Nazarɛta. Lɛkɔ mbakatolaka Yeso.
Onto akɔna afɔnyayɛ akahɛtsha yɔ̂tɔ y’oyoyo ya ngaingai shɔ na? Ohɔ dia, apami akɔ wakatshu ntondo la Jerusalɛma l’ɔkɔngɔ wa vɔ mɛna yɔ̂tɔ. Satana Diabolo akalangaka ndjaka Ɔna Nzambi, ndo nde akeyaka ɔnɛ nkumekanga ka la Jerusalɛma, le Hɛrɔdɛ, ayoyanga woho wa mbodiaka. Lâsɔ ekɔ paka Satana mbakatondja yɔ̂tɔ shɔ ya ngaingai.