ƆKƆNDƆ 107
Wamboka Stefano ave
PAMI kokuse adwe kengo lokombo lande Stefano. Nde ekɔ ombeki wa Yeso wa kɔlamelo. Ko ohênda dikambo diambôkomɛ! Anto ango wekɔ lo mbôka ave a weke. Bonde kahetshawɔ Stefano polo ndo mbotshelɛ kɔlɔ ka nganɛ? Tênde dikambo diakɔ.
Nzambi akakimanyiya Stefano dia sala ahindo wa mamba. Anto ango konangaka dikambo sɔ, ko vɔ wakatatɛ la mbidjanya lande tamu lo dikambo dia wetshelo wa mɛtɛ wakandetshaka anto. Koko Nzambi akasha Stefano lomba l’efula, ko nde akɛnya kashi ka wetshelo awɔ. Dikambo sɔ diakaleke mbaokiya kɛlɛ. Diɔ diakɔ diakawawonde, ko vɔ wakelɛ anto dia ndjômamatanyɛ enongo.
Ɔlɔmbɛdi a woke akawombola ate: ‘Onde akambo asɔ tshɛ wekɔ mɛtɛ?’ Stefano akakadimola lo dako di’oma lo Bible. L’ekomelo kadiɔ, nde akate di’anto wa kɔlɔ wakahetshaka amvutshi a Nzambi waki lo nshi yakete. Ko nde akayotaka ate: ‘Nyu nyekɔ oko anto asɔ. Nyu nyakadiake Yeso, okambi a Nzambi, ndo hanyokitanyiya ɛlɛmbɛ a Nzambi.’
Dikambo sɔ diakomadia ewandji w’ɛtɛmwɛlɔ! Vɔ wakayalumata la kɛlɛ. Koko Stefano akedia asho l’olongo ko akate la dui dia wolo ate: ‘Enda! Lambɛna Yeso emadi lo lonya l’omi la Nzambi l’olongo.’ Lam’akawoke dikambo sɔ, anto ango wakadihe atui ko wakakongotɔnɛ oya le nde. Vɔ wakawonde ko wakôkotola otsha l’andja w’osomba.
Vɔ wakatokolola ekutu awɔ lɛkɔ ko wakasha ɔlɔngɔlɔngɔ Saulo dia nde namaka. Wɛ hɛnyi Saulo? Ko apami amɔtshi wakatatɛ mboka Stefano ave. Stefano akakusɛ adwe, oko wɛnayɛ l’osato ɔnɛ, ko nde akalɔmbɛ Nzambi ate: ‘Jehowa towashake dilanya oma lo kɔlɔ kɛnɛ.’ Nde akeyaka dia amɔtshi wa l’atei awɔ wakakesama oma le ewandji w’ɛtɛmwɛlɔ. L’ɔkɔngɔ w’ɛtɛkɛta ɛsɔ, Stefano akavu.
Etena katokosalɛka onto kɔlɔ, onde wɛ tɔsɔmbɔyaka, kana nɔmbaka Nzambi dia nde mbosha dilanya? Stefano la Yeso kosala ngasɔ. Vɔ wakalangaka anto wakâsalɛka kɔlɔ. Tohembe dia mbokoya ɛnyɛlɔ kawɔ.