Dietawo Diakona Diele La Wa Témoins de Jéhovah Na?
“Sho nangaka kôka oko akanaye, ne dia sho mbeyaka dia ahole tshe ato petshaka otemoelo one weye.” (Etsha 28:22, La Bible en français courant) Anto wa weke aso wa l’ateyi w’ana w’ase Juda wa lo Roma, lo siekele ka tondo nshi yaso nye, wakasha enyelo ka dimena. Wakeni dimena mimbola akanga wa dikambo oliki dia mboka wotata w’anto akina.
Nshi nye too, wa Témoins de Jéhovah wambodiene omalo omamatanyelo w’awui, onkone kema dimena dia we nyanga mbeya kene kakanawo le apetshani awo. Omaloko teko l’ongenongeno dia kukiya tokanyi taso tomotshi t’ohomba efula.
Bible, Yeso Kristo ndo Nzambi
Sho mbetawoka dia “efundelo tshe weko omale Nzambi.” (2 Timote 3:16) Kânga mbele anto amotshi mbutaka one sho kema mete akristo, dikambo so dieko kashi. Sho mbetawoka kame l’otomami Petero, lakate kene kendana la Yeso ate: “Ndoko lokombo lukina la tshina di’olongo lakashama le anto, lo kuki toshimbela.”—Etsha 4:12.
Okone, oko akate Yeso dia nde eko “Ona Nzambi” ndo ‘She mbakotumi,’ wa Témoins de Jéhovah mbetawoka dia Nzambi ndeka Yeso. (Joani 10:36; 6:57) Yeso ndamame aketawo: “Papa ndekami.” (Joani 14:28; 8:28) Awui ako mbele, sho hatetawo dione Yeso mbedima la She, oko alakanya Losato la lonzambi. Koko, sho mbetawoka dia nde akatongama male Nzambi ndo eko l’êse kande.—Kolosai 1:15; 1 Koreto 11:3.
L’oteketa wa français, lokombo la Nzambi ele Jéhovah. Bible mbutaka ate: “Weye dione lokombo laye, wememe, JÉHOVAH, we kele Ombuledi wa kete y’otondo tshe!” (Osambu 83:19, La Sainte Bible [1905], A. Crampon) Lamele nde aketawo oteketa oso, Yeso akakokomiya ambiki ande wolo dia lokombo la Nzambi, akalakanya dia vo nomba onkone: “Shesho lele l’olongo, lokombo laye la tomboami!” Ndameme too lawo akalombe Nzambi akate ate: “Lakenya lokombo laye le anto wakayambisha.”—Mateu 6:9; Joani 17:6.
Wa Témoins de Jéhovah mbetawoka dia vo pombaka ndjela enyelo kaki Yeso dia ndowanya anto akina lokombo la eyango waki Nzambi. Takôse lokombo la Témoins de Jéhovah, ne dia sho lo ndjela enyelo kaki Yeso, “Omenyi wa kolamelo.” (Enyelo 1:5; 3:14) Dio diako diele Isaya (43:10) mbutaka dia anto wele l’okende wa memale Nzambi: “‘Nyu nyeko emenyi ami,’ mbata Jéhovah, ‘eelo, ekambi ami wakamasonola.’ ”
Diolelo diaki Nzambi
Yeso akalakanya ambiki ande dia vo nomba ngane: “Diolelo diakiye diaye!”, ndo nde aketshe Diolelo ote wa wetshelo ande. (Mateu 6:10; Luka 4:43) Wa Témoins de Jéhovah mbetawoka dia Diolelo ele lowandji la mete la l’olongo layôle kete ndo Yeso Kristo mbele Owandji wahenama. “Nde aka longola lowandji l’aheka ande, mbata Bible, dia lowandji lakinde lakokane lo ki kaha l’ekomelo.”—Isaya 9:6, 7, Bible ka Jérusalem.
Koko Yeso Kristo honga ndameme otoyi w’Owandji wa lo Lowandji laki Nzambi. Ewandji emotshi efula wayonga lande kame l’olongo. Otomami Paulo akafunde ate: “Endaka sho tetemala, kete tayôle lande kamê.” (2 Timote 2:12) Oko wata Bible, lofulo l’anto wôlo dia tôle lande kamê l’olongo weko paka anto “nunu lokama la akumi aneyi l’aneyi, wakosama mala kete.”—Enyelo 14:1, 3.
Mete, lowandji tshe leko l’ohomba w’anto; wa Témoins de Jéhovah mbetawoka dia tônga la tônga t’anto akina, ladiko dia ewandji waka sonama dia tôle l’olongo, wayolongola loseno la pondjo. L’okongodiko, lo kete yambokadimo paradiso mbayodjase anto w’elolo wa lo Diolelo diaki Nzambi, vo tshe wayoyakitshakitsha lo lowandji laki Kristo nde la wane wayôle kâme lande. Onkone, wa Témoins de Jéhovah mbetawoka l’otema otoyi dia kete hayotolanyema ndo daka ne dia yela diele lo Bible diayokotshama: “Anto w’ololo wayokita kete ndo loko mbayowodjase pondjo.”—Esambu 37:29; 104:5.
Ko woho wakona wayoya Diolelo diaki Nzambi na? Onde paka omalo lolango l’anto tshe dia vo ndjayakitshakitsha lo Lowandji laki Nzambi? Keema, lo mete Bible menyaka hoe ate dia Diolelo ndja pombamaka Nzambi mbekama lo tshena pe lo akambo weta lane la kete. Onkone mbatande: “Nzambi lele l’olongo ayoshikike diolelo diahalanyemaki pondjo. Ndo diolelo diako . . . diayolanya waolelo akina ndo ayowaete oshiki, ko dio diame diayoshikikala pondjo.”—Danyele 2:44.
Etena kakona kayoya Diolelo diaki Nzambi na? Lo menda akambo wakafundama edja lo Bible ndo wakotshama nshi nye, wa Témoins de Jéhovah mbetawoka dia eyelo kako kaya suke efula. Tambonyolomba dia nyu sedingola ndo tosha washo lo akambo amotshi wakafundama edja wendana la “nshi y’ekomelo” ka dikonge dietena kene. Vo fundama lo Mateu 24:3-14; Luka 21:7-13, 25-31; 2 Timote 3:1-5.
Lamele sho ‘nangaka Jéhovah, Nzambi kaso, l’otema aso tshe, l’otondo aso she, la yimba yaso tshe ndo la wolo aso tshe ndo too sho nangaka osekaso onto oko ayalangaso,’ sho kema la shonodi l’akambo w’endana la wedja, lokoho la demba kana lo eongelo. (Mako 12:30, 31) Sho mbewomaka efula lo wedja tshe malo ngandji kokana anangeso. (Joani 13:35; 1 Joani 3:10-12) Omaloko, sho hatoto lo awui wa politike ya wedja. Sho salaka wolo dia mbokoya ambiki wa nshi ya tondo waki Yeso, lakate diakiwo, ate: “Vo kema wa l’andja oko wemi kema wa l’andja.” (Joani 17:16) Sho mbetawoka dia mangana l’andja nimbitshiyaka tshika awui wa mindo, wasalema efula nshi nye, oko okukiso shila nkashi, wovi, loseka, monanyi, dieyanelo l’asa pami la pami kana l’asa womoto la womoto, woho wa kolo wa kamba la dikila, otemwelo wa dikishi ndo weho ekina wa ditshelo dia tona Bible.—1 Koreto 6:9-11; Efeso 5:3-5; Etsha 15:28, 29.
Dikongelo dia nshi yayoya
Wa Témoins de Jéhovah mbetawoka dia tshe hakome kame la loseno la nshi nye. Vo mbetawoka dia Jéhovah akatumi Kristo la kete dia ndjokimo dikila diande oko olambo dia anto wenami ololo la tondo ka Nzambi ndo wa longole loseno la pondjo lo dikonge dietena k’akambo w’eyoyo. Oko akate otomami waki Yeso omotshi onkone: “Kakiane sho tambenama anto w’ololo malo dikila diande.” (Romo 5:9; Mateu 20:28) Wa Témoins de Jéhovah mbokaka Nzambi l’Onande losaka efula l’otshungoelo wa dihola mboka otshalo loseno layaye.
Wa Témoins de Jéhovah weko la dikongelo dia loseno l’oyoyo omalo ekimanyelo ka elwelo k’anto lo Diolelo diaki Nzambi. Vo mbetawoka, oko alakanya Bible dia, lama wavo onto, nde hasene too mbuta ate komeka la sena ndo “lushi lako tokanyi tande shishoka.” (Osambu 146:3, 4; Ezekiyele 18:4, MN; Ondaki 9:5) Êlo, loseno l’oyoyo le wane wambovo kimame lo dikambo dia Nzambi ayowawoho ndo ayowawolola.—Joani 5:28, 29.
Koko wa Témoins de Jéhovah suyaka l’otema otoyi dia efula ka anto wakasene nshi nye wayoka etena kayolanyema waolelo tshe wele nshi nye male Diolelo diaki Nzambi, oko akake Noa la nkumbo kande lamakalo mvula k’elola; wayotetemala la sena lo kete yayolongosama. (Mateu 24:36-39; 2 Petero 3:5-7, 13) Vo mbetawoka dia eeko kako tombaka malo tediko ta lombama male Jéhovah, oko wata Bible: “Andja wayeta . . . , koko one la yela lolango laki Nzambi ayotshikala pondjo.”—1 Joani 2:17; Osambo 37:11; Enyelo 7:9, 13-15; 21:1-5.
Nyu menaka dia eko wolo sho shila lo kiandakanda nye tokanyi (wetshelo) tshe taki wa Témoins de Jéhovah, koko tambonyolomba dia nyu tetemala la mimbola lo kene kendana lawo.
[Blurb on page 4]
Takôse lokombo la Témoins de Jéhovah, ne dia sho lo ndjela enyelo kaki Yeso