Tshapita 30

Yeso ambokaloya afungi ande dui

EWANDJI w’ɛtɛmwɛlɔ w’Ase Juda wambofunda Yeso ɔnɛ nde kɔnyɔla lushi la Sabato, diɔ diakɔ diambondâkadimola ate: “Papa atukambaka edja ndu kakiane, ndu dimi latukambaka.”

Oyadi kakɔna tshɛ kata Afarisɛ, olimu wa Yeso kema yoho y’olimu wasekɛma l’ɔlɛmbɛ wa lushi la Sabato. Nzambi mbakawosha olimu wa sambisha ndo wa kɔnɔla hemɔ, ndo l’ɛnyɛlɔ ka Nzambi, nde ekɔ lo tetemala sala olimu akɔ ɔsɔ lushi la lushi. Koko, okadimwelo ande wambokiya Ase Juda nkɛlɛ koleki kɛnɛ kakawokaka ntondo, ko vɔ wambotatɛ nyanga woho wa mbodiaka. Lande na?

Nɛ dia kakianɛ, vɔ hawɔfɔnya paka ɔnɛ Yeso ekɔ lo mɔnyɔla Sabato oto, koko wɔ̂saka ndo woho wayatande ɔnɛ dimi kele Ɔna Nzambi oko nde ambɔtɛnga Nzambi. Koko, aha la mboka wɔma, Yeso ambonyomoleka mbatɛ akambo w’endana la diokanelo di’ɔlɔlɔ diele lam’asande la Nzambi. Nde ambâlembetshiya ate: “Shi atulangaka Ona, ku ndi atuwenyaka akambu tshe watshandi ndame.”

Yeso ambotetemala mbuta ate: ‘Oko watololaka Papa edo ndo mbasha lɔsɛnɔ, woho akɔ wâmɛ mbatololaka ɔna wanɛ walangande.’ Mɛtɛ, Ɔna ambôtatɛka la mbolola edo wa lo nyuma! Yeso ate: “One luka diui diami, letawo lakantumi, . . . ndi ambeta uma lu nyoi utsha lu lumu.” Eelo, nde ambotetemala mbuta ate: “Etena kambukuka, keko kakiane, kayuka edu diui dia Ona [Nzambi, NW]. Wane wetawo, wayuyala la lumu.”

Kânga mbele l’etena kɛnɛ ko Yeso atolola ndoko onto l’emunyi, nde ambotɛ afungi ande ɔnɛ eolwelo ka ngasɔ kayoyala. Nde lawɔ ate: “Tanyambaki dia dikambu so, ne dia etena kambukuka, kayuka wane weli lu waumbu tshe [wôhɔma, NW] diui diandi, ku vo wayutumba.”

Ondo polo ndo l’etena kɛnɛ ko Yeso atakɛnɛmɔla l’eshikikelo tshɛ ɔkɛndɛ w’ohomba wele lande lo sangwelo dia Nzambi. Koko, afungi wa Yeso wekɔ la tolembetelo efula lo dikambo sɔ aha paka oma le Yeso ndamɛ. Yeso mbawaoholande ate: “Nyu nyakatumi antu le Joani, ku Joani akati akambu wa mete.”

Ambeta ɛnɔnyi ehende eto, Joani Obatizanyi akatɛ ewandji w’ɛtɛmwɛlɔ w’Ase Juda dikambo di’Ɔnɛ layaye l’ɔkɔngɔ ande. Awaohola ɔnɛ ntondotondo, vɔ wakɔsaka Joani, ɔnɛ lele lo lokanu, la nɛmɔ efula, Yeso nde lawɔ ate: ‘Etena kɛmɔtshi, nde akanyɔngɛnyangɛnyaka l’osase ande.’ Yeso ambowaohola akambo asɔ la kanyi ya mbakimanyiya, ɛɛ, ya mbasha panda. Koko, nde kema l’ohomba w’awui waki Joani.

Nde lawɔ ate: ‘Akambo anɛ wasalami [mbidja ndo dihindo diakinde oma la sala] mbɛ̂nya ɔnɛ Papa kakantome.’ Lâdiko di’akambo asɔ, Yeso akanyomota ate: “Papa lakantumi, [akate dikambo diami, NW].” Nzambi akate dikambo dia Yeso, ɛnyɛlɔ oko lam’akandate l’etena kakandalongolaka batismu ate: “On’ami la ngandji one.”

Mɛtɛ, afungi wa Yeso wekɔ l’onongo l’ɔtɛ wahawawetawɔ. Afundelo wasɛmawɔ ɔnɛ vɔ mbasɛdingolawɔ wekɔ lo mbuta dikambo dia Yeso! Yeso ambodihiya ate: “Utunyetawo Mose, tshiki nyu nyakambetawo, ne dia ndi akafundi dikambu diami. Keli naka nyu hanyetawo afundelu andi, ukundi ayunyetawo aui ami?” Joani 5:17-47; 1:19-27; Mateu 3:17.

▪ Lande na kele olimu wa Yeso hawɔnyɔla ɔlɛmbɛ wa Sabato na?

▪ Woho akɔna wakɔndɔla Yeso ɔkɛndɛ w’ohomba wele lande lo sangwelo dia Nzambi?

▪ Dia nde mɛnya ɔnɛ nde ekɔ Ɔna Nzambi, awui waki na wambovusola Yeso?