Tshapita 20

Dihindo dia hende dia la Kana

L’ƆKƆNGƆ w’olimu w’efula w’esambishelo ka la Judiya, Yeso ambokalola lakawɔ, koko aha dia ndjômuya. Lo yoho yotshikitanyi, nde ambotatɛ olimu w’esambishelo woleki woke la Ngalileya, lo lɛtshi la nkɛtɛ lakandôle. Koko, lo dihole dia vɔ tshikala kâmɛ lande, ambeki ande wambokalola lo wa nkumbo yawɔ ko wambotatɛ sala elimu awɔ w’edjedja.

Losango lakɔna lambotatɛ Yeso sambisha na? Losango lakɔ lɔ lɔnɛ: “Diulelu dia [Nzambi, NW] diaya suki. Nyukadimuli etema, nyetawo lukumu l’ololo.” Kakɔna kambosala Ase Ngalileya na? Vɔ wambolonga Yeso. Vɔ mbɔlɛmiyaka. Aha l’ɔtɛ wa losango lande mbambowosala ngasɔ, koko nɛ dia, ambeta ngɔndɔ mɔtshi, efula ka l’atei awɔ wakikɔ la Jerusalɛma lo difɛstɔ di’Elekanelo ko wakɛnyi tolembetelo ta mamba takandasale.

Ondo olimu a woke w’esambishelo waki Yeso la Ngalileya wambotatɛ la Kana. Ohɔ dia, ntondotondo, lam’akandayakalolaka oma la Judeya, nde akakadimola ashi wanu lo difɛstɔ dimɔtshi dia diwala diakasalemaka lɛkɔ. Mbala ka hende kɛnɛ kambondoya la Kana, ɔn’aki okambi ɔmɔtshi wa lo mbalasa kaki Nkumekanga Hɛrɔdɛ Atipa ekɔ la hemɔ efula. Kam’okinde ɔnɛ Yeso amboya oma la Judeya oya la Kana, nde ambɔsa lɔkɛndɔ l’otale oma la Kapɛrɛnauma, lɛnɛ odjashinde dia nde tɛnana la Yeso. Nde ekɔ la lonyangu l’efula ko ambɔsɛngasɛnga Yeso ate: ‘Lam’alangayɛ, yaka esadi la ntondo k’ɔnami mvɔ.’

Yeso mbôkadimolande ate: ‘Kalola lakayɛ. Ɔnayɛ ambɔkɔnɔ!’ Okambi waki Hɛrɔdɛ ambetawɔ ko ambokalola otsha lakande. Êke l’atei a mboka, ɔnɛ ahomanande l’ekambi ande wayalawɔ dia ndjowotɛ ɔnɛ ndoko dikambo diambolana—nɛ dia ɔnande ambɔkɔlɔngana! Mbawambolande ate: ‘Etena kakɔna kakandakɔlɔnganyi?’

Mbôkadimolawɔ vate: ‘Lui, l’oshidi ɔtɔi wa dikɔlɔ.’

Ko okambi akɔ ambɛdikola ɔnɛ nde akakɔlɔnganyi ko wonya akɔ wakawotɛ Yeso ate: ‘Ɔnayɛ ambɔkɔnɔ!’ L’ɔkɔngɔ w’akambo asɔ, pami kakɔ la wa lu luudu lande tshɛ wamboyala ambeki wa Kristo.

Ɔnkɔnɛ, Kana akayala osomba wakahomɔ lokolo l’ɔlɔ, nɛ dia lɛkɔ mbakasale Yeso ahindo mbala hiende y’etondo dia nde mɛnya ɔnɛ lambokalola oma la Judeya. Mɛtɛ, aha ahindo asɔ ato mbakandasale tatɛ oma k’etatelo k’olimu ande, koko vɔ wekɔ ohomba nɛ dia vɔ wakɛnyaka ɔnɛ Yeso ambokalola oya la Ngalileya.

Kakianɛ, Yeso ambɔtɔ mboka otsha la Nazarɛta. Kakɔna kôkongɛ lɛkɔ na? Joani 4:43-54; Mako 1:14, 15; Luka 4:14, 15.

▪ Lam’okaludi Yeso la Ngalileya, kakɔna kosadi ambeki ande, ndo ngande wôlungudi anto?

▪ Dihindo diakɔna diambosala Yeso, ndo kakɔna kambosala wanɛ wodisalende?

▪ Woho akɔna wambohomɔ osomba wa Kana lokolo l’ɔlɔ oma le Yeso?