Tshapita 24

Ɔkɔkɔ wakaye Yeso lanɛ la nkɛtɛ

YESO akasadi olimu lushi l’otondo lam’ende la Kapɛrɛnauma kâmɛ l’ambeki ande anɛi, ko la dikɔlɔ, ase ngelo wêla ɛkɔnyi awɔ tshɛ dia nde ndjâkɔnɔla. Nde bu ndoko l’etena ka tshikala ndamɛ.

Kakianɛ, taya la wedi a pindju. La hiutshihutshi, Yeso ambetɔ ko ambotomba ndamɛ. Nde ambotshɔ ndamɛ lo dihole diakokande nɔmba She lo woshɛshɛ. Koko nde hatotshikala ndamɛ edja lo dihole sɔ, nɛ dia Petero l’akina wambɛna ɔnɛ nde akatshwe, ko wambotomba dia toyanga.

Lam’ambowɛna Yeso, Petero ambowotɛ ate: “Antu [tshɛ, NW] weko lo kuyanga.” Ase Kapɛrɛnauma wekɔ lo nanga dia Yeso mbidjasɛ kâmɛ la wɔ. Mɛtɛ, vɔ ngɛnangɛnaka kɛnɛ kâsalɛnde! Ko onde, Yeso akaye la nkɛtɛ paka dia ndjosala ahindo wa ngasɔ dia kɔnɔlaka hemɔ y’anto tsho? Atena watande lo dikambo sɔ?

Lo ndjela ɔkɔndɔ ɔmɔtshi wa lo Bible, Yeso nde l’ambeki ande ate: “Tutshu l’ahuli akina, lu esumba weli lasuki, dia dimi ntusambisha ndu leko, ne dia dikambu diako mbakamayi.” Kânga mbambɔ̂sɛngasɛnga anto dia tshikala kâmɛ la wɔ, Yeso nd’awɔ ate: “Dieli la mi dia nsambisha lukumu l’ololo la diulelu dia [Nzambi, NW] ndu lu esumba ekina, ne dia dimi lakatumama dia dikambu diako.”

Eelo, Yeso akaye la nkɛtɛ ntondotondo dia ndjosambisha akambo wa Diolelo diaki Nzambi, nɛ dia diɔ mbayoyindja lokombo la She ndo mbayoshidiya hemɔ yatata anto tshɛ lo pondjo. Koko, Yeso ekɔ lo ntsha ahindo wa nkɔnɔya hemɔ y’anto dia nde mɛnya ɔnɛ Nzambi mbôtomi. Lo yoho yakɔ yâmɛ mbakasale Mɔsɛ ahindo amɔtshi, ambeta deko ko deko, dia nde mɛnya anto ɔnɛ: okambi wa Nzambi mbemi.

Kakianɛ, Yeso ambomɔ la Kapɛrɛnauma ko ambotshɔ dia tosambisha l’esomba ekina, ambeki ande anɛi wambotshɔ la nde. Ambeki akɔ anɛi nkombo yawɔ nyɛ: Petero nde l’Andɛlɛ w’ɔnango, Joani nde la Jakɔba y’ɔnango. Ohɔ dia, ambeta lomingu l’otondo tatɛ oma lam’akawaete Yeso dia vɔ ndjâla akimanyedi ndo anyande wa ntondo wa lo lɔkɛndɔ.

Esambishelo kambosala Yeso la Ngalileya kâmɛ l’ambeki ande anɛi kamboyala l’etombelo w’ɔngɛnɔngɛnɔ efula! Ɔnkɔnɛ, lokumu l’elimu ande lambodiangana polo ndo lo wodja w’otondo wa Suriya. Elui w’anto wamboya oma la Ngalileya, la Judeya, ndo oma lo wedi okina w’Ɔkɛdi wa Jɔrɔdana ko wekɔ lo tayele Yeso nde l’ambeki ande. Mako 1:35-39; Luka 4:42, 43; Mateu 4:23-25; Etumbelu 4:1-9, 30, 31.

▪ L’ɔkɔngɔ wa nde kamba olimu lushi l’otondo, kakɔna kambosala Yeso la hiutshihutshi ya la wedi a pindju?

▪ Ɔkɔkɔ akɔna wakatomama Yeso oya lanɛ la nkɛtɛ, ndo oyango akɔna wele l’ahindo ande?

▪ Wa na wambotshɔ kâmɛ la Yeso lo lɔkɛndɔ lande l’esambishelo la Ngalileya, ndo etombelo akɔna wamboyala oma l’olimu akɔ ɔsɔ?