Falanga Yakondjama Oma lo Weshasha wa la Lolango

Elimu tshɛ w’omaso kɔndɔla salemaka oma le akambi wayakimɔ la lolango lawɔ, dui sɔ mbakitshakitsha oshinga w’abuku. Olimu wa luudu la luudu ndo odianganyelo w’ekanda aso salemaka oma lo lolango l’Ɛmɛnyi wa Jehowa. Vɔamɛ mbatondja akuta awɔ dia kotsha ehomba awɔ. Dikumanyi dialɔmbɔla etshumanelo ndo ekambi w’olimu wâkimanyiya hawolongola difuto oma l’olimu wasalawɔ. Vɔ tondjaka falanga yawɔ hita dia kotsha ehomba awɔ.

Kânga anto wa l’Olui Walɔmbɔla ndo Ɛmɛnyi ekina wakamba lo tena ndo lo tena l’ɔlɔngɔswɛlɔ ndo l’otondjelo wa Bible la ekanda w’endana la Bible nongolaka paka tshenyi ya dikuta lo ɔngɛlɛlɔ wa falanga yawɔ yatondjawɔ, ndo lâdiko dia kɛsɔ, vɔ pangiamaka ndo ndeshamaka. Dui diakɔ diâmɛ mbasalema ndo le emendji w’eteta.

Ekanda aso kahemaka dia kimanyiya anto wɛnya posa ka l’otema ɔtɔi otsha lo Bible. Falanga yatondjama lo kɛnɛ k’endana la dihomɔ, l’otondjelo ndo l’otomelo w’ekanda tomba oma lo weshasha wa la lolango waki anto wayasha lo diewoyelo diaso, lo weshasha ɛsɔ, mbâhimi wɛnɛ waki Ɛmɛnyi wa Jehowa vɔamɛmɛ, ndo la weshasha w’okitela wokokiwɔ sala endaka ɛlɛmbɛ wa wodja mbetawɔka dikambo diakɔ.

Tɔshɛtɛshɛtɛ ta weshasha tanemaka l’ahole tshɛ wa lo sanganya kana lo losanganya la woke, dia onto tshɛ lalanga koka la kimɔ woshasha ɔmɔtshi. Ndoko ɛkɔngɔ wakɔngwama. Ndoko elambo kana etenyi ka dikumi kahikama. Oko wadita Afundelo, onto l’onto kokaka kimɔ oko akandatakani l’otema ande.​—⁠2 Koreto 8:12; 9:⁠7.

• Woho akɔna wosukame olimu tshɛ waki Ɛmɛnyi wa Jehowa oma lo falanga na?