ƆKƆNDƆ 110
Timɔtɛ—okimanyedi w’oyoyo waki Paulo
ƆLƆNGƆLƆNGƆ wɛnayɛ lanɛ nde l’ɔpɔstɔlɔ Paulo lokombo lande Timɔtɛ. Timɔtɛ akadjasɛka la nkumbo kande la Lustɛra. Nyango lokombo lande Eyunikɛ ndo tshɛnde lokombo lande Lɔyi.
Mbala ka sato kɛnɛ kamboya Paulo la Lustɛra. Ambeta oko yɛdikɔ y’ɔnɔnyi w’otondo kana ndekana, lam’akaye Paulo nde la Baranaba lanɛ lo lɔkɛndɔ lawɔ la ntondo l’esambishelo. Etena kɛnɛ, Paulo ambokalola oya lɛkɔ kâmɛ l’osekande Silasi.
Onde wɛ mbeyaka kɛnɛ katɛ Paulo Timɔtɛ? Nde ekɔ lo mombola ate: ‘Wɛ nangaka totshindɛ dimi la Silasi? Sho nangaka wɛ tokimanyiya dia sambisha anto akina wa l’ahole w’etale.’
Timɔtɛ akakadimola ate: ‘Eelo, dimi nangaka ntshɔ.’ Kem’edja, Timɔtɛ akatshike nkumbo kande ko akatshu nde la Paulo la Silasi. Koko la ntondo ka sho mbeka kɛnɛ k’endana la lɔkɛndɔ lawɔ, totokenda kɛnɛ kakakomɛ Paulo. Ambeta oko yɛdikɔ y’ɛnɔnyi 17 oma lam’akawɛnɛ Yeso lo mboka k’otsha la Damasɛkɛ.
Ohɔ dia Paulo akaye la Damasɛkɛ dia ndjɔhɛnyahɛnya ambeki wa Yeso, koko kakianɛ ndamɛmɛ aya ombeki wa Yeso! L’ɔkɔngɔ diko, atunyi amɔtshi wakɔtɔ sheke ya ndjaka Paulo nɛ dia vɔ konangaka wetshelo ande lo dikambo dia Yeso. Koko ambeki wakôkimanyiya dia nde ndawɔ. Vɔ wakawodje lo kisaka kɛmɔtshi ko wakoholoya l’andja w’ehele k’osomba.
L’ɔkɔngɔ w’akambo asɔ, Paulo akatshu otsha l’Atiyɔka dia tosambisha. Lɛkɔ kaketama ambeki wa Yeso mbala ka ntondo ɔnɛ: Akristo. Paulo la Baranaba wakayotomamaka oma l’Atiyɔka otsha lo wedja wanganyi etale dia tosambisha lɛkɔ. Osomba ɔmɔtshi wakawatshu lokombo lawɔ Lustɛra, laka wa Timɔtɛ.
Kakianɛ, ambeta oko ɔnɔnyi w’otondo, Paulo ambokalola la Lustɛra lo lɔkɛndɔ la hende. Lam’akamɔ Timɔtɛ kâmɛ la Paulo la Silasi, onde wɛ mbeyaka otsha lɛnɛ akawatshu? Enda kartɛ, kele oshihodia ahole amɔtshi.
Ntondotondo, vɔ wakatshu otsha l’osomba waki l’omamu wakawelɛka Ikɔniyo, ko l’ɔkɔngɔ, wakayotshɔka l’osomba wakawelɛka Atiyɔka. Oma lâsɔ, vɔ wakatehɔ otsha la Tɔrɔa, oma lɛkɔ ko la Filipi, oma la Filipi ko la Tɛsalɔnika ko la Bɛrɔya. Onde wɛ ekɔ lo mɛna Atɛna lo kartɛ? Paulo akasambishaka lɛkɔ. L’ɔkɔngɔ w’akambo asɔ, vɔ waketsha ɔnɔnyi w’otondo l’etenyi dia sambisha la Kɔrɛtɔ. L’ɔkɔngɔ diko, vɔ wakayumuyaka yema l’Ɛfɛsɔ. Ko vɔ wakayotehɔka lo wâto otsha la Kayisariya, wakatotshɔka polo ndo l’Atiyɔka lɛnɛ akatotshikala Paulo.
Ɔnkɔnɛ, Timɔtɛ akasale nkɛndɔ ya kama la kama ya kilɔmɛtɛrɛ dia tâkimanyiyaka Paulo l’olimu w’esambishelo ka “lukumu l’ololo” ndo dia mbata tshumanelo di’Akristo efula. Lam’ayoyokoma opalanga, onde wɛ ayoyala okambi wa Nzambi wa kɔlamelo oko Timɔtɛ?
Etsha 9:19-30; 11:19-26; tshapita 13 polo 17; 18:1-22.
[Kartɛ]
(Dia menda woho wenda dimɛna, enda lo okanda)
Rɔmɔ
Malata
Tɛsalɔnika
Bɛrɔya
Kɔrɛtɔ
Filipi
Atɛna
Kɛrɛtɛ
Tɔrɔa
Ɛfɛsɔ
Milɛtɔ
Kɔlɔsai
Atiyɔka
Ikɔniyo
Lustɛra
Atiyɔka
Kupiro
Damasɛkɛ
Kayisariya
Jɔpa
Jerusalɛma
NDJALE KA WOKE (MEDITERANEYA)