Tshapita 25

Yeso amboka kanga sudi kɛtshi

ETENA katakindola Yeso l’esomba wa la Ngalileya nde l’ambeki ande, lokumu l’akambo wa mamba wasalande lambodiangana lo lɛtshi la nkɛtɛ l’otondo, polo ndo l’osomba ɔmɔtshi wodjashi kanga sudi ɔmɔtshi. Onganga Luka ekɔ lo shikikɛ ate onto ɔsɔ aki la “sudi dimba tshe.” Koko, naka hemɔ kɛsɔ kamboheka, tɔ pembolaka tenyi dikina dia demba ɔkɔkɛ ɔkɔkɛ. Kanga sudi ɔsɔ aya ndjâka wɛ mênda ko ndo kɛtshi efula.

Lam’ambokoma Yeso l’osomba akɔ, kanga sudi akɔ ɔsɔ ambotshɔ otsha le nde. Lo ndjela Ɛlɛmbɛ wa Nzambi, kanga sudi tshɛ pombaka mbewola anto wele suke la nde lo pangɔhangɔ ate: “Mindu, mindu!” di’aha vɔ sukana la nde ko ndjosambiyama hemɔ. L’etena kɛnɛ, kanga sudi ambɔkɔ ekukumadi, asɛngasɛnga Yeso ate: “Khumadiondjo, naka we alanga, we mbeyaka [mbɛdiami, NW].”

Ande mbetawɔ kele l’onto ɔsɔ le Yeso lee! Koko onto tshɛ ekɔ lo mbôka kɛtshi l’ɔtɛ wa hemɔ kande. Kakɔna kayanga sala Yeso na? Kakɔna kotoyosala na? Yeso ambângasana la kɛtshi, ambosembola lonya ko ambonanda pami kakɔ, awotɛ ate: “dimi nangaka, [oyale pudipudi, NW].” Ɔtɛkɛta kele edja, sudi kambomɔ oma lo demba diande.

Onde wɛ nangaka di’onto lôkana kɛtshi ngasɔ ndjâla nkumekanga kayɛ? Dionga diaki Yeso otsha le kanga sudi ɔsɔ toshikikɛka ɔnɛ lam’ayondolɛ lo Diolelo Diande, nde ayokotsha pɔlɔfɛsi ka lo Bible kata ɔnɛ: “Ndi kukaki amenyi fono la asi wula ketshi, kamelaki nyumu ya amenyi fono.” Eelo, l’etena kɛsɔ mbayokotsha Yeso saki ka l’otema ande ka kimanyiya amɛnyi fɔnu tshɛ.

Nsango y’olimu wa Yeso yamboshila diangana l’atei w’Ase Juda, kânga la ntondo ka nde nkɔnɔya kanga sudi. Dia nde kotsha pɔlɔfɛsi kekina k’Isaya, Yeso ambotɛ pami kakandakɔnɔla ate: “Tutelaki untu dikambu ne.” Nde ambowodjangɛ ate: “Utshu, utuyaenya le olombedi. Utukimo diango diakate Mose ne dia [ɛdiɛlɔ, NW] kaye uku djimbitelu le wo.”

Koko, pami kɛsɔ ekɔ l’ɔlɔ woho w’anyanya ko nde hakoke ndo momba sheke ya dihindo sɔ. Nde ambotshɔ ambotodianganya lokumu l’ahole tshɛ, ondo nde ambemula saki y’anto lo woho wele Yeso hayokoka mbɔtɔ l’osomba ɔmɔtshi lo asho w’anto. Ɔnkɔnɛ, Yeso ambotshikala l’ahole a woshamu ndo l’eswe wa shɛnga, ko anto wekɔ lo ndja oma l’ahole tshɛ oya le nde dia ndjôhokamɛ ndo dia ndjɔkɔnɔ oma lo hemɔ yawɔ. Luka 5:12-16; Mako 1:40-45; Mateu 8:2-4; Akambu w’Asi Lewi 13:45; 14:10-13; Osambu 72:13; Isaya 42:1, 2.

▪ Kakɔna katosalaka hemɔ ka sudi lo demba di’onto, ndo kakɔna kakahombaka kanga sudi tawelɛwelɛka lo dihole tshɛ diakomande?

▪ Woho akɔna wambɔsɛngasɛnga kanga sudi Yeso, ndo wetshelo akɔna wambotokondja oma lo kɛnɛ kosadinde?

▪ Woho akɔna wahakitanyiyisha pami kɛsɔ dui dia Yeso l’ɔkɔngɔ wa nde nkɔnɔ, ndo etombelo akɔna wamboyala?