ƆKƆNDƆ 114
Ekomelo k’akambo tshɛ wa kɔlɔ
KAKƆNA kɛnayɛ lanɛ na? Alembe wahemi lâdiko dia falasa ya wɛma. Koko lembetɛ oma lɛnɛ ayawaye. Falasa yekɔ lo ndjalawɔ lowango oma l’olongo lâdiko dia wange! Onde mɛtɛ falasa yekɔ l’olongo?
Kema, aha falasa ya mɛtɛ mɛtɛ mbele lango. Sho mbeyaka ɔsɔku nɛ dia falasa hayokoke ndawɔ lâdiko dia wange, shi mɛtɛ? Koko Bible tɛkɛtaka dikambo dia falasa ya l’olongo. Onde wɛ mbeyaka lande na katɛkɛtatɔ dikambo sɔ?
Nɛ dia lo nshi ya ntondo, falasa yakakambemaka olimu l’ata. Diɔ diakɔ diatɛkɛta Bible dikambo di’anto wayakɛndjakɛndja falasa oma l’olongo dia mɛnya ɔnɛ Nzambi ayɔlɔ l’anto wa la kɛtɛ ta. Onde wɛ mbeyaka lokombo la dihole diayɔlɔma ta diakɔ? Dihole diakɔ lokombo ladiɔ Armagɛdɔ. Ta sɔ diayonya akambo wa kɔlɔ tshɛ oma la kɛtɛ.
Yeso kayɔhɔhɔla ta sɔ l’Armagɛdɔ. Ohɔ dia Yeso kakasɔnama oma le Jehowa dia ndjâla nkumekanga ka l’ɛlɔmbwɛlɔ Kande. Diɔ diakɔ diɔlɔtshi Yeso dɛmbɔ dia koso. Ndo yɔmbɔ ndjo mɛnyaka dia nde ayodiaka atunyi wa Nzambi tshɛ. Onde sho kokaka mamba di’ɔnɛ Nzambi ayoshila anto wa kɔlɔ tshɛ oshiki?
Tokalole yema l’Ɔkɔndɔ wa 10. Kakɔna kɛnayɛ lanɛ na? Eelo, shaka ya Mvula k’Elola kakalanya anto wa kɔlɔ. Akɔna akalɔsha Mvula kakɔ k’Elola na? Toko Jehowa Nzambi. Kakianɛ endaka l’Ɔkɔndɔ wa 15. Kakɔna kasalema lawɔ na? Sɔdɔmɔ la Ngɔmɔrɔ wekɔ lo nanyema la dja yakatome Jehowa.
Tshɔkaka l’Ɔkɔndɔ wa 33. Enda kɛnɛ kambokomɛ falasa y’ata la pusupusu y’Ase Edjibito. Akɔna akakaloya ashi dia vɔ mbakukumɛ na? Toko Jehowa. Nde akasale dikambo ndo dia shimbɛ anto ande. Endaka l’Ɔkɔndɔ wa 76. Lɛkɔ wɛ ayɛna dia Jehowa akatshike kânga anto ande, Ase Isariyɛlɛ dia vɔ nanyema l’ɔtɛ w’akambo awɔ wa kɔlɔ.
Omalɔkɔ, hatokoke mamba di’ɔnɛ Jehowa aya suke la toma alembe ande wa l’olongo dia vɔ ndjokumiya akambo wa kɔlɔ tshɛ wele la kɛtɛ. Koko, tokanyiya kɛnɛ kayosalema l’ɔkɔngɔ wa dikambo sɔ! Fola dikatshi kele tênde dikambo diakɔ.