ƆKƆNDƆ 99
Lo luudu la la diko
TAYA lushi la nɛi la dikɔlɔ, nshi hiende yambeta. Yeso nde l’apɔstɔlɔ ande 12 wakadɛ lo luudu la la diko dia tɔlɛ dambo dia Pasaka. Judasɛ Isakariyɔtɛ ongo atatshu. Nde ekɔ lo tatshu dia totɛ ɛlɔmbɛdi woho wakokawɔ munda Yeso.
Judasɛ akatshu le wɔ loyi ko akatowambolaka ate: ‘Ayonyombisha naka lambonyokimanyiya dia munda Yeso?’ Vɔ wakôkadimola vate: ‘Tayokosha ekenga akumi asato wa fɛsa.’ Diɔ diakɔ diatatshu Judasɛ kakianɛ dia tɛnana l’anto asɔ ɔnɛ kele wayonde Yeso. Shi ɔsɔ ekɔ dikambo dia kɔlɔ?
Dambo dia Pasaka diamboshila. Yeso ambotatɛ la dambo dikina diotshikitanyi. Nde akasha ambeki ande mapa ate: ‘Nyole mapa ɔnɛ, vɔ mbele oko demba diami diahomba kimɔma dikambo dianyu.’ Ko nde ndjowasha dikɔhɔ dia vinyɔ ate: ‘Nyɔnɔ vinyɔ nyɛ, nɛ dia yɔ yele oko dikila diami diahomba tshulwama dikambo dianyu.’ Bible dielɛka ɔnɛ: ‘Dambo dia Dikɔlɔ dia Nkumadiɔndjɔ,’ kana ‘olelo w’akhuka wa Nkumadiɔndjɔ.’
Ase Isariyɛlɛ wakalɛka Pasaka dia mbohɔ etena ‘kakalekana’ ondjelo wa Nzambi mvudu yawɔ l’Edjibito, ko ndjaka ana wa nondo wa lo mvudu y’Ase Edjibito. Koko kakianɛ, Yeso nangaka di’ambeki ande mbôhɔka, ndo mbohɔka woho wakandakimɔ lɔsɛnɔ lande dikambo diawɔ. Diɔ diakɔ diakinde lo mbatɛ dia vɔ salaka dambo diotshikitanyi nɛ ɔnɔnyi tshɛ.
L’ɔkɔngɔ wa vɔ ndɛ Dambo dia Dikɔlɔ dia Nkumadiɔndjɔ, Yeso akatɛ apɔstɔlɔ ande dia vɔ ndjâla la dihonga ndo monga nge lo mbetawɔ. L’ɔkɔngɔ diko, vɔ wakembɛ Nzambi osambu ko wakatshu. L’otsho w’efula, aki ondo l’atei a deke. Tênde lɛnɛ atakawatshu.
Mateu 26:14-30; Luka 22:1-39; Joani tshapita 13 polo 17; 1 Koreto 11:20.