ƆKƆNDƆ 106
Wambotshungwama oma lo lokanu
OHÊNDA ondjelo ongo wadihola lokuke la lokanu. Apami ango wambotshungwama wekɔ apɔstɔlɔ waki Yeso. Tênde kɛnɛ kakayakonyaka lo lokanu.
Atayala edja l’ɔkɔngɔ wa nyuma k’ekila tshulwama le ambeki a Yeso. Dikambo nɛ diakatombe: Petero nde la Joani wakatatshɔka otsha lo tɛmpɛlɔ ka la Jerusalɛma la dikɔlɔ. Pami kɛmɔtshi kakotɔ ekuse aki lɛkɔ suke la lokuke. Anto wakawɛmbaka dia ndjôkitsha lo dihole diakɔ nshi tshɛ dia nde nɔmbaka wanɛ wɔtɔ lo tɛmpɛlɔ falanga. Lam’akandɛnyi Petero la Joani, nde akawalɔmbɛ yangɔ mɔtshi. Kakɔna kakasale apɔstɔlɔ na?
Vɔ wakemala ko wakende pami kakɔ k’ose wola. Petero akawotɛ ate: ‘Dimi kema la falanga, koko layokosha kɛnɛ kele lami. Lo lokombo la Yeso, emala kele ɔkɛndɛkɛndɛ!’ Ko Petero akôkimɛ lo lonya l’omi, ko nde akemala, akatatɛ kɛndakɛnda. Lam’akɛnyi anto dikambo sɔ, vɔ wakambe heyama ndo waki l’ɔngɛnɔngɛnɔ w’efula oma lo dihindo sɔ dia diambo.
Petero akate ate: ‘Oma lo wolo wa Nzambi, ɔnɛ lakolola Yeso oma l’edo, mbosadiso dihondo nɛ.’ L’etena kakandatɛkɛtaka nde la Joani, ewandji ɛmɔtshi w’ɛtɛmwɛlɔ wakayayaka. Vɔ wakomala efula l’ɔtɛ w’ɔnɛ Petero nde la Joani wekɔ lo mbutɛ anto dikambo dia eolwelo ka Yeso oma l’edo. Omalɔkɔ, vɔ wakawande ko wakawadje lo lokanu.
La wedi a pindju, ewandji w’ɛtɛmwɛlɔ wakɔtɔ losanganya la woke. Vɔ wakela Petero nde la Joani la pami kakawakɔnɔla. Ewandji w’ɛtɛmwɛlɔ wakawambola vate: ‘Oma lo wolo akɔna wakanyasale dihindo nɛ na?’
Petero akawatɛ ɔnɛ oma lo wolo wa Nzambi, ɔnɛ lakolola Yeso oma l’edo. Ɛlɔmbɛdi kombeya kɛnɛ ka ntsha, nɛ dia vɔ kokoka manguna dihindo dia diambo diakasalema mɛtɛ. Ɔnkɔnɛ, vɔ wakashimbe apɔstɔlɔ di’aha vɔ tɛkɛta dikambo dia Yeso kânga yema tshitshɛ, ko vɔ wakâkimɔ.
Nshi yakatetaka, apɔstɔlɔ wakakɔlamela la sambisha dikambo dia Yeso ndo wakatakɔnɔlaka ase hemɔ. Lokumu l’ahindo asɔ lakadiangana. Ɔnkɔnɛ kânga anto w’oma l’esomba waki l’emamu wa Jerusalɛma wakêlaka anto awɔ waki la hemɔ dia apɔstɔlɔ ndjâkɔnɔla. Dikambo sɔ diakokiya ewandji w’ɛtɛmwɛlɔ kandjema, omalɔkɔ, vɔ wakande apɔstɔlɔ ko wakawadje lo lokanu. Koko vɔ kotshikala edja lɔkɔ.
L’otsho, ondjelo wa Nzambi akayodihola lokuke la lokanu, oko wɛnayɛ lanɛ. Ondjelo akate ate: ‘Nyutshu nyototshikale lo tɛmpɛlɔ, kele nyototetemale la sambisha anto.’ La wedi a pindju, ewandji w’ɛtɛmwɛlɔ wakatome anto lo lokanu dia toya l’apɔstɔlɔ, koko vɔ kombatana. L’ɔkɔngɔ diko, vɔ wakatatanaka wasambisha lo tɛmpɛlɔ ko vɔ wakâtɔlɛ otsha lo mbalasa k’ase Sheke.
Ewandji w’ɛtɛmwɛlɔ wakate vate: ‘Sho takanyodjɛ ɔlɛmbɛ di’aha nyu tɛkɛta dikambo dia Yeso kânga yema tshitshɛ. Koko nyambolodja Jerusalɛma la wetshelo anyu.’ Ko apɔstɔlɔ wakakadimola vate: ‘Sho pombaka kitanyiya Nzambi oko owandji oleki kitanyiya anto.’ Omalɔkɔ, vɔ wakatetemala la sambisha “lukumu l’ololo.” Onde ɔsɔ kema ɛnyɛlɔ k’ɔlɔlɔ kahombaso ndjela oka?