Tshapita 28

Dikambo di’okilelo wa mbo ya ndɛ

AMBETA ɔnɔnyi w’otondo tatɛ lam’aki Yeso lo difɛstɔ di’Elekanelo dia l’ɔnɔnyi 30 T.D. L’etena kɛnɛ ko Joani Obatizanyi aya lo lokanu ngɔndɔ efula. Kânga mbakandalangaka ɔnɛ ambeki ande wayale ambeki wa Kristo, aha vɔ tshɛ mbakasale dikambo sɔ.

Kakianɛ, ambeki wa Joani, ɔnɛ lele lo lokanu, wamboya oya le Yeso ko wamboyombola vate: “Okoko wana shu la Afarise nkilaka mbu ya nde, keli ambeki aye hawukili?” Afarisɛ nkilaka mbo ya ndɛ mbala hiende lo lomingu oko walɔmba mbekelo ka l’ɔtɛmwɛlɔ awɔ. Ondo ndo ambeki wa Joani mbayela mbekelo kɛsɔ. Ondo vɔ nkilaka mbo ya ndɛ dia ndjakiyanya lo dikambo dia wɔtwɛlɔ wa Joani lo lokanu ndo ondo wekɔ lo ndjambola bonde kele ambeki wa Yeso hawɛnya lonyangu lawɔ lo sala oko vɔ.

Yeso nde lawɔ ate: “Engenyi w’utshuki a wadi mbeyaka ndela lam’eki utshuki a wadi la wo uka? Keli nshi yayuyala, lam’ayuwâkosola utshuki a wadi, ku vo wayukila mbu ya nde.”

Ambeki wa Joani wekɔ lo mbohɔ ɔnɛ Joani ndamɛ akatɛkɛta dikambo dia Yeso ɔnɛ nde kele Otshuki a wadi. Ɔnkɔnɛ, edja tshɛ keke Yeso la lɔsɛnɔ, Joani hasungana nkila mbo ya ndɛ, kamɛ ndo ambeki wa Yeso. L’ɔkɔngɔ diko, lam’ayoyovɔ Yeso, ambeki ande wayoyonyanga ndo wayoyokila mbo ya ndɛ. Koko, lam’ayondoyolɔ ndo lam’ayondoyodɛ l’olongo, vɔ hawotoyala nto l’ɔkɔkɔ wa nkila mbo ya ndɛ dia mɛnya lonyangu lawɔ.

L’ɔkɔngɔ diko, Yeso amboka wɛɛla ɔnɛ ate: “Nduku untu atotelaka etshi ka dihondo di’uyuyu lu dihondo di’umusu. Ne dia etshi ka dihondo di’uyuyu atukata etshi uma lu dihondo di’umusu, ku ushu ndjala wuki. Ntu, antu hawutudjaka wanu w’uyuyu lu atapa wa dikuhu di’edjedja. Naka wayutsha osoku, wanu wayata dikuhu, wayutshulo, ku dikuhu diayulana. Keli watudjaka wanu w’uyuyu lu dihuhu di’eyuyu. Ku diango diako pendi diayulamema ololo.” Woho akɔna wɔtɔnɛ wɛɛla ɛsɔ la dikambo dia kila mbo ya ndɛ na?

Yeso ekɔ lo kimanyiya ambeki wa Joani Obatizanyi dia shihodia ɔnɛ: ndoko onto lahomba nongamɛ di’ambeki ande kitanyiya ditshelo di’edjedja dia l’ɔtɛmwɛlɔ w’Ase Juda, oko etshelo k’okilelo wa mbo ya ndɛ. Nde kondja dia ndjɔtɛla ndo dia ndjotalola ditshelo di’emusu dia l’ɔtɛmwɛlɔ diaya suke la mbikashema. Lokristo la mɛtɛ halohombe ndjela mbekelo ya l’ɔtɛmwɛlɔ w’Ase Juda wa lo nshi nshɔ kânga ndjaɔtɔnganyiya la mbekelo y’anto ya l’ɔtɛmwɛlɔ akɔ. Kema, Lokristo bu oko ɛtshi ka dihɔndɔ di’oyoyo kambodjama daka lo dihɔndɔ di’omusu, kana oko wanu w’eyoyo wambodjama lo ekoho k’edjedja. Mateu 9:14-17; Mako 2:18-22; Luka 5:33-39; Joani 3:27-29.

▪ Wa na wakila mbo ya ndɛ, ndo l’oyango akɔna na?

▪ Bonde kele ambeki wa Yeso hawokile mbo ya ndɛ edja tshɛ kende kâmɛ la wɔ, ndo kakɔna kayoyowanyɛ ɔkɔkɔ wa vɔ nkila mbo ya ndɛ l’ɔkɔngɔ diko?

▪ Wɛɛla akɔna wamboka Yeso, ndo naa kitshimudi ya wɛɛla akɔ?