Tshapita 14
‘Dimi Lambodja Lanyu Sheke ya Diolelo’
AKI l’otsho, la ntondo ka Yeso ndjakema, mbakandatɛ apɔstɔlɔ ande wa kɔlamelo ate: ‘Lo luudu la Papa ekɔ mvudu efula. Dimi lambotshɔ dia tonyɔlɔngɔswɛla dihole, dia nyu ndjâla lɛnɛ ayomoyala.’ Nde akanyomowatɛ ate: “Dimi lambodja lanyu sheke oko akadje Papa lami sheke ya diolelo.” (Joa. 14:2, 3; Luka 22:29, NW) Ande elongamelo k’ɔngɛnɔngɛnɔ efula kakandakitsha la ntondo kawɔ lee!
2 Koko Yeso konembetshiyaka ɔnɛ paka apɔstɔlɔ asɔ ato mbahomba mbolɛ kâmɛ lande lo Diolelo diande dia l’olongo. L’ɔkɔngɔ diko, akayewɔmaka di’ɔnɛ: anto 144 000 wakasombama oma la kɛtɛ pombaka kondja diɛsɛ dia woke sɔ. (Eny. 5:9, 10; 14:1, 4) Onde ɛlɔ kɛnɛ ekɔ anto amɔtshi wayanga dia kondja diɛsɛ sɔ oka?
TSHUMANYELO W’EKITƆ WA DIOLELO
3 L’ɔkɔngɔ wa Joani Obatizanyi mbidjama lo lokanu oma le Hɛrɔdɛ Atipa, Yeso akasale olimu a woke w’esambishelo ka lo sɛkɛ, l’olimu akɔ nde akakotolaka yambalo y’anto oya lo “diulelu dia l’ulungu.” (Mat. 4:12, 17) Nde akokiya anto dia vɔ wayonga la diaaso dia mbɔtɔ lo Diolelo diakɔ sɔ, ndo ambeki ande wakayatshutshuya dia koma l’oyango ɔsɔ.—Mat. 5:3, 10, 20; 7:21; 11:12.
4 Lo Pɛntɛkɔsta ka l’ɔnɔnyi 33 T.D., ambeki wa ntondo wakakitama nyuma k’ekila. (Etsha 2:1-4; 2 Kor. 1:21, 22) Tɛdikɔ takɔshi Nzambi dia mbisha anto amɔtshi panda katɔla otsha lo lɔsɛnɔ la pondjo l’olongo, takeyama. Petero akakambe olimu la “sapi ya diulelu dia l’ulungu” dia diholɛ anto lokuke otsha l’ewo kɛsɔ—ntondo le Ase Juda, ko le Ase Samariya, ko l’ɔkɔngɔ diko le Ase wedja w’Apanganu. (Mat. 16:19) Wakakotola yambalo ya lânde lo ɔlɔngɔswɛlɔ wa lowandji lakɔ lɔsɔ lahomba nɔmbɔla anto l’edja k’ɛnɔnyi 1 000, ndo suke la mikanda tshɛ wakasambiyama wele l’Afundelo wa lo Grɛkɛ w’Akristo, wakalekaka tɛkɛta dikambo di’olui ɔsɔ w’ekitɔ wa Diolelo—wetama ɔnɛ: “ekilami,” wanɛ “waketama . . . dia leta la l’ulungu.”a
5 Vɔ kombetama otsha l’olongo l’ɔtɛ w’ɔnɛ vɔ wakaleke ekambi tshɛ waki Nzambi wakavu la ntondo ka Pɛntɛkɔsta ka l’ɔnɔnyi 33 T.D. ɔlɔlɔ. (Mat. 11:11) Koko l’etena kɛsɔ mbakatatɛ Jehowa sɔnɔla wanɛ wahomba mbolɛ kâmɛ la Yeso Kristo. Deko oko 19 l’ɔkɔngɔ w’akambo asɔ, aki paka leeta ɔtɔi loto, leeta l’otsha l’olongo. Dikambo sɔ diaki ngandji ka mamba kakɛnya Nzambi le olui wa tshitshɛ w’anto dia vɔ tɔla okotshamelo w’asangwelo ande wolodi la lomba ndo la ngandji otsha la ntondo.—Ef. 2:8-10.
6 L’edjedja ka wonya, lofulo la tshitshɛ lakasɔnwama l’anto 144 000 lakahombe koka. Wodjelo wa tshapa ya komelo kana ya pondjo le Ase Isariyɛlɛ asɔ wa lo nyuma oko anto wambetawɔma wakahombe komɛ. (Eny. 7:1-8) L’etena kakɔ, oma l’ekimanyielo ka nyuma kande la k’ewo ka Dui diande kakandasha ɔlɔngɔswamelo ande wɛnama, Jehowa akahombe nɔmbɔla akambo lo yoho ya kotsha etenyi ka hende ka sangwelo diande, oko wɔkɔndwamidiɔ lo Enyelo 7:9-17. “Ului a wuki w’antu” wotombi oma lo wedja tshɛ wakahombe sangana, ndo monga l’elongamelo kahɛtshahɛtsha asolo ka panda lo fɔnu ka woke ko ndjɔsɛna pondjo pondjo lo lokokele l’atei a Paradiso ka la kɛtɛ. Etena kasɛdingolaso akambo wakasalema, mɛnamaka di’ɔnɛ: leeta l’otsha l’olongo lakakomɛ oya l’ɔnɔnyi 1935 T.D., lam’akayohotwamaka elongamelo kele la “ului a wuki w’antu.” Tatɛ oma l’etena kɛsɔ, oko nunu di’atshikadi a wanɛ wakenga olui w’otsha l’olongo wakatatɛ sangana kâmɛ la miliyɔ y’atɛmɔdi wa Jehowa walongamɛ l’otema ɔtɔi dia ndjɔsɛna lanɛ la kɛtɛ.
7 Onde dikambo sɔ nembetshiyaka ɔnɛ ndoko onto l’etama ɛlɔ kɛnɛ oma le Nzambi otsha lo lɔsɛnɔ la l’olongo oka? Polo ndo lam’ayowodjama tshapa ya komelo kana ya pondjo, amɔtshi kokaka ndjoshisha kɔlamelo yawɔ ko akina ndjɔsɔnwama dia mbɔsa ahole awɔ. Koko, naka sho kana lomba, kete dikambo sɔ pombaka ndjâla lo pai.
WOHO AKƆNA WEYAWƆ ƆNƐ VƆ WEKƆ ANA WA LO NYUMA NA?
8 Nyuma kaki Nzambi mbishaka Akristo wambobatizama, wanɛ wakalongola leeta l’otsha l’olongo, eshikikelo l’etema awɔ k’ɔnɛ vɔ wambotɔ oko ana wa lo nyuma. Ɔpɔstɔlɔ Paulo akɛnya dikambo diakɔ lam’akandafundɛ “ekilami” wa la Rɔmɔ, akɔndɔla ndo dikambo diaki l’etena kɛsɔ le Akristo wa mɛtɛ tshɛ. Nde akate ate: “Ne dia wane tshe watolombwamaka le [nyuma ka Nzambi, NW] mbeli ana wa [Nzambi, NW]. Nyu kunungula [nyuma, NW] ka lohombo ka nyukaluya lu woma. Keli nyu nyakalungula [nyuma, NW] ka nyete ana wa luta. Uma lu dikambo so, mbatutetaka [Nzambi, NW] shati: Aba! Shesu! [Nyuma, NW] ambuyaete omenyi kame la [timba taso, NW] ati: Ana wa [Nzambi, NW] mbesu. Naka shu tambuyala ana, keti ekito mbesu. Shu teko ekito wa [Nzambi, NW], ndu ekito kame la Kritu; naka shu tatusuwaka kame la ndi, keti tayutumbwama kame la ndi.”—Romo 1:7; 8:14-17.
9 Tolembete dia ɛtɛkɛta ehende wokambemi olimu lanɛ, ekɔ “[nyuma, NW]” la “[timba taso, NW].” Tshɛkɛta ya ntondo kɛdikɛdi wolo wahɛnama waki Nzambi wakamba olimu. Wolo akɔ kasha ana wa Nzambi wa lo nyuma eshikikelo l’etema awɔ ɔnɛ: vɔ wambotɔ le Nzambi. Nyuma kakɔ kɛsɔ nto mɛnyaka dikambo diakɔ oma lo tshimbo ya Dui dia Nzambi diakasambiyama, Bible, tɔ kele oko mukanda wakandafundɛ an’ande wa lo nyuma. (1 Pet. 1:10-12) Etena katâlaka wanɛ wakotama oma le nyuma k’ekila kɛnɛ kata Afundelo lo dikambo di’ana waki Nzambi wa lo nyuma, vɔ toyatɛka vɔate: ‘Dimi ɔsɔ atɛwɔ.’ Ɔnkɔnɛ, lo weoho wotshikitanyi, wolo wa Nzambi wakamba olimu mɛnyaka kâmɛ la timba tawɔ, mbuta ate wolo walosokoya wele lo timba tawɔ la l’etema awɔ, ɔnɛ: vɔ wekɔ ana wa Nzambi. Lo ndjela kɛnɛ kɛnya nyuma kaki Nzambi lo yoho shɔ, timba tawɔ ndo etema awɔ shikikala lo elongamelo kele lawɔ ka ndjâla ekitɔ kâmɛ la Kristo, ndo vɔ mbetawɔka ɛkɛndɛ wele l’ana wa Nzambi wa lo nyuma.—Fil. 3:13, 14.
10 Onde ndo wɛ mɛtɛ kele ɔtɔi ɔmɔtshi a l’atei awɔ oka? Naka ɔsɔku mbediɔ, kete wɛ ekɔ la diɛsɛ dia mamba. Koko, ayonga dindja di’efula le onto tshɛ dia mbuta ɔnɛ: onto tshɛ lele la yimba ya ngɔ l’akambo wa lo nyuma wa wolo ndo lasala olimu w’esambishelo l’ohetoheto kana lele la ngandji k’efula le anango pombaka ndjâla Okristo wokitami nyuma. Akambo asɔ tanemaka ndo le efula k’“ekoko ekina.” Ndo etema awɔ salanganaka lam’atowalaka Afundelo w’endana l’ekitɔ wa Kristo, koko vɔ hawoyange dia paka kondja ɛngɔ kaki kombalamɛ Nzambi. (Ɛdika la Walelo 16:1-40.) Vɔ wekɔ la mbetawɔ lo sangwelo di’oma l’etatelo diaki Nzambi di’endana la kɛtɛ ndo lowando lawɔ mbatshutshuyaka dia vɔ kamba la wolo awɔ dia tana dihole lɔkɔ.
WANƐ WASUNGANA NDƐ MAPA LA NƆ VINYƆ
11 Ɔnɔnyi tshɛ, lo ngɔndɔ ka Nisana 14, l’ɔkɔngɔ wa ɛɔtwɛlɔ ka wonya, ambeki waki Yeso Kristo w’akitami mbohɔka nyɔi kande lo kɛtɛ k’otondo, lo ndjela alako wakandasha apɔstɔlɔ ande. (Luka 22:19, 20) “Ekoko ekina” ndo vɔ lawɔ mbɔtɔka lo Eohwelo kakɔ kɛsɔ ka nyɔi ka Yeso, aha dia tɔlɛ mapa koyanga nɔ vinyɔ, koko vɔ mendaka dikambo diakɔ la dilɛmiɛlɔ tshɛ.
12 Dikambo sɔ kema oko nsɛlɛmɔnyi ka heyama ɔtɛ l’ekolo kasalema l’ɛtɛmwɛlɔ, koko diɔ diekɔ l’ohomba w’efula. L’eleko ka ntondo, ɔpɔstɔlɔ Paulo akahɛmɔla Akristo wa la Kɔrɛto la wa la Grɛkɛ waki kɔmbɔsaka dikambo sɔ la nɛmɔ diasungana, nde akate ate: “Okone untu tshe layole [mapa ɔnɛ, NW] kana no dikoho dia Khumadiondjo wuhu wahasungana, ndi ayuyala la unungu wa dimba la dikila dia Khumadiondjo.” Woho akɔna wakawakoke ndɛ la nɔ lo ‘woho wahasungana’ na? Lo woho wakiwɔ kɔnɔngɔsɔlaka etema awɔ la timba tawɔ lo dikambo sɔ. Diatɔnelo diakikɔ l’atei wa tshumanelo sɔ. Ndo amɔtshi wakakushiyaka mma la wanu la ntondo ka losanganya. Vɔ kɔmbɔsaka Dambo dia Nkumadiɔndjɔ dia Dikɔlɔ la nɛmɔ. Vɔ kokoka shihodia kitshimudi ya mapa la vinyɔ.—1 Kor. 11:17-34.
13 Naa kitshimudi yakɔ shɔ na? Aha kitshimudi y’ɔnɛ mapa la vinyɔ mpilɔka lo dihindo. Kristo hatoyalambolaka nto lo Eohwelo tshɛ ka nyɔi kande. Afundelo mbutaka ɔnɛ: “Kristu akakimoma etena otoi dia memba [pɛkato, NW] y’antu efula.” (Heb. 9:28; 10:10; Romo 6:9) Mapa w’aha l’edia la vinyɔ ya beela wekɔ paka alɛdi wɛnya didjidji dia demba dia Yeso diakakimɔma oko olambo la dikila diande diakatshulwama. Koko demba la dikila dia Yeso dia mɛtɛ wekɔ oshinga wolo efula! Demba di’onto di’aha la pɛkato diaki Yeso diakakimɔma di’anto kondja diaaso dia sɛna pondjo pondjo. (Joa. 6:51) Ndo dikila diande diakatshulwama diekɔ l’eyango ehende—mbɛdia pɛkato y’anto wele la mbetawɔ lo dikila diakɔ, ndo keketsha sheke y’oyoyo yakadje Nzambi kâmɛ l’etshumanelo k’Isariyɛlɛ wa lo nyuma kokengami l’Akristo wokitami nyuma. (1 Joa. 1:7; 1 Kor. 11:25; Ngal. 6:14-16) Oma lo tɛdikɔ tɔsɔ takɔsama mbakoka “limba la tshitshe l’ekoko” mbelamɛ akanga a losembwe oma le Nzambi, mbuta ate Nzambi ambâsɔndja lokokele l’anto. (Luka 12:32) Oma lo dikambo sɔ mbakokawɔ mbotama oma le nyuma oko ana wa Nzambi, dia vɔ mbolɛ kâmɛ la Kristo lo Diolelo diande dia l’olongo. L’ɔnɔnyi l’ɔnɔnyi, oko atowɔlɛkaka mapa la nɔ vinyɔ l’Eohwelo ka nyɔi ka Yeso, ɔsɔku mbatowosanyaka elongamelo kawɔ k’otsha l’olongo, vɔ mɛnyaka ndo lowando l’efula lele lawɔ dia ndjâla lo “sheki y’uyuyu,” Kristo kele losambi la lo sheke yakɔ.—Heb. 8:6-12.
“SHU TAYUTSHO KAME LA NYU”
14 “Ekoko ekina” shihodiaka woho wasalɛ Jehowa akitami, ndo vɔ wambokakatana kâmɛ lawɔ, wata vɔate: “Shu tayutsho kame la nyu, ne dia shu takuki lukumu ati: [Nzambi, NW] eko kame la nyu.” (Zak. 8:20-23) Aha paka dikambo dia vɔ sanganaka kâmɛ to koko, vɔ kambaka kâmɛ l’esambishelo ka lokumu l’ɔlɔlɔ la Diolelo lo kɛtɛ k’otondo. Koko “ekoko ekina” hawodjami l’atei wa “sheki y’uyuyu” kâmɛ l’Isariyɛlɛ wa lo nyuma koyanga l’atei wa “[sheke ya diolelo, NW]” yakadje Yeso nde la wanɛ wakasɔnama dia tɔsɛna l’olongo kâmɛ lande, diɔ diakɔ diahawakoke ndɛ mapa la nɔ vinyɔ lo Eohwelo ka nyɔi ka Yeso. (Luka 22:20, 29) Koko, oko wele “sheki y’uyuyu” yambokotsha oyango ayɔ, lo tshumanya atɔi wambotshikala wa l’atei wa “limba la tshitshe l’ekoko” otsha lo Diolelo dia l’olongo, “ekoko ekina” shikikɛka ɔnɛ: ɛtshɔkɔ wayowolongola la kɛtɛ oma lo Diolelo diakɔ sɔ waya suke. Vɔ mɛnaka ɔnɛ ekɔ diɛsɛ dia kambɛ Nzambi kâmɛ l’atshikadi, ekitɔ wa Diolelo lo “nshi y’ekumelu” nyɛ.
[Notɛ ka l’ɛsɛ ka dikatshi]
a Enda lo avɛsa wa lo mbɔtwɛlɔ ka lo mikanda ɛnɛ: Romo, 1 la 2 Koreto, Efeso, Filipi, Kolosai, Tito, 1 la 2 Petero ndo Ngalatiya 3:26-29, 1 Tesalonika 2:12, 2 Tesalonika 2:14, 2 Timote 4:8, Heberu 3:1, Jakoba 1:18, 1 Joani 3:1, 2 la lo Jude 1.
[Wembola]
1. L’otsho la ntondo ka Yeso ndjakema, naa elongamelo kakandakitsha la ntondo k’apɔstɔlɔ ande na?
2. Anto angana wayolɛ kâmɛ la Kristo lo Diolelo diande dia l’olongo na?
3. Lam’akandasalaka olimu ande w’esambishelo ka lo sɛkɛ, Yeso akokiyaka ampokami ande dia vɔ waki la diaaso diakɔna na?
4. (a) Etena kakɔna kakakitama ambeki wa ntondo wa Yeso nyuma k’ekila na? (b) Kakɔna kɛnya ɔnɛ yambalo yakakotwama oma k’etena kɛsɔ dia tshumanya ekitɔ wa Diolelo na?
5. Onde leeta lawɔ l’otsha l’olongo lakashama le wɔ dikambo di’ɔnɛ vɔ ndeka ekambi wa Nzambi wakasɛnaka la ntondo kawɔ ɔlɔlɔ oka?
6. (a) Lande na kahomba leeta l’otsha l’olongo komɛ l’etena kɛmɔtshi na? (b) Akɔna akahombe mbidja yimba dia pɔlɔfɛsi k’endana la “olui a wuki” kotshama ndo tɔ, ndo kakɔna kakasalema mɛtɛ na?
7. Onde amɔtshi kokaka nongola leeta l’otsha l’olongo kânga lo nshi nyɛ, ndo lande na akadimolayɛ ɔsɔku na?
8. L’ɛtɛkɛta akɔna wakalembetshiya Paulo ɔnɛ wanɛ wambotɔ oma le nyuma mbeyaka dikambo diakɔ na?
9. Woho akɔna wayaetɛ ‘nyuma tɔamɛmɛ’ ɔmɛnyi kâmɛ la timba t’anto wele mɛtɛ ana wa Nzambi na?
10. (a) Waonga akɔna wahakoke dia sho mbeya Okristo w’okitami na? (b) Ngande wɔsa “ekoko ekina” dihole diakâlamɛ Nzambi lo sangwelo diande na?
11. Wa na wɔtɔ lo Eohwelo ka nyɔi ka Yeso kasalema ɔnɔnyi l’ɔnɔnyi, ndo lande na?
12. Woho akɔna waki Akristo amɔtshi wa ntondo wa la Kɔrɛto kɔnɛmiyaka Dambo dia Dikɔlɔ dia Nkumadiɔndjɔ na?
13. Kitshimudi yakɔna yele la mapa la vinyɔ yakambema olimu lo Eohwelo ka nyɔi ka Yeso na?
14. (a) Lande na kahatɔlɛka “ekoko ekina” mapa la vinyɔ lo Eohwelo ka nyɔi ka Yeso, ndo kakɔna kalongamɛwɔ l’ɔngɛnɔngɛnɔ tshɛ na? (b) Woho akɔna wɔsawɔ kâmɛ kele lawɔ vɔ l’ekitɔ wa Diolelo na?
Ovuswelo a Lɔkɛtshanya
● Lande na kele Afundelo wa lo Grɛkɛ w’Akristo ndekaka tɛkɛta dikambo di’elongamelo ka l’olongo na?
● Akristo w’akitami, woho akɔna weyawɔ ɔnɛ: vɔ wambotɔ oko ana wa Nzambi na? Kitshimudi yakɔna yele la mapa la vinyɔ yatowɔlɛka lo Eohwelo ka nyɔi ka Yeso na?
● Woho akɔna watɛnyaka “ekoko ekina” ɔnɛ vɔ mɛtɛ wambokakatana kâmɛ la “limba la tshitshe l’ekoko” na?