Tshapita 28
Tôkani lo Ngandji
1. (a) Woho akona wakokaye monga omotshi a l’atei w’olongoswamelo waki Nzambi na? (b) Olembe akona wahombaye kitanyia na?
ETENA katayahame lo ewo k’endana la Jehowa Nzambi ndo k’endana l’eyango ande, we ayoka lâladi la mbotone tena tshe l’anto ane wele laye mbetawo kame. Oma lo ntsha ngaso, we ayokoma omotshi a l’atei w’olongoswamelo waki Nzambi w’enama, lene ele diwoto dia mete dia Lokristo tanemaka. Aha la tshimbatshimba, we ayohomba kitanyia olembe one: “Nyulangi [nkumbo k’otondo k’anangeso, “NW”].”—1 Petero 2:17; 5:8, 9.
2. (a) Olembe akona w’oyoyo wakasha Yeso ambeki ande na? (b) Eteketa ene: “nyu mbukana” la “nyu nyayukana” enyawo na? (c) Ohomba akona wa monga la ngandji na?
2 Yeso Kristo akakokome ambeki ande dia mbâwenya lande na kele eko ohomba dia vo mbokana ngandji. Nde akawate ate: “Olembe w’uyuyu mbamumunyusha, dia nyu mbukana ngandji. Uma lu dikambu ne, antu tshe wayeya vati: Ambeki ami mbenyu, naka nyayukana ngandji.” (Joani 13:34, 35) Eteketa ene: “nyu mbokana” la “nyayukana” menyaka l’ololo tshe dia Akristo a mete wakahombe monga kame l’atei w’olui ako kana w’olongoswamelo ako wame. (Romo 12:5; Efeso 4:25) Olongoswamelo ako akahombe mbeyama oma lo ngandji kene kahomba mbokana wane wele l’atei awo. Endaka onto kema la ngandji, kete akambo akina tshe anyanya ato mbewo.—1 Koreto 13:1-3.
3. Woho akona wateketa Bible efula di’ohomba wa mboka anangeso ngandji na?
3 Omaloko, waki lo mbohola Akristo wa ntondo tena efula onkone: “Nyukani ngandji uku untu l’ongangu.” “[Nyolongwani, NW].” “Nyukambaneli.” “Nyukani ketshi, nyuyali la memakana.” “Nyukikaneli kolo. Nyudimanyanyia kolo yanyu, naka untu eko la ukina dikambu.” “Nyukikitshanya, ndu nyudianya.” “Nyuyali la ki, l’atei anyu.” “Nyutamanya mbukana ngandji.”—Romo 12:10; 15:7; Ngalatiya 5:13; Efeso 4:32; Kolosai 3:13, 14; 1 Tesalonika 5:11, 13; 1 Petero 4:8; 1 Joani 3:23; 4:7, 11.
4. (a) Kakona k’enya one Akristo pombaka mboka anto akina ngandji lo dihole dia voameme ato ‘mbokana’ ngandji na? (b) Wa na wahomba Akristo mboka ngandji woho wotshikitanyi na?
4 Koko, dikambo so hadiolange mbuta one: Akristo a mete pombaka nanga paka anyawo wele l’atei w’olongoswamelo waki Nzambi ato. Vo pombaka mboka ndo anto akina ngandji. Mete, Bible mbâkokomiyaka dia vo ndola “la ngandji untu la unyandi, untu la unyandi, ndu le antu tshe.” (1 Tesalonika 3:12; 5:15) Ɛnya lokanyi lahombama ndo l’otone, otomami Paulo akate ate: “Tutshelaki antu tshe ololo, djekaleka le [wane wele anangeso wa lo mbetawo, “NW”].” (Ngalatiya 6:10) Omaloko, Akristo pombaka mboka anto tshe ngandji, oyadi kânga atunyi awo, koko vo pombaka mboka anangewo wa lo nyuma ngandji koleki.—Mateu 5:44.
5. Kakona k’enya one Akristo wa mete, wa nshi ya ntondo ndo wa nshi nye wakeyamaka oma lo ngandji kokanawo na?
5 Akristo wa ntondo wakeyamaka oma lo woho one wakiwo lo mbokana ngandji. Lo ndjela Tertullien, ofundi omotshi wa l’eleko kahende, anto waki lo mbuta diakiwo voate: ‘Nyende woho one wokanawo ngandji, ndo w’ewo suke la mvoena lee!’ Woho a ngandji ka ngaso k’enamako ɛlɔ kene l’atei w’Akristo wa mete. Onde mbuta ate laso ndoko dikambo kana ekakatanu wakoka tomba lasa Akristo wa mete?
ETOMBELO W’OMA LO OHOMBELO W’OLOWANYI
6. Dikambo kuna diele kânga Akristo wa mete tshelaneka kolo tena dimotshi lam’asawo na?
6 Oma lo wekelo aye wa Bible, we ambolembetɛ hwe dia sho tshe takahene kema kokele oma le ambutshi aso wa ntondo Adama la Eva. (Romo 5:12) Omaloko, sho kotwamaka dia ntsha kolo. Bible mbutaka ate: “Shu tshe tatutakanaka [tena efula, NW].” (Jakoba 3:2; Romo 3:23) Ndo we pombaka mbeya dia wane watanema l’atei w’olongoswamelo waki Nzambi kema anto wele kokele ndo tena dimotshi watosalaka akambo wa kolo. Dikambo so kokaka tondja ekakatanu kânga l’atei w’Akristo a mete.
7. (a) Dikambo kuna diele Evodi la Sutuke wakakeketshama dia vo “mbukana” na? (b) Kakona k’enya one amato w’ololo mbakiwo na?
7 Ohotokenda dikambo di’endana la Evodi nde la Sutuke, wamato ahende waki l’etshumanelo ka ntondo ka la Filipi. Otomami Paulo akafunde ate: “Dimi lambolaka [Evodi, NW] la Sutuke, [dia vo mbokana lo, NW] Khumadiondjo.” Lande na kaki Paulo lo keketsha wamato ako ahende “dia vo mbokana” na? Lo mete, Okakatanu omotshi waki lasawo. Bible hate woho waki okakatanu ako. Ondo vo waki lo mbokana kandj’ema. Koko, lo mete, vo waki wamato w’ololo efula. Nshi kambe y’ololo la ntondo, kana enonyi efula, vo waki Akristo la ntondo ka vo ndjokamba la Paulo olimu w’osambishelo. Dio diako diakandafundɛ etshumanelo ate: “Nkimanyia amantu ane, ne dia vo wakakambi la mi ulimu a lukumu l’ololo.”—Filipi 4:1-3.
8. (a) Naa tamu takatombe lasa Paulo nde la Baranaba na? (b) Otondonga we aki lawo ndo akenyi tamu tako, otoyota na?
8 Lushi lomotshi londjo lakatombe nto lasa Paulo la Baranaba onyande la lokɛndɔ. Etena kakiwo lo nongoswama dia ntsho lo lokendo lawo lahende l’olimu wa misionɛrɛ, Baranaba akate dia vo ntsho la Mako k’onango. Koko Paulo konanga vo ntsho la Mako, ne dia Mako akâtshike lo lokendo lawo la ntondo ndo akakalola lakande. (Etsha 13:13) Onkone mbata Bible ate: “Tamu ta wulu takayala, ku vo wakatana.” (Etsha 15:37-40) We mbokaka dikambo dia ngaso! otoyonga lawo ndo mena “tamu ta wulu” ta ngaso, onde wôtota wate Paulo nde la Baranaba takiwo wa l’atei w’olongoswamelo waki Nzambi ne dia vo wakawanyi oka?
9. (a) Naa pekato kakatshe Petero, ndo kakona kakokumiya dia ntsha osoku na? (b) Kakona kakasale Paulo wonya wakandoke kene kakatombe na?
9 Osango okina, otomami Petero akasale munga. Nde akahembola ekolo dia sangana l’ololo tshe kame la Akristo w’apanganu oma lo woma wone Akristo w’ase Juda watokôhetsha ne dia vo wakonyolaka anangewo w’apanganu tshanana. (Ngalatiya 2:11-14) Etena kakenyi otomami Paulo akambo wakasale Petero, nde akânya Petero dikambo dia lokewo lande la kolo la ntondo k’anto tshe waki lawo. Otondonga we mbaki lo dihole diaki Petero, otoyosala na?—Heberu 12:11.
TOSHIDIYA EKAKATANU LO NGANDJI
10. (a) Petero akandasale etena kakandangoma na? (b) Wetshelo akona wahombaso kime lo ndjela enyelo kaki Petero na?
10 Petero akakoke momale Paulo. Nde akahombe munde Paulo kɛlɛ lo woho wakandawânya la ntondo k’anto. Koko nde kotsha osoku. (Ondaki 7:9) Petero aki kanga okitshakitsha. Nde aketawo wongwelo ndo kombôtshike dihole dia vo mboladia ngandji kaki lande otsha le Paulo. (1 Petero 3:8, 9) Lembetɛ woho one wakayoteketaka Petero diaki Paulo yema l’okongo lo mukanda omotshi w’ekeketshelo wakandafundɛ anyande w’Akristo ate: “Nyeyi nyati: Memakana ka Khumadiondjo keko panda kanyu, uku akanyufundela [onangeso, “NW”] la ngandji Paulo, uku yimba yakandalongola.” (2 Petero 3:15) Eelo, Petero akatshikɛ ngandji dihole dia to nshidiya okakatanu one waki la kioko yayo oma lo lokewo lande la kolo.—Tukidi 10:12.
11. (a) Kânga mbaki osanyi a wolo efula lam’asawo, woho akona wak’enya Paulo nde la Baranaba one waki Akristo wa mete na? (b) Woho akona wele enyelo kawo kokaka monga la waho le so na?
11 Kakona kahombaso mbuta dia londjo lone laki lasa Paulo la Baranaba na? Lo nto lakashile lo ngandji. L’okongo diko, lam’akafunde Paulo etshumanelo ka la Koreto, nde akateketa diaki Baranaba oko okambi w’olimu, onyande la mamba. (1 Koreto 9:5, 6) Kânga mbakandenama di’oko Paulo akahinge lo tona di’aha Mako monga ongenyi awo wa lokendo, l’okongo diko lam’akayokomaka Mako olongo a pami wambotshunda lomba, Paulo akafundɛ Timote ate: “Osa Mako, keli uye la ndi, ne dia ndi [eko ohomba efula le mi dia olimu, NW].” (2 Timote 4:11) Sho kokaka mbosa wetshelo oma lo enyelo kene woho washidiyaka ekakatanu aso.
12. (a) Lande na kakokaso fonya one Evodi la Sutuke wakashidiya okakatanu awo na? (b) Lo ndjela Ngalatiya 5:13-15, lande na kele eko ohomba efula di’Akristo nshidiya ekakatanu awo lo ngandji na?
12 Ko ngande dikambo diaki Evodi la Sutuke na? Onde vo wakashidiya esanyi awo, wakatshikɛ ngandji dihole dia to dimanyia kolo kene kele ondo mbala motshi wakatshelana? Bible hatote woho one waki ekomelo ka dikambo diako. Koko, lam’ele vo waki wamato w’ololo ane wakakimane la wolo vo la Paulo l’olimu ande wa Lokristo, eko dikambo dia lomba leso dia sho mbetawo one l’okitshakitsha tshe, vo waketawo alako wakawakondja. Lam’akalongwama okanda waki Paulo, sho mbâfonyeka woho one wakawakendane omotshi otsha le onyande dia toshidiya dikambo diawo lo lomba la ngandji.—Ngalatiya 5:13-15.
13. Enyelo kakona ka ngandji katosha Jehowa Nzambi na?
13 Ondo we lawo kokaka mena di’eko wolo dia mbotone l’onto kana anto amotshi a l’atei w’etshumanelo. Kânga mbele wenya kambe pombaka mbeta dia vo pama lo ndjela eongelo k’Akristo wa mete, kanyia dia dikambo ne ololo: Onde Jehowa Nzambi mbutaka ate: la ntondo ka nde nanga anto, vo pombaka tokotshika oseka mbekelo yawo ya kolo tshe? Kema; Bible mbutaka ate: “Keli Unyashungu akatenya ngandji kandi ne dia Kristu akatuvwela lam’akisu [teke, “NW”] antu wa kolo.” (Romo 5:8) Toyele enyelo kaki Nzambi ndo tênya ngandji le wane wa ntsha akambo wa kolo ndo wa nyomi.—Efeso 5:1, 2; 1 Joani 4:9-11; Osambu 103:10.
14. Dako diakona diakasha Yeso lo kene k’endana la ɔtɛndɛlɔ w’anto akina na?
14 Lam’ele sho tshe kema anto w’olowanyi, Yeso akatolakanya di’aha sho tɛnda anto akina. Naka vo weko la dikomo, kete ndo sho lawo teko ladio. Yeso akoke dimbola ne ate: “Dikambo kuna di’endaye difumbu diele lo sso di’onanyo etena k’eyɛ hende okalemba wele lo sso diaye wememe na?” (Mateu 7:1-5, NW) Naka sho momba dako dia lomba so l’etema aso, kete tayonga l’ekimanyielo ka mbokana lasaso l’anangeso ndo akadiyeso.
15. (a) Lande na kele eko ohomba kimwe akina oyadi kânga teko lo mbanyange na? (b) Lo wɛla ande wele lo Mateu tshapita 18, woho akona wak’enya Yeso one kimwane eko dikambo di’ohomba na?
15 Eko ohomba w’efula dia sho mbokana ketshi ndo kimwane. Mete, Ondo osanyi omotshi kokaka monga lasaye l’onanyo omotshi kana kadiye. Koko oho dako dia lo Bible ne: “Nyukikaneli kolo. Nyudimanyanyia kolo yanyu, naka untu eko la ukina dikambu.” Ko lande na kahombaye kimwe akina naka we eko la lonyangu otsha le wo na? Ne dia Bible mbutaka ate: “Uku akanyudimanyia Khumadiondjo.” (Kolosai 3:13) Ndo dia sho kondja edimanyielo kande, Yeso akate ate: sho pombaka kimwe akina. (Mateu 6:9-12, 14, 15) Oko diaki nkum’ekanga kemotshi kakashile Yeso l’otoyi wa l’atei w’ekela ande, Jehowa akatokimwe mbala nunu ko nunu, ko bonde k’eso hatokoke kimwe anangeso mbala motshi tsho na?—Mateu 18:21-35; Tokedi 19:11.
16. (a) Lo ndjela 1 Joani 4:20, 21, woho akona wele ngandji ka Nzambi kimame la ngandji k’Akristo a wanyaso na? (b) Kakona kahombaye ntsha endaka onanyo omotshi eko laye la dikambo na?
16 Hatokoke kendakenda lo mete ko wonya ako wame petshaka anangeso l’akadiyeso kana mongaka l’otema wolo otsha le wo di’aha mbakimwe. (1 Joani 4:20, 21; 3:14-16) Omaloko, naka londjo lambotomba lasaye l’osekaye Okristo, totshikake mboteketsha. Tongake lande la kumbekumbe l’otema, koko nyoshidiya akambo oma l’ekimanyielo ka lomba la longandji. Naka we akatshela onanyo kolo, totshimbatshimbake dia nomba edimanyielo.—Mateu 5:23, 24.
17. Naa eongelo kahomba monga laye endaka onto omotshi ambokotenga na?
17 Ko ngande na endaka onto ambokotenga, kana ambokotshe woho wa kolo kekina? Bible mbishaka dako ne ate: “Tutaki wati: Dimi layûtshela uku akandantshela.” (Tukedi 24:29; Romo 12:17, 18) Yeso Kristo akasha dako ne ate: “Naka untu ambukokomola [lowala, NW] lu tama dia lunya la pami, kuwingisweli ndu tama dikina.” (Mateu 5:39) Lowala kema l’oyango wa pumuya lo demba, koko wa tenga kana sombwe. Omaloko, Yeso akalakanya ambeki ande dia vo mbewo akambo wa tamu kana ata. Lo dihole dia ‘kaloya kolo lo kolo kana lotengo lo lotengo,’ pombaka we ‘nyanga ki ndo kiyela.’—1 Petero 3:9, 11; Romo 12:14.
18. Wetshelo akona wahombaso kime oma lo enyelo ka ngandji kaha la shonodi kele la Nzambi na?
18 Toho dia sho pombaka ‘nanga nkumbo k’otondo k’anangeso.’ (1 Petero 2:17) Enyelo mbishamaka oma le Jehowa Nzambi. Nde kema kanga shonodi. Weoho tshe wa koho ya demba yeko pôpo lo washo ande. (Etsha 10:34, 35; 17:26) Wane wayoka lo “pa ka wuki” kayaye wayotomba oma lo “wedja tshe, ndu uma lu wauhu tshe ndu uma lu weuhu w’antu tshe, ndu w’eteketa tshe.” (Enyelo 7:9, 14-17) Omaloko, lo ndjela enyelo kaki Nzambi, sho pombaka nanga anto tshe aha la shonodi ya weoho, ya wedja, kana ya ambeyi w’okanda w’efula ndo wele la ekondjelo, kana shonodi y’endana la lokoho la demba.
19. (a) Woho akona wahombaso mbosa ndo mena Akristo w’anangeso wa lo mbetawo na? (b) Diɛsɛ dia woke diakona diahombaso monga ladio na?
19 Yanga woho a we mbeya wane tshe wele l’atei w’etshumanelo k’Akristo, lo ntsha ngaso wayokoma lo mbaoka ngandji. Osa dikumanyi oko wa papa la wa mama, elongolongo oko ananyo ndo esekaseka oko akadieye. (1 Timote 5:1, 2) Monga omotshi a l’atei a nkumbo ka woke kana a l’atei w’olongoswamelo waki Nzambi w’enama wele anto a loko mbokanaka kame lo ngandji eko dikambo dia diɛsɛ efula. Nde ongenongeno wayoyala dia monga la loseno la pondjo lo paradiso ka la kete kayodingama la woho wa nkumbo ka ngandji ka ngaso lee!—1 Koreto 13:4-8.
[Diombwɛlo di’osato wa lo lɛkɛ 233]
Kakona kahombaso kime oko wetshelo lo ndjela osanyi wakatombe lasa Evodi la Sutuke na?
[Diombwɛlo di’osato wa lo lɛkɛ 235]
Onde tamu takatombe lasa Paulo la Baranaba nembetshiyaka one vo komonga wa l’atei w’olongoswamelo waki Nzambi oka?
[Diombwɛlo di’osato wa lo lɛkɛ 236]
Akristo wa mete tshikeka ngandji dihole dia to dimanyia esanyi awo
[Diombwɛlo di’osato wa lo lɛkɛ 237]
L’atei w’olongoswamelo waki Nzambi, ngandji sokoya Akristo di’aha amotshi mbahemɛ akina