ƆKƆNDƆ 96
Yeso ambɔkɔnɔla ase hemɔ
LAM’AKATAKINDOLAKA Yeso lo wodja, nde akatakɔnɔlaka ase hemɔ. Lokumu l’ahindo asɔ lakadiangana lo ngelo ndo l’esomba wa l’emamu. Ɔnkɔnɛ, anto wakawela akanga wa tshumbe, akanga a totshungu, akanga a poke ndo ɛkɔnyi ekina efula. Ko Yeso akâkɔnɔla vɔ tshɛ.
Ambolekana ɛnɔnyi esato tatɛ oma lam’akabatizama Yeso oma le Joani. Yeso akatɛ apɔstɔlɔ ande dia kem’edja nde ayotshɔ otsha la Jerusalɛma, lɛkɔ nde ayotodiakema, ko ayolɔ oma l’edo lushi la sato. L’etena kɛsɔ, Yeso akatetemala kɔnɔla ase hemɔ.
Lushi lɔmɔtshi la Sabato, Yeso aki lo mbetsha. Sabato ekɔ lushi la diomuyelo le Ase Juda. Omoto lɛnayɛ lanɛ aki la hemɔ ka wolo. Ɛnɔnyi 18 w’etondo, nde akakotamaka lokotama, ndo nde kokokaka sembɔ tɔ. Ɔnkɔnɛ, Yeso akawahɛ anya, ko nde akatatɛ la sembɔ tɔ. Nde akakɔnɔ!
Dikambo sɔ diakokiya ewandji w’ɛtɛmwɛlɔ kɛlɛ. Ɔmɔtshi a l’atei awɔ akatɛ olui w’anto la dui dia wolo ate: ‘Nshi shamalo yahombaso kambaka olimu yekɔ. Lo nshi shɔ mbakokanyu ndjâka dia ndjɔkɔnɔyama, koko aha lushi la Sabato!’
Koko Yeso akakadimola ate: ‘Nyu nyekɔ anto wa kɔlɔ. Onto tshɛ a l’atei anyu totshungolaka ponda kande ndo tokitɔlaka dia tokinɔsha ashi lushi la Sabato. Ko omoto ɔnɛ lambotata ɛnɔnyi 18 hakoke kɔnɔyama lushi la Sabato oka?’ Okadimwelo waki Yeso akôtsha anto asɔ wa kɔlɔ sɔnyi.
L’ɔkɔngɔ diko, Yeso nde l’apɔstɔlɔ ande wakatshu otsha la Jerusalɛma. Kam’akawatombe l’andja w’osomba wa Jeriko, ase kɛtshi ahende wa totshungu wakoke ɔnɛ Yeso ekɔ lo tete suke la lawɔ. Ɔnkɔnɛ, vɔ wakate la dui dia wolo vate: ‘Yeso otokimanyiya!’
Yeso akelɛ akanga a totshungu akɔ ko akawambola ate: ‘Kakɔna kalanganyu dimi nyotshelɛ na?’ Vɔ wakate vate: ‘Nkumadiɔndjɔ, toko shate asho aso wasɛnɛ.’ Yeso akananda asho awɔ ko vɔ wakɛnyi wonya akɔ wâmɛ! Onde wɛ mbeyaka lande na kakasalaka Yeso ahindo asɔ tshɛ wa diambo? Nɛ dia nde mbokaka anto ngandji ndo nde nangaka dia vɔ ndjâla la mbetawɔ le nde. Diɔ diakɔ diakokaso shikikɛ ɔnɛ lam’ayondolɛ oko Nkumekanga, ndoko onto layotata hemɔ nto.
Mateu 15:30, 31; Luka 13:10-17; Mateu 20:29-34.