ƆKƆNDƆ 113
Paulo la Rɔmɔ
PAMI kengo kokelekami mɔlɔla l’anya lokombo lande Paulo, ɔnɛ lôlama ongo ekɔ osalayi w’Ose Rɔmɔ. Paulo ekɔ lo lokanu la Rɔmɔ. Nde ekɔ lo konga polo ndo lam’ayoyɔsa Kayisa tɛdikɔ lo kɛnɛ kahombawɔ mbosalɛ. Etena kakinde lo lokanu, anto wakakokaka ntshɔ dia towenda.
Nshi shato l’ɔkɔngɔ wa Paulo koma la Rɔmɔ, nde akatome dikɛndji otsha le ewandji w’Ase Juda dia vɔ ndja dia ndjowenda. Omalɔkɔ, Ase Juda efula waki la Rɔmɔ wakaye. Paulo akâsambishaka dikambo dia Yeso ndo dia Diolelo diaki Nzambi. Amɔtshi waketawɔ ndo wakayala Akristo, koko akina kombetawɔ.
Paulo akasambishaka ndo asalayi waki l’ɔkɛndɛ wa mbolama. L’edja k’ɛnɔnyi ehende wakandatshikala lo lokanu, Paulo akasambishaka onto tshɛ lakandɛnaka. Omalɔkɔ, kânga wa lo luudu la Kayisa wakoke lokumu l’ɔlɔlɔ la Diolelo, ndo amɔtshi wa l’atei awɔ wakayoyalaka Akristo.
Ko onto akɔna ongo lakaye dia ndjowenda lafunda lo mɛsa na? Ohokanyiya kana wɛ ayoweya? Toko Timɔtɛ. Timɔtɛ, ndo nde lawɔ, aki lo lokanu l’ɔtɛ w’esambishelo ka Diolelo, koko l’etena kengo ko nde ambotshungɔ. Nde akaye dia ndjokimanyiya Paulo. Onde wɛ mbeyaka kɛnɛ kafunda Timɔtɛ? Tênde akambo akɔ.
Onde wɛ akôhɔ osomba w’Ɛfɛsɔ la wa Filipi wele l’ɔkɔndɔ wa 110? Paulo akâte tshumanelo di’Akristo lɛkɔ. Kakianɛ, l’etena kende lo lokanu, Paulo ambotatɛ fundɛ Akristo asɔ mikanda. Mikanda akɔ wekɔ l’atei a Bible, vɔ mbaetaka ɔnɛ: Efeso la Filipi. Etena kɛnɛ, Paulo ekɔ lo mbutɛ Timɔtɛ kɛnɛ kahombande fundɛ asekande Akristo wa la Filipi.
Ase Filipi wakokaka Paulo ngandji efula. Vɔ wakotomɛ weshasha lam’ende lanɛ lokanu, diɔ diakɔ diakâloya Paulo losaka lo dikambo diakɔ. Epafɔrɔdito kakela Paulo weshasha akɔ. Koko nde akayondamaka la hemɔ ka suke la nyɔi. Kakianɛ nde ambokalangana ndo oyalɔngɔsɔla dia kalola lakande. Nde mbayɛmba mikanda engo w’oma le Paulo la Timɔtɛ lam’ayondokalola otsha la Filipi.
Lam’akinde lo lokanu, Paulo akanyomofunda mikanda ekina ehende watanaso l’atei a Bible. Nde akatomɛ Akristo waki l’osomba wa Kɔlɔsai mukanda ɔmɔtshi. Onde wɛ mbeyaka lokombo la mukanda akɔ? Vɔ mbelɛka ɔnɛ: Kolosai. Mukanda okina wa lânde, nde akafundɛ ɔngɛnyi ande wakawelɛka ɔnɛ Filemɔna laki ndo nde lawɔ l’osomba wa Kɔlɔsai. Lo mukanda akɔ nde akawotɛ dikambo di’okambi ande lakawelɛka Ɔnɛsimo.
Ɔnɛsimo akalawɔ oma laka Filemɔna ko akaye la Rɔmɔ. Lo yoho mɔtshi, Ɔnɛsimo akayokaka dia Paulo aki lo lokanu lawɔ la Rɔmɔ. Nde akatshu dia towenda, ko Paulo akatôsambisha. Kem’edja, ndo Ɔnɛsimo akayoyalaka Okristo. Ɔnɛsimo akanyange efula l’ɔtɛ wakandalawɔ. Onde wɛ mbeyaka kɛnɛ kakafunde Paulo lo mukanda wakandafundɛ Filemɔna?
Paulo akalɔmbaka Filemɔna dia nde dimanyiya Ɔnɛsimo. Paulo akofundɛ ate: ‘Dimi lambokokaloyɛnde. Koko etena kɛnɛ, nde kema paka okambi ayɛ oto. Nde aya Okristo, onanyɔ la mɛtɛ mɛtɛ.’ Lam’akakalola Ɔnɛsimo otsha la Kɔlɔsai, nde akɛmbɛ mikanda ɛsɔ ehende, ɔmɔtshi otsha le Ase Kɔlɔsai ndo okina otsha le Filemɔna. Sho kokaka kanyiya ɔngɛnɔngɛnɔ waki la Filemɔna dia mboka ɔnɛ okambi ande aya Okristo.
Etena kakafundɛka Paulo Ase Filipi la Filemɔna mikanda, mɛtɛ nde aki la losango lɔmɔtshi l’ɔlɔlɔ la mbaewoya. Paulo akewoya Ase Filipi ate: ‘Dimi lambonyotomɛ Timɔtɛ. Koko kem’edja dimɛ layoya lengo.’ Nde akafundɛ ndo Filemɔna ate: ‘Ɔnɔngɔsɔlɛke dihole dia dimi ndjodjasɛ lengo.’
Lam’akatombe Paulo oma lo lokanu, nde akembola anango l’akadiyɛnde wa l’ahole efula. Koko l’ɔkɔngɔ diko, nde akayodjamaka lo lokanu nto la Rɔmɔ. Etena kɛsɔ, nde akeyaka dia nde ayodiakema. Diɔ diakɔ diakandafundɛ Timɔtɛ mukanda dia nde ndja esadi. Paulo akofundɛ ate: ‘Dimi lakatshikala la kɔlamelo la ntondo ka Nzambi, ndo Nzambi ayombisha difuto.’ Ɛnɔnyi ɛmɔtshi l’ɔkɔngɔ wa Paulo ndjakema, Jerusalɛma akalanyema, mbala kɛsɔ oma le Ase Rɔmɔ.
Koko mikanda efula wekɔ l’atei a Bible. Jehowa Nzambi akasha ɔpɔstɔlɔ Joani diaaso dia nde funda abuku wa komelo wa lo Bible, ndo dibuku di’Enyelo. Dibuku sɔ dia l’atei a Bible kɔndɔlaka akambo wayosalema lo nshi yayaye. Lâsɔ, tênde kɛnɛ kayosalema lo nshi yayaye.
Etsha 28:16-31; Filipi 1:13; 2:19-30; 4:18-23; Heberu 13:23; Filemona 1-25; Kolosai 4:7-9; 2 Timote 4:7-9.