Tshapita 14

Ambeki a Yeso wa ntondo

L’ƆKƆNGƆ wa nde tshikala nshi 40 l’oswe, Yeso ambokalola oya le Joani, ɔnɛ lakôbatiza. Lam’ayandasukana, ondo Joani ambôtshuma lohita ko ambotɛ wanɛ wele suke la nde ate: “Nyendi On’a Okoko a [Nzambi, NW], latunyaka kolo ya la kete! Ndi kakamataka nti: One layayi l’okongo ami, keli la ntundu kami, ne dia ndi aki la ntundu kami.” Kânga mbênde enondo a Yeso, Joani mbeyaka ɔnɛ Yeso akasɛnaka la ntondo kande oko etongami ka lo nyuma l’olongo.

Koko, mingu mɔtshi la ntondo, lam’akaye Yeso dia ndjobatizama, ondo Joani kombeyaka mɛtɛ ɔnɛ nde mbayonga Mɛsiya. Nde ambosuya ate: “Dimi kumbêya, keli ne dia mbêyanya le Isariyele, dikambu so mbakamayi, mbabatizami l’ashi.”

Oma lâsɔ, Joani ambolembetshiya ampokami ande kɛnɛ kakatombe lam’akandabatizaka Yeso, ata ate: “Dimi lakenyi [n]yuma ayahulo uma l’ulungu uku fudu ka inga, ku to kakawahema. Dimi kumbêya. Keli lakantumi dia ndjubatiza l’ashi, kakamvutela ati: Untu tshe layuyena [n]yuma ayahulo le ndi, la ambutshikala le ndi, ndi katubatizaka la [nyuma k’ekila, NW]. Dimi lakenyi dikambu so, ku lakasanyia antu nti: On’a [Nzambi, NW] one.”

La wedi a pindju, Joani akemadi nde l’ambeki ande ahende. Lam’ɛnyinde Yeso ayaye, ko nde mbuta nto ate: “Nyendi On’a Okoko a [Nzambi, NW]!” Lam’okiwɔ ɔsɔku, ambeki akɔ ahende waki Joani Obatizanyi wambotatɛ ndjela Yeso. Ɔmɔtshi lokombo lande Andɛlɛ, okina Joani, nde mɛtɛ mbakakɔndɔla akambo anɛ. Lo ndjela tolembetelo tele laso, Joani yakɔ mbetanaka la Yeso ana l’ana, nɛ dia nde ekɔ ɔn’aki Salome, kosh’aki Mariya la omoto.

Akadimɔ nganɛ, ɛnyinde ko Joani nde la Andɛlɛ wayoyele, Yeso mbawambolande ate: “Ayanganyu na?”

Ko vɔ mbawombolawɔ vate: “Rabi  . . . , lendi uhangiye na?”

Ko Yeso nde lawɔ ate: “Nyuyi, nyayena.”

Aya oko eshidi ɛnɛi wa dikɔlɔ, Andɛlɛ nde la Joani wambotshikala kâmɛ la Yeso polo ndo l’edjelo ka wonya. L’ɔkɔngɔ diko, Andɛlɛ ambɔngɛnangɛna efula ko nde ambolawɔ dia têlɛ ɔnango lelɛwɔ ɔnɛ Petero. Andɛlɛ mbawotɛnde ate: “Tambena Mesiya.” Ɔnɛ atɔlande Petero otsha le Yeso. Ondo l’etena kakɔ kâmɛ, Joani akatswe dia toyanga ɔnango lelɛwɔ Jakoba ko ambowela le Yeso; Joani hakɔndɔla dikambo sɔ di’endana lande l’atei w’Evanjiliyɔ ande, nɛ dia ɔsɔku mbele mbekelo kande.

La wedi a pindju, Yeso ambɛna Filipɔ, Ose Bɛtɛsayida, osomba w’Andɛlɛ la Petero. Mbawelɛnde ate: “Undjeli.”

Lo wedi ande, Filipɔ akatshwe le Natanyɛlɛ, ɔnɛ lelɛwɔ nto ɔnɛ: Baratɔlɔmayo, ko nde akatowotɛ ate: “Tambena one lakafundi Mose lu elembe ndu amvutshi, Jesu y’usi Nazareta, on’a Josefu.” Koko Natanyɛlɛ ekɔ lo mbidja tâmu. Nde ekɔ lo mombola ate: “Engo k’ololo mbeyaka ndja uma la Nazareta uka?”

Ko Filipɔ mbôtshutshuyande ate: “Yaka yendi.” Wambokoma suke la Yeso, ɔnɛ ata Yeso lo dikambo dia Natanyɛlɛ ate: “[Hanyɛnyi, NW], usi Isariyele mete, laha la lukesu!”

Natanyɛlɛ mbawombolande ate: “Uma lendi akayambeyi na?”

Ko Yeso mbôkadimolande ate: “La ntundu ka Filipo ataketi, lam’akiye la tshina dia utamba a fingu, dimi lakakenyi.”

Natanyɛlɛ ambamba woho w’anyanya. Ɔnɛ awotɛnde ate: “Umbetsha, On’a [Nzambi, NW] keye! Khum’ekanga ka Isariyele keye!”

Yeso mbawombolande ate: “We ambetawo, ne dia diui diukutedimi nti: Lakakenyi la tshina di’otamba a fingu? We ayena akambu wuleki ane.” Ko Yeso ambâlaka ate: “Mete, mete, kanyutelami nti: Nyayena ulungu ambudihwama, la andjelo wa [Nzambi, NW] wambela la wahulo ladiku dia On’a untu.”

Kem’edja l’ɔkɔngɔ w’akambo asɔ, Yeso nde l’ambeki ande w’eyoyo wambomɔ oma l’Okidi wa Jɔrɔdana ko wambotshɔ otsha la Ngalileya. Joani 1:29-51.

▪ Wa na wele ambeki wa ntondo waki Yeso?

▪ Woho akɔna wamboyoya Petero, ondo ndo Jakɔba, le Yeso?

▪ Kakɔna kambetawoya Natanyɛlɛ ɔnɛ Yeso ekɔ Ɔna Nzambi?