ƆKƆNDƆ 105
Wambokonga la Jerusalɛma
ANTO wele lanɛ ango wekɔ ambeki wa Yeso. Vɔ wakatshikala la Jerusalɛma oko akandawatɛ. L’etena kakawakongaka la Jerusalɛma vɔ tshɛ tshɛ, londjo la mamba lakokɛma lo luudu l’otondo. Londjo lakɔ laki oko lɔpɛpɛ la wolo. Ko nemi ya dja yakɛnama lâdiko di’ɔtɛ w’ombeki l’ombeki. Hɛnyi dja yakɔ lâdiko di’ɔm’ɔmɔ a l’atei awɔ? Dikambo ndo akadialange nembetshiya na?
Aki dihindo! Yeso akakalola l’olongo, suke la She, ko nde akatatɛ la tshulwɛ ambeki ande nyuma k’ekila kaki Nzambi. Onde wɛ mbeyaka kɛnɛ kakâtshutshuya nyuma k’ekila dia vɔ sala? Vɔ tshɛ wakatatɛ la tɛkɛta ɛtɛkɛta wotshikitanyi.
Anto efula wa la Jerusalɛma wakoke londjo lɔsɔ lakafɔnaka la lɔpɛpɛ la wolo, ko vɔ wakaye dia ndjênda dikambo diakatombe. Anto amɔtshi wakaye oma lo wedja ekina oya lo difɛstɔ di’Ase Isariyɛlɛ dia Pɛntɛkɔsta. Angɛndangɛnda asɔ wakâmbe heyama! Vɔ wakoke ambeki watɛkɛta akambo wa diambo wakasale Nzambi l’ɛtɛkɛta awɔ hita.
Angɛndangɛnda asɔ wakate vate: ‘Anto anɛ tshɛ Ase Ngalileya mbewɔ. Ko woho akɔna wakokawɔ tɛkɛta ɛtɛkɛta wotshikitanyi watɛkɛtama lo wedja wakiso na?’
Ko Petero akemala dia mbalembetshiya dikambo diakɔ. Nde akadiya dui diande ndo akakɔndɔlɛ anto woho wakadiakema Yeso ndo wakawolola Jehowa oma l’edo. Petero akate ate: ‘Kakianɛ Yeso ekɔ l’olongo lo lonya l’omi la Nzambi. Nde ambotshulola nyuma k’ekila kakalakema. Diɔ diakɔ diakanyɛnyi ndo diakanyoki ahindo anɛ.’
Lam’akate Petero akambo asɔ, anto efula wakayakiyanya heyama oma lo kɛnɛ kakawasalɛ Yeso. Vɔ wakambola vate: ‘Kakɔna kahombaso sala na?’ Petero akawatɛ ate: ‘Nyu pombaka tshikitanya nsɛnɔ yanyu ndo nongola batismu.’ Ɔnkɔnɛ, lushi lɔsɔ anto 3 000 wakalongola batismu ndo wakayala ambeki wa Yeso.