Tshapita 11
‘Nyotetemale la Nyanga Diolelo Ntondo’
OLEKANYI ɛnɔnyi 1 900 wambeta, etena kakandashaka dako la Ngalileya, Yeso akalake ampokami ande ate: “Keli ntundu nyutayangi diulelu la ololo wa [Nzambi, NW].” Ko lande na ngasɔ na? Onde Kristo takandahombe ndjâhema l’okudi l’ɔkɔngɔ wa deko efula oka? Eelo. Koko, ekɔ oma lo tshimbo ya Diolelo diakɔ diaki Mɛsiya sɔ mbayoyindjama lokombo l’ekila laki Jehowa ndo mbayokotshama sangwelo diakinde dia woke di’endana la kɛtɛ. Onto tshɛ l’ɔsa dui sɔ la nɛmɔ l’atei w’otema ande ayetsha Diolelo diakɔ la ntondo k’akambo akina tshɛ lo lɔsɛnɔ lande. Ɔsɔku mbakasalemaka l’eleko ka ntondo, ndo dui diakɔ diɛnamakɔ ɛlɔ kɛnɛ, l’etena kambahema Diolelo diakɔ l’okudi. Onde na, lɔkɛwɔ layɛ mɛnyaka ɔnɛ wɛ mbetshaka Diolelo diakɔ la ntondo k’akambo akina tshɛ lo lɔsɛnɔ layɛ oka?—Mat. 6:33.
2 Efula k’anto wayashakɔ l’akambo akina. Vɔ wekɔ lo nyanga ɔngɔnyi l’ahɔndɔ, olelo la mbo kina ya l’emunyi kâmɛ l’ɛngɛnɔngɛnɔ ekina wakokawɔ kondja l’ekimanyielo ka falanga. (Mat. 6:31, 32) Eongelo kawɔ mɛnyaka dia vɔ ndjashaka paka l’akambo awɔ vɔamɛ ndo wângɛnyangɛnya. Vɔ mbetɛka Nzambi lo dihole dia hende lo sɛnɔ yawɔ—naka vɔ tôngaka la mbetawɔ le nde.
3 Koko, Yeso akasha ambeki ande dako nɛ: “Tanyuyaumbelaki diango la kete,” nɛ dia mbo shɔ hayototshikalaka pondjo. Nde akakotsha ate: “Keli nyuyaumbeli diango l’ulungu,” lo kambɛ Jehowa olimu. Nde akakɔkɔmiya ambeki ande dia vɔ momba asho awɔ “ololo,” lam’akandakotola yambalo yawɔ oya l’ɛngɔ ɔtɔi kɛnɛ: osalelo wa lolango la Nzambi. Nde akawatɛ ate: “Nyu hanyeyi kambela [Nzambi, NW] la ukundji ulimu.” Ko kayotota lo dikambo di’ehomba wa l’emunyi—olelo, ahɔndɔ ndo mvudu na? Yeso akâlake ate: “Tanyuyakananyaki.” Nde akakotola yambalo yawɔ otsha le tofudu taleshama oma le Nzambi. Nde akakeketsha ambeki ande dia vɔ kondja wetshelo lo menda alɛmbɔlɛmbɔ walɔtshama oma le Nzambi dimɛna efula. Onde na, ekambi wa Jehowa wele la timba hawoleki diangɔ sɔ tshɛ nɛmɔ oka? Yeso akate ate: “Keli ntundu nyutayangi diulelu la ololo wa [Nzambi, NW], ku diango so tshe diayuyala dianyu.” (Mat. 6:19-34) Onde na, wɛ mbetawɔka dikambo sɔ oka? Onde, etsha ayɛ mɛnyaka ɔnɛ ɔsɔku mbediɔ oka?
TOTSHIKƐKE NDOKO ƐNGƆ DIHOLE DIA TƆ SOWOLA MƐTƐ KA DIOLELO KELE LAYƐ
4 Naka onto amboyasha ɔtɛkɔya l’akambo w’endana la diangɔ dia l’emunyi, kete nde ayonga l’etombelo a kandji. Oyadi kânga nde sɛmaka ɔnɛ nde ndjashaka l’akambo wa Diolelo, koko naka, diangɔ dikina diekɔ lo mbɔsa dihole dia ntondo l’otema ande, kete mɛtɛ ka Diolelo kayosowɔ. (Mat. 13:18, 19, 22) Oko ɛnyɛlɔ, owandji ɔmɔtshi w’ɔlɔngɔlɔngɔ, kanga ɔngɔnyi, akambola Yeso etena kɛmɔtshi ate: “Kayumutsha dia nkita lumu la pundju na?” Kɛnɛ kakandatshe l’ɔkɔngɔ a kondja okadimwelo a Yeso akɛnya dia nde aki la lɔkɛwɔ l’ɔlɔlɔ ndo akɔsaka anyande la nɛmɔ. Koko, nde akayasha ɔtɛkɔya lo mbo yande ya l’emunyi. Nde kokoka kakitwana la mbo yakɔ dia ndjâla ombeki waki Kristo. Omalɔkɔ, nde akahandja diaaso diakandakondja dia ndjâla owandji kâmɛ la Kristo lo Diolelo dia l’olongo. Oko akate Yeso l’etena kakɔ: “Eko wulu le akanga w’engonyi, dia vo mboto lu diulelu dia [Nzambi, NW]!”—Mako 10:17-23.
5 Ɛnɔnyi efula l’ɔkɔngɔ, ɔpɔstɔlɔ Paulo akayofundɛka Timɔtɛ mukanda, etena kɛsɔ ko nde ele l’Ɛfɛsɔ, osomba a woke w’amindji w’okanda. Nde akawohola ate: “Ne dia shu kundja nduku l’engo la kete nye, ku hateyi ntola nduku engo uma la kete. Keli lam’ayutuyala la diango dia nde ndu la diango dia ndota, shu tayuyala la ongenongeno lu diango diako.” Kema kɔlɔ kamba olimu woho wa kondja ndo kundjiyɛ nkumbo kayɛ “diango dia nde la dia ndota” di’amɛna. Koko Paulo akatewola ate: “Wane wakomiya ndjala engonyi, wayoko lu uhimba la lu djunga ndu lu saki ya dinginya yatutshelaka antu kolo, yayuditsha antu lu elanyelu la eshishwelu.” Satana ekɔ kanga mayɛlɛ w’efula. Nde totatɛka la mɔnganya onto lo tangangɔ ta totshitshɛ. L’ɔkɔngɔ mbatondoyaka la esokoya a wolo efula—mbala mɔtshi lo kosha diaaso dia kondja olimu wahombayɛ nongolaka falanga y’efula koko wakɔsɛ wenya wahombayɛ ndjasha l’elimu wa lo nyuma. Naka hatolami ɔlɔlɔ, kete “saki ka ukundji” kokaka sowola saki kaso l’akambo w’endana la Diolelo. Oko akadite Paulo, “Amotshi wakadiyangi [saki k’ukundji], waketola uma lu mbuka ka mbetawo, wakayatshatsha la nyangu ya wulu efula.”—1 Tim. 6:7-10.
6 Oma lo ngandji k’oshika kakandokaka Okristo w’ɔnango, Paulo akakeketsha Timɔtɛ ate: “Ulawo akambu wa kolo,” ndo, “Olo ta di’ololo dia mbetawo.” (1 Tim. 6:11, 12) Sho pombaka mbidja weolo w’efula endaka hatolange kotwama oma lo lɔsɛnɔ loludi la saki k’okundji lele l’andja ɔnɛ wotudingi. Koko, naka tayɔlɔsha mɛtɛ lo mbetawɔ kaso, kete Jehowa hotokalɛ pondjo. Oyadi kânga lɔsɛnɔ laya wolo kana elimu wa kamba kema, nde ayolama dia sho kondja diangɔ diele laso ohomba mɛtɛ.—Heb. 13:5, 6.
ƐNYƐLƆ KAKATOTSHIKƐ AMBEKI WA NTONDO
7 L’ɔkɔngɔ a nde mbalowanya l’ɔlɔlɔ tshɛ, Yeso akatome apɔstɔlɔ ande dia vɔ ntshɔ atosambisha lokumu l’ɔlɔlɔ l’Isariyɛlɛ. “Diulelu dia l’ulungu diaya suki.” Ande losango la wangasanu lakilɔ lee! Yeso Kristo, Nkumekanga ndo Mɛsiya, aki l’atei awɔ. Lam’ele apɔstɔlɔ wakayashaka l’olimu wa Nzambi, Yeso akâkeketsha dia vɔ mbɛkama Nzambi l’eshikikelo k’ɔnɛ nde ayokotsha ehomba awɔ. Diakɔ mbakandate ate: “Tanyukimelaki engo ka ntsho lu lokendo lanyu. Tanyukimelaki danga kuyanga diutu, kuyanga mbu ya nde, kuyanga falanga. Tanyuyalaki la ekutu ehendi. Lu luudu tshe layunyoto, kanyuhangi loko edja ndu lam’ayunyunela.” (Mat. 10:5-10; Luka 9:1-6; 10:4-7) Jehowa akalame di’ehomba awɔ kotshama oma le anangɛwɔ w’Ase Isariyɛlɛ, wanɛ waki la mbekelo ka nongolaka angɛndangɛnda.
8 L’ɔkɔngɔ diko, yema la ntondo ka nyɔi kande, Yeso akɛnya apɔstɔlɔ ande dia vɔ wayohombaka kamba olimu awɔ la ntondo k’akambo a weoho la weoho. Mɛtɛ, l’etena k’ɔhɛnyɔhɛnyɔ, takiwɔ la dia nongwama nto le Ase Isariyɛlɛ woho akɔ wâmɛ. Ndo nto, aha la tshimbatshimba, vɔ waki la dia mɛmbɛ wedja ekina w’Apanganu lokumu la Diolelo. L’etena kɛsɔ mbakiwɔ la dia mɛmba “tapa” kamɛ la “diutu.” Koko, waki la dia tetemala la nyanga Diolelo diaki Jehowa ntondo la ɔlɔlɔ ande, ndo monga l’eshikikelo k’ɔnɛ Jehowa ayɔtshɔkɔla weolo awɔ dia vɔ kondja mbo ya ndɛ ndo ahɔndɔ wakawahombaka.—Luka 22:35-37.
9 Ɔpɔstɔlɔ Paulo akasha ɛnyɛlɔ k’ɔlɔlɔ ka woho wa kamba olimu la dako dia Yeso sɔ. Paulo akahɛ lumu lande l’olimu ande. (Etsha 20:24, 25) Lam’akandatshɔkaka dia tosambisha lo wodja ɔmɔtshi, nde akatasalaka apɛma dia kotsha ehomba ande wa l’emunyi. Nde kokongɛka di’akina kotsha ehomba ande. (Etsha 18:1-4; 1 Tes. 2:9; 1 Kor. 9:18) Koko, nde akalongolaka la lowando tshɛ weshasha wa lolango wakayakaka oma le wanɛ wakôlongolaka ndo wakalangaka mbɛnya ngandji kawɔ la lowando lawɔ. (Etsha 16:15, 34; Fil. 4:15-17) Nde kokeketshaka Akristo w’apami la wa amato dia vɔ takɔ ɛkɛndɛ awɔ wa lo nkumbo woho wa ntshɔ dia tosambisha, koko dia vɔ kotsha ɛkɛndɛ awɔ wotshikitanyi aha la mbɛkama wedi ɔtɔi. Nde akalake dia vɔ kamba elimu l’anya awɔ, dia vɔ nanga nkumbo yawɔ ndo dia vɔ monga la lokaho otsha le anyawɔ. (Ef. 4:28; 2 Tes. 3:7-12; Tito 2:3-5) Nde akâkeketsha nto dia vɔ mbidja wɛkamu awɔ, aha lo mbo ya l’emunyi, koko le Nzambi ndo dia vɔ mɛnya oma lo lɔkɛwɔ lawɔ ɔnɛ mɛtɛ, vɔ mbeyaka diangɔ dioleki ohomba lo lɔsɛnɔ. Lo ndjela wetshelo waki Yeso, diaki lawɔ ko dia nyanga Diolelo diaki Nzambi la ntondo l’ɔlɔlɔ ande.—Fil. 1:9-11.
KITSHA DIOLELO LO DIHOLE DIA NTONDO LO LƆSƐNƆ LAYƐ
10 Wenya engana wetsha onto l’onto la l’atei aso dia sambisha anto akina lokumu l’ɔlɔlɔ la Diolelo na? Lo yɛdikɔ mɔtshi, dui sɔ mendanaka l’akoka wele laso ndo nto, diɔ ndeka kimamɛ la lowando l’oshika lele laso. Tatohɛke dia Yeso kombuta ate: ‘Yanga Diolelo etena keyɛ kema la dui dikina dia ntsha.’ Ndo nde kombuta ate: ‘Edja tshɛ kayoyosambishaka Diolelo esangɔ ɛmɔtshi, wɛ ayotshaka kɛnɛ tshɛ kele ohomba.’ Nde kombuta koyanga ɔnɛ: ‘Tatɛ̂ ndjasha l’ohetoheto tshɛ l’ehomba wa Diolelo koko, naka Dikongɛ di’Oyoyo di’eke etale, otetemalake la ntsha kiambo kambo mɔtshi l’olimu a Nzambi koko ɔsɛnake oko anto akina.’ Lam’akandeyaka ohomba wa Diolelo l’ɔlɔlɔ tshɛ, nde akɛnya lolango la She lo dikambo diakɔ ata ate: “Keli nyutayangi diulelu diandi.” Kana, oko akate ɔpɔstɔlɔ Mateu: “Keli ntundu nyutayangi diulelu la ololo wa [Nzambi, NW].” (Luka 12:31; Mat. 6:33) Kânga mbele efula ka l’atei aso mɛnaka di’ekɔ ohomba wa ntsha elimu ɛmɔtshi dia ndjakotsha kana dia kotsha ehomba wa l’emunyi wa nkumbo yaso, naka mɛtɛ tekɔ la mbetawɔ, kete tayahɛ nyumu yaso l’olimu wakatosha Nzambi w’endana la Diolelo diande. L’etena kakɔ kâmɛ, hatotohɛ kotsha ɛkɛndɛ wa lo nkumbo yaso.—1 Tim. 5:8; Tuk. 29:15.
11 Amɔtshi a l’atei aso wekɔ l’akoka wa mbetsha wenya efula l’olimu w’esambishelo oleki akina. Koko, lo wɛla ande w’endana la weoho wa kɛtɛ yotshikitanyi, Yeso akɛnya ɔnɛ: wanɛ tshɛ wele l’etema wafɔna la kɛtɛ y’amɛna wayɔtɔ elowa. Lo yɛdikɔ yakɔna? Akoka w’onto l’onto tshikitana. Lotshundu, yonge ndo ɛkɛndɛ wa lo nkumbo wekɔ awui wakoka mbidjama lomba. Koko, naka lowando la l’otema ɔtɔi lekɔ, kete tayokokaka ntsha olimu w’efula.—Mat. 13:19, 23.
12 Ekɔ ɔlɔlɔ ndjâla l’eweso wayokoka tokimanyiya dia sho kamba olimu wa Diolelo l’ɔlɔlɔ tshɛ. Ɛlɔngɔlɔngɔ kokaka kana lomba ɔlɔlɔ lo menda ɛnyɛlɔ kakâtshikɛ Timɔtɛ, Okristo w’ɔlɔngɔlɔngɔ waki l’ohetoheto. (Fil. 2:19-22) Kakɔna kayoleka dimɛna efula le wɔ lâdiko dia ndjatambiya l’ɔnɔngɔ w’akambi wa lo tena ndo lo tena l’ɔkɔngɔ a vɔ shidiya kalasa yawɔ ya l’emunyi na? Ndo epalanga lawɔ wayokoka kondja ɛngɛnɔngɛnɔ lo ndjashikikɛ eweso wa lo nyuma.
13 Lo dihole dia sho mɔnyɔla wanɛ wɛnaso ɔnɛ vɔ kokaka kamba efula, mbetawɔ kaso pombaka tosokoya dia sho ndjalowanya woho wa kambɛ Nzambi l’akoka aso tshɛ. (Romo 14:10-12; Ngal. 6:4) Oko wɛnamadiɔ lo dikambo dia Jɔbɔ, Satana sɛmaka ate sho ndjakiyanyaka efula dikambo dia mbo yaso ya l’emunyi, di’ɔngɔnyi aso ndo di’ɔlɔ aso shoamɛmɛ, ndo ɔnɛ naka sho kambɛka Nzambi olimu kete lo dikambo dia lokaki laso. Koko, naka mɛtɛ tayoyanga Diolelo ntondo, kete tayosha lonya dia mɛnya ɔnɛ: Diabolo she kashi ka mamba. Tayɛnya hwe ɔnɛ: olimu a Nzambi mbɔ̂sa dihole dia ntondo lo sɛnɔ yaso koko aha mbo ya l’emunyi kana ɔlɔ aso shoamɛmɛ. Ɔnkɔnɛ, oma l’ɛtɛkɛta l’etsha aso, mbayotɛnya ngandji kaso k’otamanya otsha le Jehowa, osukɔ wa kɔlamelo wasukɛso lowandji lande la l’andja w’otondo ndo ngandji kokaso anyaso.—Tuk. 27:11; Jobo 1:9-11; 2:4, 5.
14 Monga l’ekongelo k’ɔlɔlɔ kokaka tokimanyiya dia sho kamba efula oleki woho wototosala. Jehowa ndamɛmɛ ekɔ la ‘etena kakashikikɛma’ dia kotsha sangwelo diande, ndo ayonga ɔlɔlɔ dia sho mbôkoya. (Etum. 9:5; Mako 1:15; Ngal. 4:4) Endaka kokaka, ekɔ dimɛna dia sho kambaka olimu akɔ ɔsɔ mbala ɔtɔi kana ndekana lo ndjela lushi lakakongɛma lo lomingu la lomingu. L’andja w’otondo, akumi wa nunu di’Ɛmɛnyi wa Jehowa wakɔshi olimu w’ambatshi mboka wa tshanda ndo, lo yɛdikɔ ya l’atei atei, wetshakɔ wenya a tango ehende kana ndekana lushi la lushi l’esambishelo ka lokumu l’ɔlɔlɔ. Ɔsɔku mbatsha amɔtshi tena tshɛ; akina tshâka ngasɔ lo tena dimɔtshi ɔnɔnyi l’ɔnɔnyi. Nunu la nunu dikina wekɔ lo kamba oko ambatshi mboka wa pondjo ndo vɔ mbetshaka wenya a tango esato kana ndekana lo lushi lo sambisha lokumu la Diolelo. Akina oko ambatshi mboka wotshikitanyi kana wâ misiyɔnɛrɛ, wekɔ lo mbetsha wenya efula l’olimu wa Diolelo. Oyadi l’olimu w’esambishelo mbeso kana kema, sho pombaka kamba olimu la waaso tshɛ wakondjaso dia mbewoya anto akina wayolanga tôka elongamelo ka Diolelo. (Ɛdika la Joani 4:7-15.) Sho pombaka kanyiya sho tshɛ ɔlɔlɔ lo dikambo dia kɛnɛ kalembetshiya pɔlɔfɛsi ka Yeso kata ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” Saki kaso pombaka monga ka kamba olimu akɔ ɔsɔ lo yɛdikɔ y’akoka aso.—Mat. 24:14; Ef. 5:15-17.
15 Lo bɛkɛ tshɛ dia l’andja w’otondo, oyadi lo wodja akɔna asɛnawɔ, Ɛmɛnyi wa Jehowa ndjashaka l’ohetoheto ndo kâmɛ lo diɛsɛ diakɔ dia woke di’olimu sɔ. Vɔ kambaka olimu vɔamɛmɛ la dako dia lo Bible diakasambiyama oma le Nzambi diata ate: “Okone, anyasu wa ngandji, nyutetemali, nyushikikali, nyutamanya ntsha ulimu wa Khumadiondjo nshi tshe, ne dia nyu mbeyaka nyati: Pa kanyu le Khumadiondjo kema anyanya.”—1 Kor. 15:58.
[Wembola]
1. (a) Ɛnɔnyi 1 900 wamboshila la mbeta, lande na kakate Yeso ate: kele la ntondo nyoyange Diolelo na? (b) Dimbola diakɔna diahombaso ndjaoka na?
2. Diangɔ diakɔna diayanga anto efula la lokaki tshɛ na?
3. (a) Weoho akɔna wa diangɔ di’oshinga wolo diakakeketshaka Yeso ambeki ande dia vɔ nyanga, ndo lande na? (b) Lande na kele takikɔ ohomba w’efula le wɔ dia vɔ kiyana di’ehomba wa l’emunyi na?
4. Naka onto ambokitsha yambalo y’efula lo mbo ya l’emunyi, etombelo akɔna wokuki tanema na? Sha ɛnyɛlɔ.
5. (a) Paulo akakeketsha Timɔtɛ dia nde ngɛnangɛna la diangɔ diakɔna, ndo lande na? (b) Woho akɔna wakamba Satana olimu la “saki ka ukundji” oko djonga y’elanyelo na?
6. (a) Kakɔna kahombaso ntsha di’aha mundama lo djonga na? (b) Onde ɔsɔ ekɔ dionga diahombama lo menda woho wambofukutana akambo w’okundji wa l’andja w’otondo ɛlɔ kɛnɛ oka?
7. Etena kakatome Yeso apɔstɔlɔ dia vɔ tosambisha l’Isariyɛlɛ, alako akɔna wakandawasha, ndo lande na kakiwɔ ohomba na?
8. (a) Lande na Yeso akawasha alako wotshikitanyi yema la ntondo ka nyɔi kande na? (b) Ko kakɔna kakahombe mbɔsa dihole dia ntondo lo sɛnɔ yawɔ nshi tshɛ na?
9. (a) Woho akɔna wakakitsha Paulo Diolelo lo dihole dia ntondo na? (b) Woho akɔna akandayakotshɛka ehomba ande wa l’emunyi na? (c) Dako diakɔna diakandasha anto akina lo dikambo diakɔ sɔ na?
10. (a) ‘Nyanga Diolelo ntondo’ kɛdikɛdi na? (b) Ko kakɔna kahatahombe mbahola lomba na?
11. (a) Woho akɔna wakɛnya Yeso lo wɛla ɔnɛ: aha anto tshɛ mbahomba mbetsha wenya efula woho ɔtɔi l’ohandjwelo a lokumu la Diolelo na? (b) Akambo akɔna w’ɔtɔ l’atei a dui sɔ na?
12. Naa oyango ɔmɔtshi w’oshika wa lo nyuma wakeketshama ɛlɔngɔlɔngɔ dia vɔ ndjadjangɛ lo woho wa lânde na?
13. (a) Akɔna akoka nshikikɛ dia kɛnɛ kakokayɛ ntsha wɛmɛmɛ l’olimu wa Diolelo na? (b) Naka mɛtɛ tayoyanga Diolelo ntondo ka diangɔ dikina tshɛ, kayotɛnya oma l’otshelo ɔsɔ na?
14. (a) Lande na kele ekɔ ohomba monga l’ekongelo k’olimu w’esambishelo na? (b) Wenya engana wetsha Ɛmɛnyi efula l’olimu w’esambishelo, ndo lande na?
15. Lande na kele, lo ndjela oko akanayɛ, dako diofundami lo 1 Koreto 15:58 mendanaka l’olimu aso na?
OVUSWELO A LƆKƐTSHANYA
● Etena kakate Yeso ate: kele ntondo nyoyange Diolelo, diangɔ diakɔna diahomba kitshama lo dihole dia hende oko akandashikikɛ na?
● Kanyi yakɔna yahombaso monga layɔ lo dikambo di’okotshelo w’ehomba aso wa l’emunyi kana wa nkumbo yaso na? Ekimanyielo kakɔna kayotosha Nzambi na?
● Onde na, wenya wetshaso lam’akambaso olimu a Diolelo wekɔ l’ohomba oka? Lande na?